Alla la beteyaa aniŋ Banisirayila la jenkoo
Meŋ be suukuulaa ñaatonkayaa la: A si ke niŋ kontiŋ julu seyoo la. Asafu la Jabuuroo le mu.
1 Ali suukuwo laa Alla ye santo,
ǹ na semboo ka bo ate le bulu.
Ali wuuri seewoo kono ka Yaakuba la Alla jayi.
2 Ali wutu suukuwo ti, ka tambuuroo kosi,
aniŋ kontiŋo niŋ kooraa julu diimaa.
3 Ali binoo fee Kari Kutoo* la,
aniŋ kari maloo tumoo la, ǹ na juuraloo luŋo la.
4 Kaatu a mu luwaa le ti Banisirayilankoolu ye,
kaŋo meŋ, Yaakuba la Alla ye a dii.
5 Alla ye Yusufa koomalankoolu yaamari wo le la,
kabiriŋ a ye Misira bankoo moolu kele.
Wo waatoo la, ŋà diyaamukaŋo moyi le,
bari foloo m̀ maŋ a loŋ.
6 A naata a fo ko, “Ŋa ali sañoolu dahandi dunoo la,
ŋa ali buloolu foñondi sinsiŋ kuliŋ sikoo la.
7 Ali ye n kumandi ali la mantooroo kono,
ŋa ali bondi bataa kono,
ŋa n danku ali ma saŋ feteŋo niŋ diboo le kono.
Ŋa ali kotobo Meriba Woyoo to le.
S8 “N na moolu, ali i lamoyi ŋa ali dandalaa.
Kooni Banisirayilankoolu, muna ali i lamoyi n na.
9 Batufeŋ koteŋ maŋ ñaŋ na tara la ali fee.
Ali kana sujudi ka bantalanka batufeŋolu batu fereŋ.
10 Nte le mu Yaawe* ti, ali la Alla,
meŋ ye ali bondi Misira bankoo kaŋ.
Ali ali daa yele ka n daani,
aduŋ m be a fandi la le.
11 “Bari Banisirayila maŋ i lamoyi n na,
n na moolu maŋ soŋ m ma.
12 Bituŋ ŋa ì tu ì la sondome jaa kaŋ,
ka bula ì fansuŋ yaamaroolu nooma.
13 “Kooni, niŋ Banisirayila taamata n na siloolu la,
niŋ n na moolu ye i lamoyi n na,
14 tennuŋ m be tariyaa la ì jawoolu ñankoŋ na le,
m buloo ye laa ì toorandilaalu kaŋ.
15 Mennu ye nte Yaawe koŋ,
ì ŋunumatoo le be n waliŋ na,
aduŋ ì la jaraboo be tu la le fo fawu.
16 N si alitolu daañini siimaŋ kendoo la,
aniŋ liyo meŋ ka bo berehuwo kono.”
© Mandinka Bible © Bible Society in The Gambia, 2011
