Mansa ye nooroo ke Alla la maakoyiroo kaŋ
Meŋ be suukuulaa ñaatonkayaa la: Dawuda la Jabuuroo le mu.
1 Hee Yaawe*, mansa jusulaata le,
kaatu i ye a bambandi le,
a seewoota baake le i la maakoyiroo kaŋ,
ka a jawoolu noo.
2 I ye a hame kuwolu dii a la le,
mennu be a sondomoo to.
I maŋ a bali kuwolu la a ye mennu ñininkaa.
S3 I ye neemafeŋ kendoolu le naati a kaŋ.
Ite le ye saniforo naafoo ke a kuŋo to
ka a toloo.
4 A ye i daani le fo a si mee,
i ye a dii a la,
meŋ keta siimaayaa baa ti.
5 A ye horoma baa soto le
ka bo niŋ i la maakoyiroo la ka a jawoolu noo.
I ye horomoo niŋ mansayaa semboo dii a la le.
6 I neemata a ma le famfaŋ, fo abadaa.
A ka jusulaa ñiŋ na le ko, i be a fee le.
7 Bayiri mansa dankeneyaata Yaawe la le,
wo to ka bo niŋ ate Alla Mansa Tallaa la kanu bambaloo la,
a te wutu la a noo to.
8 I buloo be laa la i jawoolu bee kaŋ ne.
I bulu sembemaa be laa la moolu kaŋ ne
mennu ye i koŋ.
9 Niŋ i naata, i be ì jani la le
ko fuuri dimbaa ka janiroo ke ñaameŋ.
Yaawe be ì kunuŋ na a la kamfaa baa kono le,
dimbaa ye ì domo.
10 I be ì koomalankoolu kasaara la duniyaa kono le,
ka ì turoo tumbuŋ hadamadiŋolu kono.
11 Hani niŋ i jawoolu tafawuta i kamma,
ì te ñaatotaa soto la ì la feere jawoolu to.
12 I be ì ñaato kuntu la i la kalabeñoolu le la,
ka ì murundi ì koo la.
13 Yaawe, jayiroo be i ye i la bambaŋo kaŋ.
M̀ be suukuwo laa la le ka i jayi i semboo kaŋ.
© Mandinka Bible © Bible Society in The Gambia, 2011
