Ka jiki Alla la, mantooroo kono
Meŋ be suukuulaa ñaatonkayaa la: A si laa juloo la ì ka a fo meŋ ye ko, “Puraa loota yirisuŋo santo dulaa jaŋ.” Dawuda la Jabuuroo, kabiriŋ Filisitinkoolu ye a muta Kati saatewo to.
1 Hee Alla, balafaa n ye,
kaatu moolu le be n toorandi kaŋ.
N jawoolu le ka tu m mantoora la.
2 N jawoolu ka m boyinkaŋ ne waati-wo-waati.
Moo jamaa le ka n kele ì la faŋ waroo kaŋ.
3 Niŋ n silata,
n ka n jikoo sembe ite le la.
4 N laata Alla le la, aduŋ n te sila la,
n ka a jayi a la kumoo kaŋ ne.
Hadamadiŋo si muŋ ne noo nte ma?
5 N jawoolu ka tu m fokumoo yelemandi la le, ka n lañini.
Ì ka tu kuu jawoo doroŋ ne siti la n kamma.
6 Ì ka kafu ñoo ma le, ì ye biti,
ka n kekuwolu bee koroosi.
Ì ka tara n niyo le nooma.
7 Hee Alla, ì jarabi ì la kuu kuruŋolu kamma la.
Wo moolu boyindi ka bo niŋ i la kamfaa la.
8 Ite ye nte la yamali-yamaloo bee kalamuta le,
i ye n na ñaajii boŋo hapoo loŋ.
Fo a bee maŋ tara safeeriŋ i la kitaaboo kono baŋ?
9 Niŋ ŋa i kumandi tumoo meŋ na,
n jawoolu be muru la ì koo la le.
Ŋa ñiŋ loŋ ne ko, Alla be m fee le.
10-11 N laata Alla la le, aduŋ n te sila la,
n ka Yaawe* jayi a la kumoo kaŋ ne,
n ka a jayi a la kumakaŋo kaŋ ne,
hadamadiŋo si muŋ ne noo nte ma?
12 Hee Alla, m be n na laahidoolu timmandi la i ye le,
m be sadaalu* bondi la le ka i tentu,
13 kaatu i ye n tankandi saayaa ma le,
i ye n siŋo tanka takoo ma,
fo n si tara taama la ite Alla ñaatiliŋo la,
maloo kono meŋ ka baluwo dii.
© Mandinka Bible © Bible Society in The Gambia, 2011
