Duwaaraŋo ka tanka fitina moolu ma
Meŋ be suukuulaa ñaatonkayaa la: Dawuda la Jabuuroo le mu.
1 Hee Yaawe*, m bondi moo jawoolu bulu,
n tanka fitina moolu ma.
2 Ì ka kuu jawoolu le feere ì hakiloo kono,
aduŋ ì ka tu keloo le kurukuru la.
3 Ì neŋolu be le ko saa saŋarariŋo,
ì la kumoolu be ko biidaa kunoo.
S4 Hee Yaawe, n kanta moo kuruŋolu la karoo la.
N tanka fitina moolu ma,
mennu ka feeroo siti ka m boyindi.
5 Faŋ waralaalu ye kutindiŋolu le laa n kamma,
ì ye jaloolu laa n kamma,
ì ye wereŋolu laa sila jenjeŋo la.
S6 Yaawe, n ko ite le mu n na Alla ti.
Hee Yaawe, i lamoyi n na duwaa la,
m be maakoyiri ñiniŋo le la.
7 Yaawe, m Maariyo, n na kiisandirilaa sembemaa,
ite le ye n tankandi kele luŋo kono.
8 Hee Yaawe, kana moo kuruŋolu lafinna kuwo ke ì ye,
kana soŋ ì ye ñaatotaa soto ì la feere jawoolu to,
niŋ wo nte, ì si ì sañoolu wulindi.
S9 Moolu mennu ye m murubeŋ,
ì daalu ka mantooroo meŋ saabu,
a ye kupi ì faŋolu kuŋo kaŋ.
10 Allamaa dimbaa wuleŋo ye kupi ì kaŋ.
Allamaa ì ye boyi dinkoo kono,
ì kana wuli noo kotenke.
11 Allamaa moo neŋ fatiŋolu kana ñaatotaa soto
ñiŋ bankoo kaŋ.
Allamaa kuu jawoo ye tu fitina moolu teerindi la,
ka ì kasaara.
12 Yaawe, ŋa a loŋ ne ko,
ite le ka loo moo bataariŋolu la kiitiyo la,
aniŋ fentaŋolu la boloo ye.
13 A be koyiriŋ ne ko,
moo tilindiŋolu be ite Yaawe tentu la le.
Lannamoolu be tara la sabatiriŋ i fee le.
© Mandinka Bible © Bible Society in The Gambia, 2011
