Feŋ buka maabo noo Alla ma
Meŋ be suukuulaa ñaatonkayaa la: Dawuda la Jabuuroo le mu.
1 Yaawe*, i ye n kusonsoŋ ne,
aduŋ i ye n loŋ ne.
2 I ye n siitoo niŋ n lootoo loŋ ne.
I niŋ n teemoo jamfata ñaa-wo-ñaa,
i ye n na miiroolu bee kalamuta le.
3 I ka m fintitoo aniŋ n duntoo bee koroosi le,
aduŋ i ka n taaraŋ siloolu bee fahaamu le.
4 Hani janniŋ m be kumoo fo la, meŋ be n to,
ite Yaawe ye a loŋ ne fokabaŋ.
5 I ye n sansaŋ kooma niŋ ñaato bee le la,
aduŋ i ye i buloo laa n kaŋ ne ka n tanka.
6 I ye loŋo meŋ ke n na,
a kaawakuuyaata m fee le,
a tambita n kunna le,
n na fahaamuroo maŋ futa a ma.
7 N si taa noo mintoo le ka kana i ma?
N si bori noo mintoo le i te daameŋ?
8 Hani niŋ n seleta saŋo le santo,
i be jee le.
Niŋ ŋa n laa kaburu dinkoo kono, i be jee le.
9 Hani niŋ ŋa dampaŋo le soroŋ,
n tiita ka taa tiloo ka bo daameŋ to,
waraŋ ka taa fankaasoo daŋo to,
10 i be tara la jee le ka n kanda,
aniŋ ka m muta niŋ i bulubaa buloo la.
11 Hani niŋ n ko diboo le ye m muuri,
waraŋ m be maloo meŋ kono, a ye ke suutoo ti,
12 diboo maŋ dibi ite fee,
aduŋ suutoo ka mala i ye le ko tiloo,
kaatu diboo mu ite fee maloo le ti.
13 Feŋ-wo-feŋ be n kono, ite le ye a daa.
Ite le ye n coki ñoo bala m baa wuluuñaŋo kono.
14 Ŋa i tentu le, kaatu i ye n daa ñaameŋ,
a jaakaloo warata le,
aduŋ a kaawakuuyaata.
I la keroolu tambita n kunna le.
Nte ye wo loŋ ne kendeke.
15 M muluŋo maŋ maabo i ma,
kabiriŋ i ye n daa kulloo kono kuuke,
biriŋ m be daa la ñoo bala m baa wuluuñaŋo kono.
16 I ye m meremmaa je le.
I ye luŋolu mennu londi n ye,
ì bee safeeta i la kitaaboo kono le,
hani janniŋ kiliŋ be dati la.
17 Kooni Alla, i la miiroolu kuliyaata n na fahaamuroo ti le,
n te ì daŋo bondi noo la.
18 N te ì yaatee noo la,
kaatu ì be siyaa la bankumunkoo ti le.
Niŋ n wulita, hani ka bii i be m fee le.
19 Hee Alla, n diinoo niŋ n sawoo,
i ye moo kuruŋolu faa,
aniŋ ka moofaalaalu bayi m bala.
20 Ì ka i sooki niŋ kuu jawoolu le la,
ì ka kuma jawoolu le fo i ma.
21 Yaawe, nte ye moolu koŋ ne,
mennu ye ite koŋ,
aduŋ n ñewunta moolu la le,
mennu ka balaŋ i ma.
22 Ŋa ì koŋ jawuke le,
ŋa ì muta le ko n jawoolu.
23 Kooni Alla, n kusonsoŋ ka n sondomoo kono loŋ.
N kotobo ka n na miiroolu loŋ.
24 A juubee fo kuu jawu si tara n kono,
aduŋ i si n kanda siloo kaŋ, meŋ be labaŋ na fo abadaa.
© Mandinka Bible © Bible Society in The Gambia, 2011
