Kewo ko:
1 N kanuntewo, i ñiiñaata ñaameŋ,
i ñiiñaabaata le.
I ñaa be le ko puraa ñaa,
i la kuŋ bitiraŋo koto.
I kuntiñoo be le ko
niŋ baa koorewo niŋ boroo
be Kileyadi Konkoo jii kaŋ.
2 I ñiŋolu be koyiriŋ ne ko perekaanoo,
ì bee be temberiŋ i daa kono,
hani kiliŋ maŋ dasa.
3 I daaturoo la wulewo ñiiñaata ñaameŋ,
i daa be kekuuriŋ.
I kenteŋo ka muluŋ ne
ko roomaani* yiridiŋ talantewo
i la kuŋ bitiraŋo koto.
4 I kaŋo be jaŋayaariŋ ko Dawuda la tatoo,
i kaŋ nomboolu be jonkiriŋ ñoo kaŋ.
Kantotaalu be ñatariŋ a bala,
ì bee be ñiiñaariŋ ko kelejawaroolu la koteeroo*.
5 I sunjoolu be looriŋ ne pet,
ì be ñiiñaariŋ ko minandiŋ fula be daañinoo la
firi ñiimaalu kono.
6 Janniŋ fanoo ka ke,
janniŋ diboo ka yeemaŋ,
m be taa wo konko fuloo to le,
miiri* seeralaa be daameŋ,
aniŋ cuuraayoo.
7 N kanuntewo,
i dulaa bee le ñiiñaata,
feŋ maŋ dasa i bala.
8 N na maañoo, bo naŋ Libanooni,
i ye naa n kaŋ.
Bo naŋ Libanooni konkoolu to,
i ye naa n kaŋ.
Jii naŋ Amana Konkoo turoo to,
jii naŋ Seniri niŋ Herimoni* Konkoolu to.
Bo jatoolu la koloolu to,
bo naŋ ñunkoolu to, soloolu be daameŋ.
9 M baarimmusu,
i la kuwo futata n jusukuŋo to le.
N na maañoo,
i ñaa la ŋolosiri kiliŋ,
i la kanto konoŋ julu kiliŋ,
wo le ye n jusoo futufaa kanoo la.
10 M baarimmusu, i la kanoo diyaata ñaameŋ!
N na maañoo, i la kanoo le diyaata wayinoo* ti.
I la tuloo seeroo le diyaata seerandi feŋ koteŋolu bee ti.
11 N na maañoo,
i daaturoo be le ko liyo,
i neŋo be timiyaariŋ ko liyo niŋ keekewo,
i la sitifeŋolu ka seera ko Libanooni yiroolu.
12 N na maañoo,
n kanumusoo, i be le ko naakoo,
meŋ daa be sorondiŋ,
ko ñaapuuloo meŋ be sukiriŋ.
13 I mu naakoo le ti,
roomaani* yiroolu ka faliŋ daameŋ,
ì niŋ ì diŋ diimaalu.
Fudani firoolu niŋ fiifeŋ seeralaalu buka foo jee,
14 safurani firoo niŋ ñaamandiŋ seeralaalu,
sinnamoni yiroo aniŋ cuuraayi yiri siifaa-wo-siifaa,
miiri aniŋ alowe yiroolu,
ka taa seerandi feŋ betoo siifaa bee.
15 I mu woyoo le ti naakoo kono,
i mu koloŋo le ti,
kolondiŋ jii diimaa,
ko woyoo meŋ jiyo ka woyi naŋ ka bo Libanooni.
Musoo ko:
16 Foño, wuli naŋ maraa karoo la,
foño, wuli naŋ bulubaa karoo la,
ali fee naŋ n na naakoo kono,
seerandi feŋolu seeroo ye janjaŋ.
N kanuntewo ye naa a la naakoo kono,
a ye a yiridiŋ betoolu domo.
© Mandinka Bible © Bible Society in The Gambia, 2011
