Musu sotoo mu kuu kendoo le ti
1 Moo meŋ ye a faŋo bondi moolu kono,
ka tara a faŋo la kuwo dammaa le to,
a buka fahaamuru soto.
2 Fahaamuroo buka diyaa toolewo ye,
bari a ka lafi le ka a fansuŋ miiroolu fo.
3 Niŋ jawuyaa naata, jutunnayaa fanaa ka naa le,
aduŋ horomantaŋyaa, maloo ka soto wo le to.
4 Moo fokumoo diinonta baake le,
aduŋ ñaamentoo kumoo mu woyoo le ti,
meŋ jiyo ka tu bori la.
5 A maŋ ke sila ti, ka laa moo jawoo kaŋ,
waraŋ ka boloo buusi moo bulu meŋ maŋ feŋ ke.
6 Toolewo daakumoo le ka sonkoo naati a ye,
aduŋ a fokumoo le ka buuteeroo saabu a ma.
7 Toolewo diyaamuñaa le ka a kasaara,
aduŋ a neŋo le mu a faŋo ye kutindiŋo ti.
8 Koomakumaroo ka munta le ko domori diimaa,
a ka diyaa moo daa kono le.
9 Moo meŋ katoo koleyaata a fee a la dookuwo to,
a niŋ tiñaarilaa bee be konti kiliŋ ne.
10 Yaawe* too mu tata bambandiŋo le ti,
moo tilindiŋolu ka bori jee le, aduŋ ì ka tanka le.
11 Fankamaalu fee, ì la naafuloo mu saatee bambandiŋo le ti,
aduŋ ì ye a miira le ko, a ka muluŋ sansaŋ jaŋo le la.
12 Janniŋ moo ka duŋ kasaaroo kono, a ka a faŋo wara le,
janniŋ moo ka buuñaa soto, fo a ye a fammajii foloo.
13 Moo meŋ ka jaabiroo ke a maŋ i lamoyi,
wo mu wo maarii la tooleeyaa niŋ a la maloo le ti.
14 Niŋ moo niyo be laariŋ, a ka a maakoyi le niŋ a saasaata,
bari niitooroo muñoo koleyaata le.
15 Moo meŋ ye kuwolu bo noo ñoo to, wo ka lafi londi ñinoo le la,
aduŋ moo ñaamendiŋo le ka lafi a moyi la.
16 Soorifeŋo ka siloo le yele a diilaa ye,
aduŋ a be a maakoyi la le, ka moo kummaa je.
17 Moo meŋ foloo ye kumoo saata kiitiyo kono,
ka muluŋ ne ko, a ye tooñaa le fo,
bari fo niŋ a mooñoo fanaa diyaamuta.
18 Alikuuri* fayoo si sonkoo daa faa noo le,
aduŋ ate le ka sembemaalu la kuwolu bo ì ye ñoo to.
19 Niŋ i ye kuu dimindiŋo ke i baadiŋo la,
a ka munta le ko, tatoo le be ali teema,
sonkoo ka talaañaa jawu le naati moolu teema.
20 Niŋ i daa ye i duŋ ka kuma-wo-kuma fo,
i be a tinewo soto la le.
21 Niŋ i ye kumoo fo,
a si ke noo kuma kendoo ti le, waraŋ moofaa kuwo.
Wo to niŋ i fokumoo ye a tinna i ye kuu soto,
i ñanta soŋ na a la le.
22 Musu sotoo mu kewo fee kuu kendoo le ti,
aduŋ a ka maakoyiroo soto Yaawe bulu le.
23 Fuwaaroo ka yamfoo daani le,
bari fankamaa, wo ka moo jaabi saŋarake le.
24 Moo meŋ teeroo siyaata, a ka labaŋ kasaara la le,
bari teeroo ka tara jee le, meŋ sutiyaata i la ka tambi i baadiŋo la.
© Mandinka Bible © Bible Society in The Gambia, 2011
