Lampoolu looñaa
1 Yaawe* diyaamuta Musa ye ko, 2 “A fo Haaruna ye, niŋ a be ñiŋ lampu woorowuloo londi la lampu looraŋo kaŋ, a si a ke niŋ ñaa la meŋ si a tinna ì la maloo si lampoolu ñaato la bitaa.”
3 Haaruna ye wo le ke, a ye lampu looraŋo lampoolu londi ñaa le la, ì la maloo si lampoolu ñaato la bitaa, ko Yaawe ye Musa yaamari a la ñaameŋ. 4 Ñiŋ lampu looraŋo, a dadaata teŋ ne: a dadaata sani tunkandiŋo le la, ka bo a juwo to fo firoolu be a daameŋ. A dadaata ñaa le la, ko Yaawe ye a yitandi Musa la ñaameŋ.
Ka Lewi lasiloo moolu seneyandi Yaawe la karoo la
5 Yaawe ko Musa ye ko:
6 Lewi lasiloo moolu taa Banisirayilankoolu kono, i ye ì seneyandi. 7 Ka ì seneyandi, i be seneyandiraŋ jiyo le taa la, i ye a sari ì kaŋ. Bituŋ ì ye ì balatiyolu bee lii, ì ye ì la duŋ feŋolu kuu. Ì be seneyaa la wo le ñaama. 8 Ì ye tuuraariŋo bo a niŋ a siimaŋ sadaa* meŋ mu fariña kendoo ti, meŋ niŋ olifu* tuloo ñaamita. Bituŋ ite faŋo ye tuuraariŋ fulanjaŋo bo ka ke junube kafarilaŋ sadaa ti. 9 Lewi lasiloo moolu samba naŋ Bendulaa Tiriliisi Senuŋo* ñaatiliŋo la, i ye Banisirayila jamaa fanaa bee bendi ñoo kaŋ. 10 I be Lewi lasiloo moolu samba la naŋ nte Yaawe ñaatiliŋo le la, bituŋ Banisirayilankoolu ye ì buloo laa ì kuŋo kaŋ. 11 Haaruna ñanta Lewi lasiloo moolu yitandi la n ñaatiliŋo la le ka ke Banisirayilankoolu ye komeŋ teekandiri sadaa, fo ì si paree ka nte Yaawe la dookuwo ke.
12 Niŋ Lewi lasiloo moolu ye ì buloo laa ninsituuraalu kuŋo kaŋ fokabaŋ, i si ninsituuraa doo ke junube kafarilaŋ sadaa ti, i ye doo ke jani sadaa ti nte Yaawe ye, ka ke Lewi lasiloo moolu ye junube kafarilaŋo ti. 13 I si Lewi lasiloo moolu londi Haaruna niŋ a dinkewolu ñaatiliŋo la, i ye ì yitandi komeŋ teekandiri sadaa n ye. 14 Lewi lasiloo moolu jenkendi kara la ka bo Banisirayilankoolu kono wo ñaama, ì ye ke n taa ti.
15 Niŋ i ye Lewi lasiloo moolu seneyandi fokabaŋ, i ye ì dii komeŋ teekandiri sadaa, ì si naa ka dookuwo ke Bendulaa Tiriliisi Senuŋo to. 16 Itolu le mu Banisirayilankoolu ti mennu muumeelaa ñanta dii la n na. Ŋa itolu le taa m faŋo taayaa la, ka Banisirayila musoolu bee dinkee foloo jooseyi ì la. 17 Banisirayila dinkee foloolu, biriŋ a hadamadiŋ to fo ka taa bula beeyaŋolu la, a bee mu nte le taa ti. Biriŋ ŋa Misira diŋ foloolu bee faa, ŋa itolu le jenkendi kara la m faŋo ye. 18 Bari saayiŋ ŋa Banisirayila dinkee foloolu bee jooseyi Lewi lasiloo moolu le la. 19 Ŋa Lewi lasiloo moolu le taa Banisirayilankoolu kono ka ì dii Haaruna niŋ a dinkewolu la. Ì si dookuwo ke Bendulaa Tiriliisoo to Banisirayilankoolu tooyaa la, aniŋ ka junube kafaroo ñini ì ye fo meŋ si a tinna alibalaa kuuraŋo te naa ì kaŋ niŋ ì sutiyaata Tiriliisi Senuŋo la.
20 Musa, Haaruna, aniŋ Banisirayila jamaa bee ye wo le ke Lewi lasiloo moolu la, ko Yaawe ye Musa yaamari a la ñaameŋ. 21 Lewi lasiloo moolu ye ì faŋ seneyandi le, ì ye ì la duŋ feŋolu kuu. Bituŋ Haaruna naata ì yitandi Yaawe ñaatiliŋo la komeŋ teekandiri sadaa, aniŋ ka junube kafaroo ñini ì ye ka ì seneyandi. 22 Biriŋ wo bota a la, Lewi lasiloo moolu naata le ka ì la dookuwo ke Bendulaa Tiriliisoo to, Haaruna niŋ a dinkewolu la yaamaroo koto. Yaawe ye Musa yaamari a la ñaameŋ, ì ye wo le ke Lewi lasiloo moolu la.
23 Yaawe ko Musa ye ko, 24 “Ñiŋ yaamaroolu mu Lewi lasiloo moolu le taa ti: kee-wo-kee niŋ a ye sanji muwaŋ niŋ luulu soto, ka taa wo ye santo la, a ñanta maabee la Bendulaa Tiriliisoo dookuwo to le. 25 Bari niŋ meŋ siyo taata fo sanji taŋ luulu, a maarii ñanta i foño la a la dookuwo la le, a kana dookuu ke kotenke. 26 A si a baadiŋolu maakoyi noo le, niŋ ì be ì la dookuwo ke kaŋ Bendulaa Tiriliisoo to. Bari ate maŋ ñaŋ na a fansuŋ palaasoo taa la dookuwo ñiŋ to. Ñiŋ ne mu siloo ti, i ñanta Lewi lasiloo moolu la dookuwo dii la ì la ñaameŋ.”
© Mandinka Bible © Bible Society in The Gambia, 2011
