Mansa senuŋ baa
1 Yaawe* mu Mansa le ti,
a la kuwo si duniyaa moolu jarajara.
A be mansa siiriŋ kerubu malaayikoolu* teema,
bankoo si jarajara.
2 Yaawe la kuwo warata Siyoni* saatewo kono le,
a la kuwo warata duniyaa bankoolu bee kaŋ ne.
3 Batu ì ye a jayi a too la, a too silaŋñaa warata le.
Yaawe seneyaata le!
4 Mansa baa, i ye tooñaa kanu le.
I ye i la tiliŋo londi moolu teema le,
i ye tiliŋo niŋ tooñaa le ke Banisirayila kono.
5 Ali Yaawe jayi ǹ na Alla.
Ali sujudi a ye a siŋ looraŋo to.
Yaawe seneyaata le!
6 Ali hakiloo si bula Musa niŋ Haaruna la,
ì tarata nuŋ Yaawe la piriisoolu* le kono.
Samuweli fanaa keta moo le ti
meŋ duwaata Yaawe too la.
Ì woosiita a ye le, aduŋ a ye ì danku.
7 A ye i danku ì ma,
ka bo minaayi samasimmaa kono.
Ì ye a la luwaalu muta, aniŋ a la yaamaroolu,
a ye mennu dii ì la.
8 Ite Yaawe, ǹ na Alla,
i ye i danku i la moolu ma le,
aduŋ i yamfata ì la junuboolu la,
bari hani wo, i ye ì kuluu ì la junuboolu la le.
9 Ali Yaawe jayi, ǹ na Alla,
ka sujudi a ye a la konko senuŋo* to.
Kaatu ǹ na Alla, Yaawe seneyaata le!
© Mandinka Bible © Bible Society in The Gambia, 2011
