Alla la waroo niŋ a la beteyaa
Jayiri suukuwo. Dawuda la Jabuuroo le mu.
1 Alla, n na Mansa, m be i la waroo suukuu la le,
ŋa i tentu i too la fo abadaa.
2 Luŋ-wo-luŋ m be i tentu la le,
ŋa i jayi i too la fo abadaa.
3 Yaawe* warata le, a ñanta jayi la le famfaŋ,
a la waroo tambita sumaŋo la le.
4 Yaawe, jamaani-wo-jamaani be i la keroolu kidimandi la le,
ì be kali i la kaawakuu baalu seyinkaŋ na le.
5 Ì be i la horomoo fo la le,
aniŋ i la mansayaa semboo,
nte be m miira la i la kaawakuwolu la le.
6 Moolu be a saata la le,
i la kaawakuu baalu silaŋo warata ñaameŋ,
nte be i la waroo kankulaa la le.
7 Ì be i la beteyaa baa seyinkaŋ na le,
ì ye i la tiliŋo laa suukuwo ti.
8 Yaawe hiinanteeyaata le, aduŋ a la balafaa warata,
a buka kamfaa juuna,
a la kanu bambaloo maŋ dandulaa soto.
9 Yaawe beteyaata moo bee le fee,
a ka balafaa soto a la daafeŋolu bee le ye.
10 Yaawe, i la daafeŋolu bee be i jayi la le,
i la lannamoolu bee ye i tentu.
11 Ì be i la mansayaa la horomoo fo la le,
aniŋ i la semboo,
12 ka hadamadiŋolu londi i la kaawakuu baalu la,
aniŋ i la mansayaa horomoo la waroo.
13 I la maraloo be tu la le fo abadaa,
i la noo ye tu jamaanoolu bee la.
Yaawe ka tu tilindiŋ a la laahidoolu kaŋ ne,
a ka balafaa yitandi a la keroolu bee to.
14 Yaawe ka moolu maakoyi le
mennu be boyoo daa to,
a ye moolu sikandi mennu be jirandiŋ.
15 Niilamaa bee jikoo be looriŋ ite Yaawe le kaŋ,
i ka domoroo dii ì la a waatoo le la.
16 I ka a dii ì la le a ye sii,
i ye a dii ì la burayi.
17 Yaawe tilinta a kekuwolu bee le to,
a ka balafaa yitandi a la keroolu bee to.
18 Yaawe be sutiyaariŋ moolu la le mennu ka a kumandi,
mennu ka a kumandi sondome seneyaa kono.
19 A ka moolu bee la suuloo timmandi le, mennu ye a kuliyaa.
A ka ì la woosiyolu moyi le, a ye ì tankandi.
20 A ka moolu bee kanta le mennu ye a kanu,
bari a be moo kuruŋolu bee kasaara la le.
21 Wo to, nte be tu la Yaawe jayi la le.
A la daafeŋolu bee, ali a tentu a too senuŋo la fo abadaa.
© Mandinka Bible © Bible Society in The Gambia, 2011
