Dahaa be Alla doroŋ ne fee
Meŋ be suukuulaa ñaatonkayaa la: Yedutuni tooyaa la. Dawuda la Jabuuroo le mu.
1 N niyo la dahaa be Alla doroŋ ne fee,
n na tankoo be bo la ate le bulu.
2 N na semberaŋ beroo mu ate doroŋ ne ti,
aniŋ n na tankoo.
A mu n ye tatoo le ti,
hani n te maamaŋ na muk.
3 Janniŋ muŋ tuma le mu
ali be tu la boyi la moo kaŋ,
ali bee ye a boyindi ko tata sansaŋ laamaariŋo,
sansaŋo meŋ be cojiriŋ?
4 Ì be pareeriŋ ne doroŋ
ka a bondi a la dulaa buuñaariŋ baa to.
Faniyaa le ka ì kontaani.
Ì ka kuu kendoo duwaa ì daa le la,
bari ì ka dankaroo ke ì sondomoo kono.
S5 N niyo si dahaa soto Alla doroŋ ne fee,
kaatu n jikoo be ate le kaŋ.
6 N na semberaŋ beroo mu ate doroŋ ne ti,
aniŋ n na tankoo.
A mu n ye tatoo le ti,
hani n te maamaŋ na.
7 N na tankoo niŋ n na horomoo be looriŋ Alla le kaŋ.
N na semberaŋ bere bambandiŋo le mu,
aniŋ n tuukuraŋo.
8 Moolu, ali dankeneyaa Alla la waati-wo-waati.
Ali ali kono kuwo bee fo a ye,
kaatu ate le mu ǹ tuukuraŋo ti.
S9 Hadamadiŋo mu niijii foñoo doroŋ ne ti,
biriŋ moo baa fo moo koteŋ kenseŋ, a bee nafantaŋ.
Niŋ i ye ì laa peesaraŋo kaŋ, ì te feŋ boyi la.
Hani niijii foñoo le kuliyaata ì ti.
10 Ali kana jiki nakaroo la,
waraŋ ka faŋ waroo ke suuñaari feŋo kaŋ.
Ali la naafuloolu si lafaa ñaa-wo-ñaa,
ali kana jiki ì la.
11 Alla diyaamuta seneyaarinke le.
Ŋa ñiŋ ne moyi n tulu fuloo la ko,
semboo mu ite Alla le taa ti,
12 aduŋ Maariyo, kanu bambaloo be ite le fee.
Tooñaa, i be moo-wo-moo joo la a la baaroo la le.
© Mandinka Bible © Bible Society in The Gambia, 2011
