Keebaa kotoo la duwaa
1 Hee Yaawe*, m bambuta ite le kooma,
kana soŋ ŋa malu muumeeke.
2 N tankandi i la tiliŋo kaŋ, i ye n kanandi.
I tuloo loo n na, i ye n kiisa.
3 Ke n ye semberaŋ beroo ti,
aniŋ tata bambandiŋo, ka n kiisa,
kaatu ite le mu n na tuukuraŋo ti,
aniŋ n na tatoo.
4 Hee Alla, m bondi moo kuruŋolu bulu,
ka bo moo jawoolu niŋ tilimbaloolu la maroo to.
5 Maariyo, n jikoo mu ite le ti.
N dankeneyaata ite Yaawe le la
biriŋ n dindiŋ.
6 N jikita ite le la ka bo n wuluu waatoo la.
Ka bo tuma meŋ m be m baa wuluuñaŋo kono,
i ye n hati le.
M be tu la i jayi la le.
7 N na baluwo keta moo jamaa le ye kawandoo ti,
kaatu ite le mu n na tuukuraŋ bambandiŋo ti.
8 N daa ka tu i jayoo le kaŋ,
aniŋ ka i horoma waati-wo-waati.
9 Kana m bayi i bala n kotooriŋo la.
Kana m bula n semboo bandiŋo la.
10 N jawoolu ka kumoolu fo m ma le,
mennu be n niyo ñini kaŋ,
ì tafawuta n kamma le,
11 ka a fo ko, “Alla ye a bula le.
Ali ŋà a bayindi, ŋà a muta,
bayiri moo te a kanandi noo la.”
12 Hee Alla, kana jamfa n na.
N na Alla, naa tariyaake ka m maakoyi.
13 Allamaa n niyo toorandilaalu ye bula maloo kono,
ì ye kasaara.
Allamaa mennu ka a kata ka m mantoora,
ì ye bula maloo niŋ jutunnayaa kono.
14 Bari nte de, m be n jikoo tu la looriŋ i kaŋ ne,
aduŋ m be jayiroo lafaa la i ye le.
15 M be kali kuu kendoolu seyinkaŋ na le,
i ye mennu ke tiloo muumewo bee,
ka a fo i ye i la moolu kiisa ñaameŋ,
wo kuwolu yaatewo tambita n na londoo la ñaa-wo-ñaa.
16 Kooni Maarii Yaawe, m be i jayi la
i la keroolu la waroo kaŋ ne.
M be ite doroŋ ne la tiliŋo kankulaa la.
17 Hee Alla, i ye n karandi le biriŋ n dindiŋ,
aduŋ ka naa fo saayiŋ na,
n ka i la kaawakuwolu seyinkaŋ ne.
18 Hee Alla, hani n kotooriŋo la,
n kuntiñoo koyita ñaa-wo-ñaa,
kana i bo n to,
fo niŋ ŋa i la waroo niŋ i la semboo seyinkaŋ
jamaani naalaalu ye.
19 Kooni Alla, i la tiliŋo nakita saŋ fatoolu la le.
I ye kaawakuu baalu le ke.
Doo koteŋ te jee komeŋ ite Alla.
20 I ye bataa baa niŋ mantooroo laa n kaŋ ne,
bari i be muru la le i ye m bambandi,
ka m bondi saayaa daa to,
i ye m murundi baluwo to kotenke.
21 I be n na buuñaa lafaa la le,
aniŋ ka n jusulandi kotenke.
22 Kooni Alla, wo to le m be i jayi la
niŋ kooraa la,
kaatu i tilinta le.
M be suukuwo laa la le ka i jayi niŋ kontiŋo la,
ite Banisirayila la Senuŋ Baa.
23 M be suukuwo laa la santo niŋ seewoo le la,
ka i jayi.
N seewoota le,
kaatu i ye n niyo kumakaa le.
24 I ye tiliŋo meŋ yitandi n na,
m be tu la a seyinkaŋ na le,
kaatu i ye moolu bulandi maloo niŋ jutunnayaa kono le,
mennu ye a kata ka m mantoora.
© Mandinka Bible © Bible Society in The Gambia, 2011
