Alla la horomoo niŋ waroo, a la daaroo aniŋ a la yaamaroo
Meŋ be suukuulaa ñaatonkayaa la: Dawuda la Jabuuroo le mu.
1 Saŋ fatoolu ka Alla la kallankeeyaa* bankee le,
minaayoolu ka a buloo la daaroo kankulaa le.
2 Luŋ-wo-luŋ ì ka tu diyaamoo la le,
suuto-wo-suuto ì ka londoo le feenee.
3 Ì la diyaamoo buka ke kumakaŋo ti,
ì kaŋo buka moyi.
4 Hani wo, ì la kankulaaroo ka janjaŋ duniyaa bee kono le,
aduŋ ì la kumakaŋolu ka futa duniyaa daŋolu bee le to.
Alla ye buŋo le ke tiloo ye saŋ fatoolu kono.
5 A ka finti naŋ a la buŋo kono le, komeŋ maañoo keemaa,
komeŋ niŋ borilaa be i paree kaŋ ñooseeyaa boroo la.
6 A ka wuli naŋ saŋo daŋo to le,
a ye taa fo a daŋ doo to,
aduŋ feŋ buka maabo noo a la kandoo ma.
7 Yaawe* la yaamaroo timmata le,
a ka niyo bambandi kuu le.
Yaawe la karandiroo koyita le,
a ka kunimbaloo ñaamendi le.
8 Yaawe la yaamaroolu tilinta le,
ì ka jusulaa le dii.
Yaawe la luwaalu seneyaata le,
ì ka hakiloo la jeroo fanundi le.
9 Yaawe ñaasilaŋo mu kuu kendoo le ti,
a be tu la le fo abadaa.
Yaawe la luwaalu mu tooñaa le ti,
aduŋ ì bee le ka tiliŋ.
10 Itolu le mu ñaanitaa ti ka tambi sanoo la,
hani saniforoo.
Itolu le diyaata ka tambi liyo la,
meŋ ka suleŋ lii kaañoo bala.
11 Wo koolaa, ì ka nte i la dookuulaa kalamutandi le,
aniŋ fanaa joori baa le be ì mutoo to.
12 Jumaa le ka a faŋo la boyidaalu je noo?
Yaawe, yamfa n na sootaaroolu ma, m maŋ mennu kalamuta.
13 N tanka tawunteeyaa junube kewo ma.
Kana m bula ŋa tara wolu la maroo to.
Wo le to n te sootaari soto la,
aduŋ n si seneyaa junube kuu jawoolu to.
14 Hee Yaawe, ite le mu n na semberaŋ beroo ti,
aniŋ m bondilaa.
Allamaa n daakumoolu niŋ n sondomoo kono miiroolu
ye ke i ñaa koto mutataa ti.
© Mandinka Bible © Bible Society in The Gambia, 2011
