Yaamaroolu ka laa Alla la, aniŋ ka a buuñaa
1 N diŋo, kana ñina n na karandiroo la,
aduŋ i si n na yaamaroolu muta i sondomoo kono.
2 Kaatu a be baluu tili jamaa le dii la i la,
aniŋ kayiroo meŋ maŋ dandulaa soto.
3 Kana soŋ kanu bambaloo niŋ tooñaa ye ì koo dii i la,
ì ke kantotaa ti, i ye ì tu i sondomoo kono.
4 Wo to le i be maakoyiroo niŋ too diyaa soto la,
Alla niŋ moolu la karoo la.
5 Laa Yaawe* la niŋ i sondomoo bee la,
kana jiki i fansuŋ miiroolu la.
6 Niŋ i be sila-wo-sila taama la, i si soŋ a ma,
a be i londi la sila tilindiŋo le kaŋ.
7 Kana i faŋo muta moo ñaamendiŋo ti,
sila Yaawe la, i ye fata kuu kuruŋ kewo la.
8 Wo be ke la i ye kendeyaa le ti,
a ye ke i ye booroo ti ka i bambandi.
9 I si Yaawe buuñaa i la sotofeŋolu to,
ka taa i la fiifeŋ kuŋ foloolu bee to,
10 wo to le i la buntuŋolu be faa la tep,
aduŋ i la barikoolu be tara la fuusariŋ niŋ wayinoo* le la.
11 N diŋo, kana jutu Yaawe la kuluuroo la,
waraŋ ka pasi a la dandalaaroo la,
12 kaatu Yaawe ye mennu kanu, a ka wolu le kuluu,
komeŋ faa ka a kanu diŋo kuluu ñaameŋ.
Ñaameŋo le mu nafaa feŋ baa ti
13 Barakoo be moolu le ye,
mennu ye ñaameŋo ñini, ì ye a soto,
aniŋ moolu mennu ye kalamutaroo ke.
14 Kaatu ka a soto, wo le kummaayaata ka tambi kodiforoo la,
a tinewo fisiyaata sanoo ti.
15 Ate le kummaayaata ka tambi luuluwo la,
aduŋ i lafinna feŋ te jee, a niŋ meŋ si tembe.
16 Siimaayaa be a bulubaa buloo kono,
naafuloo niŋ buuñaa be a maraa buloo kono.
17 A la siloolu diyaata le,
aduŋ ì bee ka ke kayira siloolu le ti.
18 Moolu mennu ye a muta kuu, a ka ke wolu ye baluwo yiroo le ti,
mennu ye a muta kendeke, be neemoo soto la le.
Alla la ñaameŋo daaroo to
19 Ka bo niŋ ñaameŋo le la, aniŋ fahaamuroo,
Yaawe ye saŋo niŋ bankoo daa.
20 A la londoo le ka bankoo duuma jiyo fintindi,
minaayoo ka komboo jindi.
Yaamari tooñaa
21 N diŋo, kana soŋ fahaamuroo
niŋ kekuu loŋo ye kana i ma.
22 Ì be ke la i ye duniyaa sambaraŋo le ti,
aniŋ kantotaa i kaŋo bala.
23 Wo to i be tara la kantariŋ i la siloolu kaŋ ne,
aduŋ i siŋo te taki la.
24 Suutoo niŋ i be laariŋ, i te sila la,
aduŋ i si siinoo diyaariŋo soto.
25 Kana sila barambarantoo maasiiboo la,
waraŋ mantooroo, meŋ laata moo kuruŋo kaŋ.
26 Kaatu Yaawe le be ke la i jikoo ti,
aduŋ a te soŋ na kutindiŋo ye i siŋo muta.
27 Kana balaŋ ka moo maakoyi,
meŋ jarita ka deemaaroo soto,
niŋ i ye semboo soto.
28 Niŋ feŋ be i bulu wo loo to, kana a fo i siiñoo ye ko,
“Taa fo ñaato, saama m be a dii la i la le.”
29 Kana feere jawoo siti i siiñoo kamma, meŋ laata i la,
ali bee be sabatiriŋ ñoo daala.
30 I niŋ moo kana sonka daliila te a la,
niŋ a maŋ feŋ ke i la.
31 Kana fitinamoo kiiliyaa,
aduŋ kana taama a la sila-wo-sila la,
32 kaatu Yaawe tanoo le mu moo kuruŋo ti,
bari moo tilindiŋo ka tara a la jiki moolu le kono.
33 Yaawe la dankoo be moo kuruŋo la buŋo kono le,
bari a ka neemoo jindi moo kendoo ye le.
34 Ñaawalilaalu, a ka jutunnayaa samba wolu le kaŋ,
bari mennu ye i fammajii, a ka hiina wolu ma le.
35 Ñaamendiŋolu be horomoo keetaa la le,
bari toolewolu, wolu taa mu maloo le ti.
© Mandinka Bible © Bible Society in The Gambia, 2011
