Dankeneyaa suukuwo
Dawuda la Jabuuroo.
1 Yaawe* le mu n na lampoo ti, aniŋ n na tankoo,
m be sila la jumaa le la?
Yaawe le mu n na baluwo tuukuraŋo ti,
jumaa le la kuwo be n kija fara la?
2 Niŋ moo jawoolu boyita n kaŋ,
ka i baluu n suboo la,
itolu mennu mu n konnantewolu ti,
aniŋ n jawoolu
ì be taki la le, ì ye boyi.
3 Hani niŋ kelediŋ kafoo le ye n kuru,
n kija te m fara la.
Hani niŋ keloo le wulita n kamma,
wo ñaa-wo-ñaa m be dankeneyaa la le.
4 Kuu kiliŋ ŋa Yaawe daani wo le la,
aduŋ m be wo le ñiniŋ kaŋ,
ka tara sabatiriŋ a batudulaa buŋo kono
m baluu tiloolu bee la,
ka a la kallankeeyaa* fele,
aniŋ ka bankeeroo ñiniŋ a batudulaa.
5 Kaatu mantooroo luŋo la, a be n sansaŋ na le.
A be m maabo la a batudulaa suturariŋo le kono,
aduŋ a be n londi la tankaraŋ bere baa le kaŋ.
6 M be n kutu la n jawoolu la le,
mennu ye m murubeŋ,
aduŋ m be sadaalu* bo la a batudulaa to le,
n niŋ wuuroo, seewoo kamma la.
M be suukuwolu laa la le
ka Yaawe la waroo fo.
7 Yaawe, i lamoyi n na kumandiri kaŋo la,
balafaa n ye, i ye n jaabi.
8 N sondomoo ye a yitandi n na le ko,
i ye ñiŋ ne yaamari ko, “Ali n ñaañini.”
Wo to Yaawe, nte ka i ñaañini le.
9 Kana i ñaa kaasi n na.
Kana kamfaa, i ye nte i la dookuulaa bayi.
Ite le mu m maakoyilaa ti.
Hee Alla, n tankandilaa,
kana m bula, aduŋ i kana i koo dii n na.
10 Hani niŋ m baa niŋ m faa ye ì koo dii n na,
Yaawe be n taa la le.
11 Yaawe, n karandi ka taama i la siloo la,
aduŋ i si n samba sila koyiriŋo la,
n jawoolu la kuwo kamma la.
12 Kana n tu n konnantewolu sawoo to,
kaatu seedenduroolu le wulita n kamma,
aniŋ fitina kurukurulaalu.
13 N dankeneyaata le ko,
m be Yaawe la beteyaa je la le, ñiŋ duniyaa baluwo to.
14 I lamoyi Yaawe ma.
I si bambaŋ, i ye fatiyaa,
aduŋ i si i lamoyi Yaawe ma.
© Mandinka Bible © Bible Society in The Gambia, 2011
