Alla la saatewo Siyoni
Kora koomalankoolu la Jabuura suukuwo le mu.
1 Yaawe* warata le!
Jayiroo ñanta wara la a ye le famfaŋ,
ntolu la Alla la saatewo kono,
meŋ be looriŋ a la konko senuŋo* kaŋ.
2 Siyoni* Konkoo niŋ a la ñiiñaa,
aniŋ a la jaŋayaa,
a mu duniyaa banku moolu bee ye
seewoo le ti.
Siyoni Konkoo, konko senuŋo,
mu Mansa Baa la saatewo le ti.
3 Alla be Siyoni Tatoo kono le.
A ye a faŋ yitandi le ko,
ate le mu ì ye tankoo ti.
4 A fele, mansoolu kafuta ñoo ma,
ka jee boyinkaŋ.
5 Bari kabiriŋ ì ye a je doroŋ,
ì teekumuta le.
Kijafaroo le ye ì muta, ì borita.
6 Jarajaroo niŋ dewuŋ baa le dunta ì la,
komeŋ niŋ tiŋo ye musoo maa,
7 ì keta komeŋ
niŋ turubaadi jawoo ye safaari kuluŋolu janjaŋ.
8 Ŋà a moyi ñaameŋ,
ǹ naata a je wo le ñaama,
Yaawe Alihawaa Maariyo* la saatewo kono,
ǹ na Alla la saatewo kono.
Alla be a londi la le fo fawu.
S9 Hee Alla, niŋ m̀ be i batu kaŋ i Batudulaa Buŋo* kono,
ǹ ka ǹ hakiloo murundi
i la kanu bambaloo le kaŋ.
10 Kooni Alla, i too bota duniyaa daŋolu to ñaameŋ,
jayiroo be i ye wo le ñaama.
I ka tiliŋo doroŋ ne taamandi
i bulubaa buloo la.
11 Siyoni moolu ye seewoo,
Yahuuda saatewolu moolu ye seewoo,
kaatu i la kiitiiteyoolu tilinta le.
12 Ali Siyoni muruŋ-muruŋ,
ali muruŋ-muruŋ a la,
ali ye a tata jaŋolu yaatee.
13 Ali a tata sansaŋolu koroosi kendeke.
Ali a tata buŋolu la kuwo kisikisi,
ñiŋ kamma ali si a fo noo jamaani naalaalu ye ko:
14 “Ñiŋ Alla mu ǹ na Alla le ti fo fawu,
ate le be ǹ kanda la fo abadaa.”
© Mandinka Bible © Bible Society in The Gambia, 2011
