Jawoolu kiitindoo niŋ ì la jaraboo duwaa
Meŋ be suukuulaa ñaatonkayaa la: Dawuda la Jabuuroo.
1 Hee Alla, n ka ite meŋ jayi,
kana tu deyiriŋ.
2 Kaatu moo kuruŋolu le ye ì daalu tiliŋ n na,
aniŋ faniyaa folaalu,
ka faniyaa kumoolu fo m ma.
3 Ì ka n kuru niŋ konnanteeyaa kumoolu le la,
aniŋ ka m boyinkaŋ, daliila te a la.
4 N na ì kanoo ñaa-wo-ñaa,
ì ka n tuumi le,
bari nte de, fo n ka duwaa meŋ ke ì ye.
5 Ì ka n na kuu kendoo joo kuu jawoo le la,
aniŋ ka n na kanoo joo konnanteeyaa la.
6 Moo tilimbaloo wulindi n jawoo kamma kiitiyo la,
i ye tuumirilaa jawoo londi a kamma.
7 Allamaa niŋ ì ye a kiitindi, a ye boyi.
Allamaa a la duwaa ye ke a ye junuboo ti.
8 Allamaa a baluu tiloolu ye dooyaa,
moo doo ye a la dookuu palaasoo taa.
9 Allamaa a diŋolu ye ke aliyatiimoolu ti,
a la musoo ye ke furuyaamusoo ti.
10 Allamaa a diŋolu ye yaayi ka sadaa daani.
Allamaa ì ye ì bayi ka bo ì la suu tumbundiŋolu to.
11 Allamaa kanindirilaa ye a la sotofeŋolu bee taa.
Allamaa a ye meŋ bee dookuu, luntaŋolu ye a ñapinkaŋ.
12 Allamaa moo kana konotodiyaa yitandi a la,
sako ka balafaa a diŋolu ye, a ye mennu tu.
13 Allamaa a koomoo ye buruka fereŋ.
Allamaa a too kana tu jamaani naalaa kono.
14 Allamaa Yaawe* ye a la alifaa foloolu la junuboo muta a kono,
aduŋ a baamaa la junuboo kana tuutuu.
15 Allamaa Yaawe ye ì tu mutariŋ a kono,
moo hakili kana bula itolu la fereŋ.
16 Bayiri ate maŋ i miira ka konotodiyaa yitandi,
a ka fuwaaroolu le toorandi,
sembentaŋolu, aniŋ moo jikilateyiriŋolu,
ka ì faa.
17 A ye ñiŋ ne kanu ka dankaroo ke,
Allamaa a danka la.
A buka lafi ka neemoo ŋaniya,
Allamaa a jamfa la a la.
18 A ye dankaroo le ke a la dendikoo ti,
Allamaa a ye duŋ a baloo la komeŋ jiyo,
a ye duŋ a kuloolu kono komeŋ tuloo.
19 Allamaa a ye ke a bala ko a la duŋ feŋo,
a ye tu minindiŋ a la ko a la teesitiraŋo.
20 Allamaa wo ye ke n tuumilaalu la joo ti
ka bo Yaawe bulu,
wolu mennu ka kuma jawoolu fo m ma.
21 Bari ite Yaawe, m Maariyo si loo n na kuwo la,
i too kamma la.
I la kanu bambaloo niŋ i la beteyaa kaŋ,
n tankandi.
22 Nte mu fuwaaroo le ti, aniŋ sembentaŋo,
aduŋ m be toorariŋ n sondomoo kono le.
23 M be yeemaŋ kaŋ ne ko wulaara niiniyo.
N ka munta le ko kuntiŋo,
ì ka meŋ konkoŋ a ye joloŋ.
24 N kumbaliŋolu korita le suŋo kamma la.
M baloo bee borita fo n jaata kos.
25 N keta n tuumilaalu ye jelefeŋo le ti.
Niŋ ì ye n je, ì ka ì kuŋolu le jiijaa ka n ñaawali.
26 Hee Yaawe n na Alla, m maakoyi,
i ye n kiisa i la kanu bambaloo kaŋ.
27 Ì kalamutandi ñiŋ na ko, ite le ye a ke,
ite Yaawe le ka n kiisa.
28 Ì ye n danka ñaa-wo-ñaa, ite si neema m ma.
Niŋ ì ye m boyinkaŋ, ì si bula maloo kono,
aduŋ nte, i la dookuulaa, si seewoo.
29 Allamaa jutunnayaa ye feenee n tuumilaalu kaŋ.
Allamaa ì faŋolu la maloo ye ke ì bala ko dendikoo.
30 M be tenturoo dii la Yaawe la baake le.
M be a jayi la jamaa teema le,
31 kaatu a ka loo sembentaŋolu la kuwo la le,
ka ì kiisa kiitiikuntulaa jenkeriŋolu bulu
mennu ka ì faa.
© Mandinka Bible © Bible Society in The Gambia, 2011
