Ñaameŋo nafaa
1 Dindiŋolu, ali i lamoyi ali faamaa la yaamaroo la,
ali si ali hakilitu, fo ali si a fahaamu kendeke.
2 Ŋa karandiri betoo le dii ali la,
wo to ali kana n na yaamaroo tu jee.
3 Kabiriŋ n keta kambaanendiŋo ti m faamaa la buŋo kono,
m be dindiŋyaariŋ, aduŋ nte dammaa le mu m baamaa diŋo ti,
4 m faamaa ka n karandi le, a ka a fo n ye ko,
“N na kumoo muta i sondomoo kono,
i ye n na yaamaroo nooma, wo le be i balundi la.
5 Ñaameŋo niŋ fahaamuroo ñini,
kana ñina n na kumoolu la,
waraŋ ka i koo dii ì la.
6 Kana ñaameŋo bula jee, a be i tankandi la le,
a kanu, wo to le a be i kanta la.
7 Ñaameŋo kummaayaata le, wo to ñaameŋo ñini,
i be kuu-wo-kuu to, fahaamuroo ñini.
8 A buuñaa kendeke, wo to le a be i sikandi la.
A muta i bulu fuloo la, a si naa horomoo dii i la.
9 A be ñara ñiimaa le ke la i kuŋo bala,
aniŋ sani naafa ñiimaa.”
Yaamaroo ka bula sila kendoo nooma
10 N diŋo, i lamoyi n na,
aduŋ i si n na kumoolu muta,
fo i la baluwo kono, i si siimaayaa soto.
11 Ŋa i karandi ñaameŋo siloo la le,
aduŋ ŋa i tilindi sila kendoo le kaŋ.
12 Niŋ i taamata, feŋ te tara la i siŋolu ñaato,
aduŋ niŋ i borita, i te taki la.
13 Kana soŋ yaamaroo ye kana i ma,
a kanta, kaatu ate le mu i la baluwo ti.
14 Kana duŋ moo kuruŋolu la kuwolu kono,
aduŋ kana taama niŋ kuu jawu kelaalu la siloolu la.
15 Kana soŋ ì la, i kana duŋ ì kono,
i ñaa kaasi ì la, i ye tenteŋ i la siloo la.
16 Kaatu ì buka siinoo noo, fo niŋ ì ye kuu kuruŋo ke.
Siinoo ka ì korindi le, bari fo ì ye moo toorandi foloo.
17 Bayiri jawuyaa ka munta ì fee le ko domoroo,
fitinoo ko miŋ feŋo.
18 Moo tilindiŋo la siloo ka fanu le ko siilimboo
meŋ ka fanu-fanu laalaa tiloo muumewo la.
19 Bari moo kuruŋolu la siloo ka munta le ko dibi baa,
ì buka a loŋ ì ka taki mennu la.
20 N diŋo, i tuloo loo m fokumoolu la,
i ye i hakiloo tu ì to.
21 Kana soŋ ì ye bo i la karoo la,
ì maabo i sondomoo kono,
22 kaatu mennu ka ì ñini, a ka ke ì ye siimaayaa le ti,
aniŋ jaatikendeyaa, hadamadiŋo balajaatoo muumee bee ye.
23 I sondomoo kanta ka tambi feŋo bee la,
bayiri ate le mu duniyaa sambaraŋo ti.
24 Kana kuma jawoo fo moo ma,
aduŋ i kana faniyaa fo.
25 I si tara tilindiŋ tooñaa la,
kana soŋ a ye bo i la karoo la.
26 Tara sila tilindiŋo kaŋ,
i la hame kuwolu si naa sooneeyaa.
27 Kana jenke bulubaa waraŋ maraa la,
i faŋo tankandi kuu kuruŋo ma.
© Mandinka Bible © Bible Society in The Gambia, 2011
