Yamfoo niŋ seneyaa duwaaraŋo
Meŋ be suukuulaa ñaatonkayaa la: Dawuda la Jabuuroo le mu. Tuma meŋ na Annabilayi Natani naata ka a jalayi, biriŋ a niŋ Batiseba ye jeenoo ke.
1 Hee Alla, balafaa n ye,
ka bo niŋ i la kanu bambaloo la.
I la balafaa warata le,
wo kamma la n na junuboolu tuutuu.
2 N na kuu jawoolu bee bondi,
fo ì ye seneyaa,
i ye n seneyandi ka bo n na junuboolu kono.
3 Nte ŋa n na boyidaalu loŋ ne,
aduŋ n hakiloo ka tu n na junuboolu kaŋ ne.
4 Ŋa junube kuwo ke ite doroŋ ne la,
aduŋ ŋa kuu le ke meŋ jawuyaata i ñaa koto.
Wo kamma la i boloota le ka kiitiyo laa n kaŋ,
aduŋ i la kiitiyo maŋ sootaari soto.
5 Nte wuluuta junuboo le kono,
ŋa junuboo soto le kabiriŋ m baa ye n konoo taa.
6 Ite ye konotoseneyaa niŋ tooñaa le kanu,
wo kamma la n karandi,
ka ñaameŋo ke n sondomoo kono.
7 N na junuboolu bondi, ŋa seneyaa,
n kuu, ŋa koyi fer.
8 I ye n toñonka ñaa-wo-ñaa,
m murundi seewoo niŋ jusulaa kono, ŋa seewoo.
9 Kana n juubee n na kuu jawoolu kaŋ.
N na junuboolu bee tuutuu.
10 Hee Alla, sondome senuŋo daa n kono,
i ye n saayindi kuu ka soŋ i ma.
11 Kana m bayi i ñaatiliŋo la,
aduŋ i kana i la Noora Kuliŋo bondi n kono.
12 Seewoo dii n na kotenke
i la kiisandiroo ka meŋ saabu.
M bambandi ka i la kuwo muta n niyo la.
13 Niŋ wo keta, m be junubelaalu karandi la i la siloolu la le,
aduŋ ì be ì faŋ seyi la i ma le.
14 Hee Alla, n na kiisandirilaa, yamfa n na moofaa la,
m be i la tiliŋo suukuu la le.
15 Maariyo, m firiŋ fo n si kuma noo,
aduŋ m be i jayi la le.
16 Beeyaŋ sadaalu* te i seewondi la,
tennuŋ n si ì bondi i ye.
I maŋ lafi jani sadaalu la.
17 Ite Alla lafita sadaa meŋ na,
wo le mu fammajiyo ti ka bo sondomoo kono.
Fammajiyo niŋ tuubi tooñaa be sondomoo meŋ kono,
i te balaŋ na wo to.
18 Hee Alla, konotodiyaa yitandi Siyoni* saatewo la,
i ye Yerusalaamu tata sansaŋolu seyinkaŋ loo.
19 Niŋ wo keta,
i be seewoo la sadaa sootaaribaloolu la le,
mennu mu jani sadaalu ti,
aduŋ m̀ be ninsituuraalu le bo la sadaa ti,
i la sadaajanidulaa* kaŋ.
© Mandinka Bible © Bible Society in The Gambia, 2011
