Alla la waroo aniŋ a la beteyaa
1 Alitolu moo tilindiŋolu, ali seewoo Yaawe* la kuwo la,
jayiroo ñiiñaata moo tilindiŋolu le daa kono.
2 Ali kontiŋo kosi ka Yaawe jayi,
ali ye kooraa taa ka a jayi a la.
3 Ali suukuu kutoo laa a ye,
ka kooraa kosi a ye kendeke,
ali ye wuuri, seewoo kamma la.
4 Kaatu Yaawe la kumoo tilinta le,
aduŋ a ka a la keroolu bee taamandi tiliŋo le la.
5 A ye tiliŋo niŋ kiitindiri senuŋo le kanu.
A la kanu bambaloo ye duniyaa bee le beŋ.
6 Yaawe ye saŋ fatoolu daa a la kumoo le la,
tiloo, karoo, aniŋ looloolu daata a la kumakaŋo le la.
7 A ye baajiyo bee kafu dulaa kiliŋo le to,
a ye fankaasoolu duumoo bee ke jiibuŋolu kono.
8 Bankoo daafeŋolu bee si sila Yaawe la,
alitolu duniyaa moolu bee, ali a kuliyaa.
9 Kabiriŋ a kumata, duniyaa daata,
a ye yaamaroo dii, feŋo bee fintita.
10 Yaawe le ka duniyaa bankoolu la natoolu ke ì ye kenseŋo ti.
A ka ì la feeroolu janjaŋ ne.
11 Bari Yaawe la feeroolu be tu la looriŋ ne fo fawu.
A la natoolu be taama la le fo abadaa.
12 Neemoo be bankoo le ye,
meŋ na Alla mu Yaawe ti.
Seewoo be moolu le ye,
a ye mennu tomboŋ ka ke a taa ti.
13 Yaawe ka duuma juubee naŋ ne,
ka bo naŋ Arijana kono,
aduŋ a ka hadamadiŋolu bee le je.
14 Ka bo a be siiriŋ a la mansabaayaa kono daameŋ,
a ka daafeŋolu bee le juubee naŋ, bankoo kaŋ.
15 Ate le ye sondomoo duŋ ì la,
aduŋ ì ye kuu-wo-kuu baara, a ka a loŋ ne.
16 Mansa la kelediŋ kafoo la sembe waroo
buka a tinna a ye nooroo ke keloo to.
Kelejawaroo semboo la waroo
buka a tinna a ye tanka.
17 Keleraŋ suwoo maŋ ke jikiraŋ ti, ka nooroo ke keloo to.
A semboo la waroo buka tankoo saabu.
18 Yaawe ka moolu kanta le, mennu ye a kuliyaa,
mennu ye ì jikoo loo a la kanu bambaloo kaŋ.
19 A ka ì tanka kerekere saayaa ma le,
aduŋ a ka ì balundi le, konkoo waatoo la.
20 Ntolu ye ǹ jikoo loo Yaawe le kaŋ.
Ate le mu m̀ maakoyilaa ti, aniŋ ǹ tankandilaa.
21 Ǹ jusulaata ate le la kuwo to,
kaatu ǹ jikita a too senuŋo le la.
22 Yaawe, Allamaa i la kanu bambaloo ye tara m̀ fee,
bayiri ŋà ǹ jikoo sembe ite le la.
© Mandinka Bible © Bible Society in The Gambia, 2011
