Yerusalaamu tiñaa niikuyaa
Asafu la Jabuuroo le mu.
1 Hee Alla, sii koteŋolu le dunta i la bankoo kaŋ
i ye meŋ dii ǹ na.
Ì ye i Batudulaa Senuŋo kosondi le,
ì ye Yerusalaamu ke tumbuŋo ti.
2 Ì ye i la dookuulaalu furewolu dii duwoolu le la domoroo ti,
ka i la lannamoolu suboo dii wulakono daafeŋolu la.
3 Ì ye ì yeloo boŋ Yerusalaamu kono le taariŋ,
moo maŋ tu jee meŋ si furewolu baadee.
4 Ǹ keta ǹ dandanna banku moolu ye
jutunna moolu le ti,
ì ka ǹ ñaawali ka jele ǹ na.
5 Hee Yaawe*, janniŋ muŋ tuma le mu?
Fo i be tu la kamfaariŋ m̀ fee le fo abadaa?
Fo ǹ na kuwo diminnaa be tu la i kono le ko dimbaa?
6 I la kamfaa jindi sii koteŋolu kaŋ
mennu maŋ soŋ i ma,
mansamarali bankoolu mennu buka i too kumandi.
7 Kaatu ì ye Yaakuba koomoo kasaara le,
ì ye ǹ na bankoo tumbuŋ.
8 Kana m̀ mumuñolu la junuboolu muta i kono ntolu kamma.
Balafaa ǹ ye silaŋ,
ǹ korita le las.
9 Hee Alla, ǹ na kiisoo sababoo, m̀ maakoyi,
fo i too si horoma.
Ǹ kiisa, i ye yamfa ǹ na junuboolu la,
i too la kuwo kamma la.
10 Muŋ ne be a tinna
bantala banku* moolu be a fo la ko,
“Ì la Alla lee?”
I la dookuulaalu yeloo boŋo juloo joo
bantala banku moolu to,
ǹ ñaa ye a je.
11 Mutamoolu woosiikaŋo moyi.
Ka bo niŋ i la sembe baa la,
i si moolu tankandi
jawoolu ye mennu ke saayaa daa to.
12 Maariyo, dandanna banku moolu kiliŋ-wo-kiliŋ joo siiñaa woorowula,
jutunnayaa kuwolu la, ì ye mennu tiliŋ i la.
13 Wo le to ntolu, i la saajii koorewo,
ǹ si i tentu fo abadaa.
Ǹ si tu i jayi la
ka taa fo jamaani naalaalu la.
© Mandinka Bible © Bible Society in The Gambia, 2011
