Jayiri suukuwo
1 Ali Yaawe* jayi.
Ali Yaawe jayi ka bo Arijana kono santo.
Alitolu mennu be alihawaa kono, ali a jayi.
2 A la malaayikoolu bee, ali a jayi.
Alihawaa kono sembemaalu, ali a jayi.
3 Karoo niŋ tiloo, ali a jayi.
Looloolu mennu ka mala, ali a jayi.
4 Saŋ fatoo daŋolu,
aniŋ jiyolu mennu be saŋ fatoolu ye santo la,
ali a jayi.
5 Daaroo bee, ali Yaawe jayi a too la,
kaatu ate le ye ali daa ka bo niŋ a la kumoo la.
6 A ye ali londi le fo abadaa.
A la kaŋo kaŋ ali te bo la ali ñaama.
7 Ali Yaawe jayi ka bo bankoo kaŋ.
Baakono daafeŋ baalu aniŋ fankaasoo duumoolu bee,
8 ka taa saŋ ŋalasoo niŋ saŋ beroo,
komboo niŋ tawaloolu, aniŋ turubaadoo,
mennu ka a la yaamaroolu taamandi,
ali a jayi.
9 Konkoriŋ, konko baa,
yiri dinnaalu, sedari* yiroolu bee,
ali a jayi.
10 Wulakono daafeŋolu niŋ beeyaŋolu,
kuruntu feŋolu ka taa kunoolu bee, ali a jayi.
11 Duniyaa mansoolu niŋ siyolu bee,
maralilaalu niŋ kiitiikuntulaalu, ali a jayi.
12 Dindiŋ, keebaa,
musu kafuriŋ kee, ali a jayi.
13 Daaroo bee, ali Yaawe jayi a too la,
kaatu a too le warata doo koteŋolu bee ti.
A la kallankeeyaa* le tambita feŋo bee la,
biriŋ bankoo kaŋ fo saŋo ye santo la.
14 A ye semboo dii a la moo tilindiŋolu la le,
meŋ keta a la moolu ye horomoo ti,
wo le mu Banisirayilankoolu ti, mennu sutiyaata a la.
Ali Yaawe jayi.
© Mandinka Bible © Bible Society in The Gambia, 2011
