Bankoo la seyinkaŋ firiŋo duwaa
Meŋ be suukuulaa ñaatonkayaa la: A si laa juloo la ì ka a fo meŋ ye ko, “Firoolu.” Asafu la Seedeyaaraŋo le mu. Jabuuroo le mu.
1 Banisirayila Kantalaa, i tuloo tu ǹ to,
ite meŋ ka Yusufa koomalankoolu kenkeŋ ko saajii koorewo.
Ite meŋ na mansasiiraŋo be kerubu malaayikoolu* teema,
i la kallankeeyaa* faramansandi,
2 Efurayimu*, Benjamini, aniŋ Manase lasiloolu ye.
I niŋ i la semboo ye wuli,
i ye naa ǹ kiisa.
3 Hee Alla, m̀ murundi firiŋo kono,
i ye i ñaa diyaa m̀ fee, fo ǹ si kiisa.
4 Hee Yaawe* Alihawaa Maariyo*,
janniŋ muŋ tuma le i be tara la kamfaariŋ,
ka balaŋ i la moolu la duwaa jaabi la?
5 I ye ñaajiyo le ke ì ye domoroo ti,
ì ka ñaajiyo miŋ ne komeŋ jiyo.
6 I ye ǹ ke ǹ dandanna banku moolu ye fuufuutaa le ti,
ǹ jawoolu ka jele ǹ na.
7 Hee Alla Alihawaa Maariyo,
m̀ murundi firiŋo kono,
i ye i ñaa diyaa m̀ fee, fo ǹ si kiisa.
8 I ye wayini* yiri betoo bondi naŋ Misira le,
i ye banku moo koteŋolu bayi,
i naata a tutu.
9 I ye kenoo fita a ye le,
a ye suloo duŋ,
a woyita bankoo kaŋ ka a beŋ.
10 A dubeŋo ye konkoolu muuri le,
a buloolu ye sedari* yiri baalu muuri.
11 A buloolu biireeta le
ka taa fo Baa Baa* maafaŋo la,
aniŋ ka taa Yufurati Boloŋo maafaŋo.
12 Wo to muŋ ne duŋ ye a tinna
i ye a sansaŋo boyindi duuma,
ka a tinna tambilaalu bee ka a diŋolu woronto?
13 Wulakono seewoolu ka kirimbaasi a kaŋ ne
ka a kuura,
wulakono daafeŋolu ka i baluu a la.
14 Hee Alla Alihawaa Maariyo, muru ǹ kaŋ!
Duuma juubee ka bo Arijana kono, i ye a je.
Ñiŋ yiroo topatoo,
15 i ye meŋ tutu i bulubaa buloo la,
ka a londi i faŋo ye ko dinkewo.
16 Jawoolu ye a kuntu duuma le,
ì ye dimbaa duŋ a la.
Allamaa i kamfaatoo ye ì juubee,
i ye ì kasaara.
17 Bari i bulubaa buloo ye tara i la tomboŋ moo koto,
wo hadamadiŋo i ye meŋ londi i faŋo ye.
18 Wo to ǹ te ǹ koo dii la i la kotenke.
Ǹ na baluwo kutayandi,
m̀ be kali i tentu la i too la le.
19 Hee Yaawe Alihawaa Maariyo,
m̀ murundi firiŋo kono,
i ye i ñaa diyaa m̀ fee, fo ǹ si kiisa.
© Mandinka Bible © Bible Society in The Gambia, 2011
