Loobula Luŋ suukuwo
Jabuuroo le mu. Loobula Luŋ suukuwo.
1 Kuu kende le mu, ka ite Yaawe* tentu,
ka suukuwo laa ka ite Alla Mansa Tallaa jayi i too la.
2 Kuu kende le mu,
ka i la kanu bambaloo kankulaa soomandaa-wo-soomandaa,
aniŋ i la tiliŋo suuto-wo-suuto,
3 ka a ke niŋ kooraa la, aniŋ suusaa,
ka a laa niŋ kontiŋ julu diimaa la.
4 Kooni Yaawe, i la kekuwolu ye n jusulaa le.
N ka suukuwo laa seewoo kono le,
ñiŋ kamma la i ye kuu baalu mennu ke.
5 Hee Yaawe, i la kekuwolu warata baake le,
i la miiroolu diinonta famfaŋ.
6 Toolewo te loŋ ke la,
aduŋ hakilintaŋo te fahaamuru ke la ko:
7 Moo kuruŋolu ka jambandi le komeŋ ñaamoo,
kuu jawu kelaalu ka firiŋ,
hani wo ì be kasaara la le fereŋ.
8 Ite Yaawe le be feŋo bee ye santo fo abadaa.
9 Hee Yaawe, a fele, i jawoolu wo,
a fele, i jawoolu be kasaara la le.
Kuu jawu kelaalu bee le be janjaŋ na.
10 Bari i ye nte semboo warandi le
komeŋ tuuraa.
I ye tulu senuŋo* le boŋ n kaŋ
ka n ke i taa ti.
11 N ñaa ye n jawoolu la boyoo je le,
ŋa wo konnantee jawoolu woosiikaŋo moyi le.
12 Moo tilindiŋolu be yiriwaa la le komeŋ teŋ suŋo,
ì ye faliŋ komeŋ Libanooni sedari* yiroolu.
13 Ì be tara la tuturiŋ Yaawe batudulaa le kono,
ka yiriwaa ǹ na Alla la luwo to.
14 Hani ì kotoo waatoo la ì ka diŋ ne,
ì ka tara faariŋ yiriwaa niŋ kereyaa la.
15 Wo ye ñiŋ ne yitandi ko, Yaawe tilinta le.
Ate le mu n na semberaŋ beroo ti,
aduŋ jenkoo te a kono.
© Mandinka Bible © Bible Society in The Gambia, 2011
