Alla le mu kiitiiteyilaa ti
Meŋ be suukuulaa ñaatonkayaa la: A si laa juloo la ì ka a fo meŋ ye ko, “Kana kasaaroo ke.” Asafu la Jabuura suukuwo le mu.
1 Hee Alla, m̀ be i tentu la,
m̀ be i tentu la famfaŋ,
kaatu i sutiyaata ǹ na le.
Moolu ka i la kaawakuwolu seyinkaŋ ne.
2 Alla ko, “Ŋa waatoo londi le,
m be kiitiiteyoo ke la niŋ tiliŋo le la.
3 Niŋ duniyaa be janjaŋ kaŋ,
aniŋ a niilamaa feŋolu bee,
nte le be a fondamaŋolu muta la
ì ye bambaŋ.
S4 M be a fo la kibirilaalu ye ko,
‘Ali kana kibiri,’
aniŋ moo kuruŋolu ye ko,
‘Ali kana ali semboo yitandi.
5 Ali kana ali semboo yitandi faŋ waroo kaŋ,
ka diyaamu kuluubaliyaa kaŋ.’ ”
6 Waroo buka bo moo ye naŋ tiliboo la
waraŋ tilijiyo la,
sako ka bo a ye keñewuloo* kono.
7 Bari Alla le ka kiitiyo teyi,
a ye doo dooyandi,
a ye doo warandi.
8 Yaawe* la kamfaa mindammaa le be a bulu,
meŋ mu a la kiitindiroo ti,
moo jawoolu kamma.
A be fuusa kaŋ wayini* fatiŋo le la.
A be a bee le kupi la,
hani tondoo te tu la,
moo kuruŋolu ye a bee miŋ.
9 Bari nte de, m be tu la a kankulaa la le,
Alla ye meŋ ke.
M be suukuwo laa la le
ka Yaakuba la Alla jayi.
10 A be moo kuruŋolu semboo bee buruka la le,
bari a be moo tilindiŋolu semboo warandi la le.
© Mandinka Bible © Bible Society in The Gambia, 2011
