A Glimpse – The Gambia

Alla la horomoo niŋ waroo jayiroo

Meŋ be suukuulaa ñaatonkayaa la: A si ke niŋ kontiŋ julu seyoo la. Dawuda la Jabuuroo le mu.

1 Kooni Yaawe*, m̀ Maarii,

duniyaa bee ye a loŋ ne i too warata ñaameŋ.

I la kallankeeyaa* jayiroo ka futa saŋ fatoolu ma le.

2 Deenaanoolu niŋ dindiŋolu ka a suukuu le.

I ye tankadulaa le loo, i jawoolu la kuwo kamma la,

ka konnantewo deyindi, aniŋ julujoolaa.

3 Niŋ ŋa i la saŋ fatoolu la kuwo miira,

i buloo la daaroo,

karoo aniŋ looloolu, i ye mennu londi,

4 muŋ ne mu moo ti fo i hakiloo ka bula a la?

Muŋ ne mu hadamadiŋo ti fo i ka a topatoo?

5 Hani wo i ye a la fisamanteeyaa dasandi

i faŋo la le domandiŋ.

I ye horomoo niŋ buuñaa dii a la le,

ka a mansayandi.

6 I ye a marandi i la daaroo bee kunna le,

i ye feŋolu bee ke a koto,

7 saajiyolu niŋ ninsoolu bee,

aniŋ wulakono daafeŋolu,

8 kunoolu mennu ka yaayoo santo,

ñewolu mennu ka yaara baa kono,

aniŋ baakono daafeŋolu bee.

9 Kooni Yaawe, m̀ Maarii,

duniyaa bee ye a loŋ ne i too warata ñaameŋ.

Jabuuroolu 8