Talaadaa 3
Dankeneyaa bambandiŋo
Asafu la Jabuuroo.
1 Tooñaa, Alla beteyaata Banisirayilankoolu fee le,
moolu fee mennu sondomoo seneyaata.
2 Nte de, domandiŋ n si taki,
m be naa tarabasi la,
3 kaatu n kiiliyaata faŋ wara moolu la kuwo le la,
biriŋ ŋa a je kuwo bee be sooneeyaariŋ moo kuruŋolu ye.
4 Kaatu ì buka kuu dimindiŋ soto,
ì jaatoo bambanta, a kereyaata.
5 Ì buka mantoora ko moo doolu ka ke ñaameŋ.
Bataa buka ì taki ko moo doolu.
6 Wo kamma la ì ye faŋ waroo ke kantotaa ti,
fitinoo dendikamaa be dundiŋ ì la,
7 ì ñaakesoolu la waroo be faariŋ kuu jawoo le la,
ì sondomoolu be kutindiŋ kuu kuruŋo la.
8 Ì ka jele moo koteŋolu la
ì ka kuma jawoo fo,
aduŋ ì la faŋ waroo kaŋ ì ka moolu silandi.
9 Ì ka ì daa tiliŋ santo le ka Alla sooki,
aduŋ ì ka ŋaañaa ì neŋo la taariŋ,
duniyaa moolu kono.
10 Wo ye a tinna le
Alla la moolu faŋo yelemata ka ì jayi,
aduŋ ka laa wo moolu la kumoo la
keta ì fee le ko jii miŋo.
11 Ì ye ñiŋ ne muta ko Alla te a loŋ na,
ko Mansa Tallaa te wo loŋ noo la.
12 Moo kuruŋolu be teŋ ne,
ì ka tara dahaa le kono,
aduŋ ì la sotoo ka lafaa le doroŋ.
13 Nte ŋa n sondomoo loo kuu senuŋo kaŋ ne kensenke,
aduŋ m maŋ baara junuboo la.
14 Luŋ-wo-luŋ koleyaa le ka n taki,
aduŋ n ka jarabi le fanikee-wo-fanikee.
15 Niŋ n ko m be bula la wo moolu la miirañaa nooma,
n si badali ka bo i la moolu kono.
16 Ŋa m miira le ka ñiŋ kuwo fahaamu,
bari a keta m fee kuu koleŋ baa le ti,
17 fo kabiriŋ n taata i Batudulaa Senuŋo kono,
bituŋ n naata a fahaamu
moo kuruŋolu labaŋo be ke la ñaameŋ.
18 I be ì ke la dulaa namariŋo le to,
ì la boyoo si tariyaa daameŋ,
ka ì boyindi kasaaroo kono.
19 Ì be kasaara la le waati kiliŋ,
kooroo ye ì domo,
20 ì ye ke komeŋ niŋ moo siiboota,
a la siiboo ka yeemaŋ ñaameŋ.
Wo ñaa kiliŋo ñaama, ite Maariyo,
i be jutu la ì la le komeŋ niiniyo.
21 Kabiriŋ n niyo kuyaata,
a dunta n na fo n jusoo to,
22 n keta hakilintaŋo niŋ feŋ lombaloo le ti,
n keta i ñaa koto ko beeyaŋo.
23 Bari hani wo m be sabatiriŋ i fee le,
aduŋ i ye m muta niŋ m bulubaa buloo le la.
24 I ka n kanda niŋ i la yaamaroo le la,
wo koolaa i si naa n taa,
i ye n dundi i la horomoo kono.
25 Ŋa jumaa le soto Arijana kono ite koolaa?
Aduŋ feŋ te duniyaa kono
n ñaanita meŋ na ite koolaa.
26 N jaatoo niŋ n sondomoo si kori noo,
bari n sondomoo la bambaŋo be dendiŋ Alla le la.
Ŋa ate doroŋ ne soto fo abadaa.
27 A koyita m ma le ko,
moolu mennu be jamfariŋ i la,
wolu be kasaara la le.
I be moolu buruka la le
mennu badalita i ma.
28 Bari nte fee de,
ka tara sutiyaariŋ Alla la,
wo mu n ye kuu kende le ti.
Ŋa Maarii Yaawe* le ke n jikiraŋo ti,
ñiŋ kamma la n si kuwolu fo moolu ye
a ye mennu bee ke.
© Mandinka Bible © Bible Society in The Gambia, 2011
