Alla tentoo a la beteyaa kaŋ
Dawuda la Jabuuroo.
1 Nte niyo be Yaawe* jayi la le.
Ka bo niŋ n sondomoo bee la,
m be a too senuŋo jayi la le.
2 Nte be Yaawe jayi la le de,
aduŋ n te ñina la a ye kuu betoolu mennu ke.
3 Ate le ka n na junuboolu bee kafari,
aduŋ a ka n na kuuraŋolu bee kendeyandi.
4 A ye n tanka kaburoo ma,
aduŋ a ka tu kanu bambaloo niŋ balafaa le yitandi n na.
5 A ka n wasandi beteyaa doroŋ ne la,
ka n na fondinkeeyaa kutayandi,
komeŋ niŋ duwaforoo ye i wooci.
6 Yaawe le ka kiitiyo teyi moolu bee ye,
mennu be mantooroo kono,
ka ì la boloo dii ì la.
7 A ye kuwolu lankenemayandi Musa ye le,
a lafita mennu ke la,
aduŋ a ye a la kaawakuu baalu yitandi Banisirayilankoolu la le.
8 Yaawe balafaa warata le,
a hiinanteeyaata.
A buka kamfaa juuna,
a la kanu bambaloo maŋ dandulaa soto.
9 A buka tu a la moolu jalayi la,
sako ka tu kamfaariŋ ì kamma fo abadaa.
10 A buka ǹ sanka ko a ñanta ñaameŋ,
hani wo a ka ǹ jarabi ǹ na junuboolu kaŋ ne,
aniŋ ǹ na hakoolu.
11 Saŋ fatoolu be warariŋ santo bankoo kunto ñaameŋ,
a la kanu bambaloo be warariŋ moolu ye wo le ñaama,
mennu ye a kuliyaa.
12 Tilibo niŋ tilijii be jamfariŋ ñoo la ñaameŋ
a ye ǹ na junuboolu jamfandi ǹ na wo le ñaama.
13 Wuluufaa konotoo ka diyaa a diŋolu fee ñaameŋ,
Yaawe konotoo ka diyaa moolu fee wo le ñaama,
mennu ye a kuliyaa.
14 A ye a loŋ ne ǹ daata ñaameŋ,
a ye a loŋ ne ko ntolu mu bankumunkoo le ti.
15 Hadamadiŋo la baluwo ka munta le ko ñaamoo.
A ka soroŋ ne komeŋ wulakono firoo,
16 niŋ foñoo ye a fee, a ye taa,
aduŋ moo te a noo je la fereŋ.
17 Bari Yaawe la kanu bambaloo ka tu moolu ye le,
mennu ye a kuliyaa,
fo abadaa.
A ka tu beteyaariŋ jamaani-wo-jamaani moolu fee le,
18 mennu ye a la kambeŋo muta,
ì ka tu tilindiŋ a la yaamaroolu kaŋ.
19 Yaawe ye a la mansasiiraŋo londi Arijana kono le,
aduŋ ate le mu daafeŋolu bee la Mansa ti.
20 Alitolu malaayika sembemaa baalu,
mennu ka i lamoyi a la kumoo la,
ka a la yaamaroolu bee taamandi,
ali Yaawe jayi.
21 Alitolu alihawaa kono sembemaalu,
a la dookuulaalu, mennu ka a la lafoo ke,
ali Yaawe jayi.
22 Yaawe la daafeŋolu bee si a jayi daa-wo-daa,
a la mansabaayaa kono.
Nte niyo be Yaawe jayi la le.
© Mandinka Bible © Bible Society in The Gambia, 2011
