Alla ye kuu baalu mennu ke hakilibulandiraŋo
Meŋ be suukuulaa ñaatonkayaa la: Yedutuni tooyaa la, Asafu la Jabuuroo le mu.
1 Ŋa n kaŋo bula le ka kumboo Alla ye,
n wuurita fo a si i lamoyi n na.
2 Tuma meŋ m be mantooroo kono,
ŋa Maariyo le ñini,
ŋa m buloolu wulindi le ka duwaa suutoo bee,
m maŋ kori,
aduŋ n niyo maŋ laa noo.
3 Niŋ ŋa m miira Alla la, n ka kumboo le,
niŋ ŋa n hakiloo duŋ, n ka jikilateyi le.
S4 Hee Alla, i ka n ñaalu bali biti la le suutoo.
N jaakalita le fo m buka diyaamu noo.
5 Ŋa m miira kunuŋ tiloolu la beteyaa le la,
n hakiloo muruta sanji jamaa koomanto,
6 tuma meŋ n ka suutoo bee ke seewoo niŋ suukuulaa ti.
N ka n hakiloo duŋ ne,
ka m miira wo niŋ saayiŋ fatata ñaameŋ.
7 Fo Maariyo be tu la i kuntu la ǹ na le baŋ?
Fo a te hiina la ǹ ye kotenke baŋ?
8 Fo a ye i foño le
ka a la kanu bambaloo yitandi ǹ na fo fawu?
Fo a te a la laahidoolu timmandi la ǹ ye kotenke?
9 Fo Alla ye i foño le ka hiinanteeyaa baŋ?
Fo a la kamfaa le ye a tinna
a maŋ balafaa soto ǹ ye baŋ?
S10 Bituŋ n naata a fo ko,
“N na dimiŋ kuwo faŋo mu ñiŋ ne ti ko,
Alla Mansa Tallaa ye a buloo bo ǹ koto.”
11 Yaawe*, m be n hakiloo murundi la i la kuu baalu kaŋ ne,
ka m miira kaawakuwolu la
i ye mennu ke koomanto.
12 M be n hakiloo loo la kuwolu bee kaŋ ne
i ye mennu ke,
m be kali m miira la kuu baalu la le
i ye mennu ke.
13 Kooni Alla, i ye kuu-wo-kuu ke a jankuta le.
Alla koteŋ te keriŋ meŋ warata ko ite.
14 Ite le mu Alla ti meŋ ka kaawakuwolu ke.
I ye i semboo la waroo lankenemayandi
duniyaa moolu ma le.
15 I ye i la moolu kiisa i la semboo la le,
Yaakuba aniŋ Yusufa koomalankoolu.
S16 Kooni Alla, biriŋ baajiyolu ye i je
ì silata le,
fankaasoo diinoŋñaalu jarajarata le.
17 Tawaloolu ye sanjoo soo,
saŋ feteŋo kumata naŋ santo,
saŋ ŋalasoo kalabeñemaa ŋalasita karoo bee la.
18 I la saŋ feteŋo birimintinta naŋ,
i la saŋ ŋalasoolu ye duniyaa fanundi.
Bankoo jarajarata ka jiijaa.
19 I ye i la siloo bondi baa teema la,
i ye i taamadulaa ke diinoŋñaalu teema,
bari moo maŋ i siŋ noolu je noo.
20 I ye i la moolu kenkeŋ ne komeŋ koorewo,
i ye ì la kuwo duŋ Musa niŋ Haaruna le bulu.
© Mandinka Bible © Bible Society in The Gambia, 2011
