Mantooroo waatoo duwaaraŋo
Dawuda la Jabuuroo.
1 Hee Yaawe*, ŋa n sondomoo loo ite le kaŋ.
2 N na Alla, ŋa n jikoo loo ite le kaŋ.
Kana soŋ ŋa bula maloo kono.
Kana n jawoolu bula ì ye jele n na.
3 Kana soŋ moolu mennu ka tara i baturiŋ,
wolu ye bula maloo kono,
bari moolu malundi mennu la kuruŋyaa, daliila te a la.
4 Yaawe, i la siloolu yitandi n na,
i ye n karandi n taañaa la.
5 N kanda i la tooñaa kono, i ye n karandi,
kaatu ite le mu Alla ti meŋ ka n kiisa.
N jikoo ka tu semberiŋ ite le la luŋ-wo-luŋ.
6 Hee Yaawe, kana ñina i la konotodiyaa niŋ i la kanu bambaloo la,
i ka meŋ yitandi biriŋ koomanto.
7 Kana i miira tawunteeyaa junuboolu la,
ŋa mennu ke n na fondinkeeyaa waatoo kono.
Hee Yaawe, i miira n na
i la kanu bambaloo kamma la,
aniŋ i la beteyaa.
8 Yaawe beteyaata le, aduŋ a tilinta,
wo kamma la
a ka junubelaalu karandi a la siloolu la le.
9 A ka fammajiilaalu kanda tiliŋo le kono,
aduŋ a ka ì karandi a la siloo la le.
10 Yaawe ka kuwo bee taamandi tiliŋo
niŋ kanu bambaloo le kono moolu ye
mennu ka a la kambeŋo muta,
aniŋ a la yaamaroolu.
11 Yaawe, i too kamma la yamfa n na kuu jawoolu la,
ì siyaata le.
12 Moo-wo-moo ye Yaawe kuliyaa,
a be siloo yitandi la a maarii la le,
a ñanta ka taa meŋ na.
13 Wo maarii faŋo be tu la firiŋo le kono,
aduŋ a koomalankoolu le taa be ke la bankoo ti.
14 Moolu mennu ye Yaawe kuliyaa,
wolu le mu a la jiki moolu ti,
aduŋ a ka a la kambeŋo koyindi ì ma le.
15 Ŋa n ñaa tiliŋ Yaawe doroŋ ne la ka m maakoyi,
kaatu ate le si m bondi noo
n jawoolu la kutindiŋo daa.
16 Yaawe, n juubee, i ye balafaa n ye,
kaatu n kiideeta le, aduŋ n toorata.
17 N na niitooroo lafaakuuta le.
M bondi n na mantooroo kono.
18 I miira n na mantooroo niŋ n na ŋayiboo la,
i ye yamfa n na junuboolu bee la.
19 I miira n jawoolu la siyaañaa la,
aniŋ ì ye n koŋ jawuke ñaameŋ.
20 Dukaree, n niyo kanta, i ye n tankandi.
Kana soŋ ŋa bula maloo kono,
kaatu ŋa tankoo ñini ite le bulu.
21 Allamaa n na sootaaribaliyaa niŋ n na tiliŋo ye n tankandi,
kaatu n jikoo be ite le kaŋ.
22 Hee Alla, i la moolu, Banisirayilankoolu bondi
ì la mantoora kuwolu bee kono.
© Mandinka Bible © Bible Society in The Gambia, 2011
