Kohati koomalankoolu la dookuwo
1 Yaawe* ko Musa niŋ Haaruna ye ko:
2 Ali Kohati koomalankoolu yaatee Lewi lasiloo moolu kono ko ì la kaabiiloolu be ñaameŋ, aniŋ ì la dimbaayaalu. 3 Ali kewolu bee yaatee mennu siyo be ka bo sanji taŋ saba ka taa fo sanji taŋ luulu, mennu si dookuwo ke noo Bendulaa Tiriliisi Senuŋo* to.
4 Kohati koomalankoolu la dookuwo mu meŋ ti Bendulaa Tiriliisi Senuŋo to, wo le mu, ka feŋ buuñaariŋ baalu la kuwo topatoo. 5 Niŋ daakaa be bo la a noo to, Haaruna niŋ a dinkewolu le ñanta duŋ na konoto, ì ye ridoo taa meŋ be Dulaa Senuŋ Baa* to, ì ye Kambeŋ Kunewo* muuri a la, seedeyaa walaa fuloo be meŋ kono. 6 Bituŋ ì ye kulu ñiimaa ke a kaŋ santo, ì ye naa bayi buluuriŋo muuri wo kaŋ. Ì ye sambaraŋ dokoolu ke ì dulaalu to Kambeŋ Kunewo bala.
7 Haaruna niŋ a dinkewolu le ñanta bayi buluuriŋo feenee la taabuloo kaŋ, mbuuru senuŋo* ka laa meŋ kaŋ nte Yaawe ñaatiliŋo la, ì ye palaatoolu londi a kaŋ, mindaŋolu, booloolu aniŋ miŋ feŋ sadaa* keraŋ dumboolu. Mbuuroo meŋ ka tara a kaŋ, a ye tu a kaŋ jee. 8 Ì ye bayi wuleŋo fanaa muuri wo kaŋ santo, ì ye naa kulu ñiimaa laa wo kaŋ. Niŋ ì ye wo ke, ì ye naa taabulu sambaraŋ dokoolu ke ì dulaalu to.
9 Niŋ wo bota jee, ì ye naa lampu looraŋo muuri bayi buluuriŋo la, a niŋ a lampoolu niŋ meesi kunturaŋolu niŋ a sambaraŋolu, aniŋ dumboolu olifu* tulu keraŋyaa ye. 10 Bituŋ ì ye naa lampu looraŋo ñiŋ moromoro kulu ñiimaa kono, a niŋ a feŋo bee, ì ye a laa sambaraŋo kaŋ.
11 Ì ñanta cuuraayi siisindidulaa kaŋ muuri la bayi buluuriŋo le la, ì ye naa kulu ñiimaa muuri wo kaŋ, ì ye sambaraŋ dokoolu ke ì dulaalu to.
12 Ì ye jooraŋolu bee taa, ì ka dookuwo ke mennu la Dulaa Senuŋo to, ì ye ì moromoro bayi buluuriŋo kono, ì ye naa ì muuri niŋ kulu ñiimaa la, ì ye ì landi sambaraŋo kaŋ.
13 Ì ye seebuutoo bondi sadaajanidulaa* kaŋ, ì ye bayoo feenee a kaŋ meŋ ye kuloori wuluyeloo soto. 14 Bituŋ ì ye naa jooraŋolu bee laa a kaŋ, ì ka dookuwo ke mennu la sadaajanidulaa to: dimbaa biiraŋolu, subusooraŋolu, seebuutu sambaraŋolu aniŋ booloolu. Ì ye naa kulu ñiimaa feenee a kaŋ, ì ye sambaraŋ dokoolu ke ì dulaalu to.
15 Niŋ Haaruna niŋ a dinkewolu pareeta konoto feŋ senuŋo ñiŋ muuroo la, a niŋ a jooraŋolu bee, aniŋ niŋ daakaa ñiŋ pareeta ka wutu a noo to, Kohati koomalankoolu le ñanta naa la ka ì samba. Bari ì maŋ ñaŋ ka feŋ senuŋolu maa, niŋ ì ye wo ke doroŋ ì si faa. Kohati koomalankoolu le ñanta feŋolu samba la mennu be Bendulaa Tiriliisi Senuŋo koto.
16 Eleyasa, Piriisi* Haaruna dinkewo, wo le be mara la tuloo la meŋ ka lampoolu mala, cuuraayi diimaa, siimaŋ sadaa aniŋ tulu senuŋo*. Ate le ñanta mara la Tiriliisi Senuŋo kuwo ma, a niŋ a feŋo bee, ka taa bula fo a konoto feŋ senuŋolu la, aniŋ a jooraŋolu.
17 Yaawe ko Musa niŋ Haaruna ye ko:
18-19 Ali kana Kohati kaabiiloo moolu bula ì ye sutiyaa feŋ senuŋ baalu la, ì ye kasaara ka bo Lewi lasiloo moolu kono. Ali ñanta ñiŋ ne ke la, meŋ si a tinna ì ye baluu ì te faa la. Waati-wo-waati Haaruna niŋ a dinkewolu le niŋ ì ñanta ka duŋ ñoo la ka ì bee kiliŋ-kiliŋ naa la dookuwo dii ì la, aniŋ ì ñanta feŋolu mennu duni la. 20 Bari niŋ ì dunta Tiriliisoo kono, ì ñaa boyita feŋ senuŋolu kaŋ, ì be faa la le.
Kerisoni koomalankoolu la dookuwo
21 Yaawe ko Musa ye ko:
22 Kerisoni koomalankoolu fanaa yaatee ko ì la dimbaayaalu niŋ ì la kaabiiloolu be ñaameŋ. 23 Kewolu bee yaatee mennu siyo be ka bo sanji taŋ saba ka taa fo sanji taŋ luulu mennu ka naa dookuwo la Bendulaa Tiriliisi Senuŋo to.
24 Kerisoni koomalankoolu ñanta meŋ ke la, wo le mu ka dookuu siifaa koteŋolu ke aniŋ duni samboo: 25 Itolu le ñanta Bendulaa Tiriliisoo ridoolu samba la, a saakotoŋ kuloo aniŋ kulu ñiimaa, meŋ ka tara laariŋ a kaŋ santo, ridoolu mennu ka tara tiriliisoo dundaŋ daa to, 26 luuto ridoolu mennu be muruŋ-murundiŋ tiriliisoo la aniŋ sadaajanidulaa, ridoo meŋ be luuto daa to, tiriliisoo juloolu, aniŋ ì ka jooraŋolu mennu bee taa a dookuwo to. Kerisoni koomalankoolu ñanta ñiŋ feŋolu le taa la, ka dookuu-wo-dookuu ke meŋ ñanta ka ke. 27 Ì la dookuwo bee, fo duni samboo baŋ, waraŋ dookuu koteŋ, a bee ñanta ke la Haaruna niŋ a dinkewolu la yaamaroo le koto. Ì ñanta feŋolu mennu bee duni la, ali a yitandi ì la a ye ke ì la dookuwo ti. 28 Ñiŋ ne mu Kerisoni koomalankoolu la dookuwo ti Bendulaa Tiriliisi Senuŋo to. Ì la dookuwo bee ñanta tara la Itama la yaamaroo le koto, Piriisi Haaruna dinkewo.
Merari koomalankoolu la dookuwo
29 Yaawe tententa ka a fo Musa ye ko:
Merari koomalankoolu yaatee ko ì la kaabiiloolu niŋ ì la dimbaayaalu be ñaameŋ, 30 kewolu bee mennu siyo be ka bo sanji taŋ saba ka taa fo sanji taŋ luulu mennu naata dookuwo la Bendulaa Tiriliisi Senuŋo to. 31 Niŋ ì be dookuwo ke la Bendulaa Tiriliisoo to, ñiŋ ne ñanta ke la ì la dookuwo ti: ka tiriliisoo kaadaroolu duni, a dokoolu, a samasiŋolu aniŋ a looraŋolu, 32 ka taa bula fo a samasiŋolu mennu be muruŋ-murundiŋ luwo la, ì niŋ ì looraŋolu, tiriliisoo pikaloolu, a juloolu, a jooraŋolu bee aniŋ ì la dookuwo be dendiŋ feŋ-wo-feŋ na. Kee-wo-kee a ñanta meŋ samba la, ali ye a yitandi a la. 33 Ñiŋ ne mu Merari kaabiiloolu la dookuwo ti, Bendulaa Tiriliisi Senuŋo to, Itama la yaamaroo koto, Piriisi Haaruna dinkewo.
Lewi lasiloo kewolu yaateeta kotenke
34 Musa niŋ Haaruna niŋ jamaa ñaatonka koteŋolu ye Kohati koomalankoolu yaatee le ko ì la kaabiiloolu be ñaameŋ, aniŋ ì la dimbaayaalu, 35 kewolu bee mennu siyo be ka bo sanji taŋ saba ka taa fo sanji taŋ luulu, mennu naata dookuwo la Bendulaa Tiriliisoo to. 36 Kaabiiloolu mennu yaateeta, a moo taata kaañaŋ wuli fula keme woorowula aniŋ taŋ luulu le fee. 37 Ñiŋ ne keta moo nankamoo ti meŋ tarata Kohati la kaabiiloolu kono mennu ka dookuwo ke Bendulaa Tiriliisoo to. Musa niŋ Haaruna ye ì yaatee le, ko Yaawe ye Musa yaamari a la ñaameŋ.
38 Kerisoni koomalankoolu yaateeta le ko ì la kaabiiloolu be ñaameŋ, aniŋ ì la dimbaayaalu, 39 kewolu bee mennu siyo be ka bo sanji taŋ saba ka taa fo sanji taŋ luulu, mennu ka naa dookuwo la Bendulaa Tiriliisoo to. 40 Nankamoo meŋ yaateeta ko ì la kaabiiloolu niŋ ì la dimbaayaalu be ñaameŋ, taata kaañaŋ wuli fula keme wooro aniŋ taŋ saba le fee. 41 Ñiŋ ne keta moo nankamoo ti meŋ tarata Kerisoni la kaabiiloolu kono mennu ka dookuwo ke Bendulaa Tiriliisoo to. Musa niŋ Haaruna ye ì yaatee le, ko Yaawe ye a yaamaroo dii ñaameŋ.
42 Merari koomalankoolu yaateeta le ko ì la kaabiiloolu be ñaameŋ aniŋ ì la dimbaayaalu, 43 kewolu bee mennu siyo be ka bo sanji taŋ saba ka taa fo sanji taŋ luulu, mennu ka naa dookuwo la Bendulaa Tiriliisoo to. 44 Nankamoo meŋ yaateeta ko ì la kaabiiloolu be ñaameŋ, taata kaañaŋ wuli saba keme fula le fee. 45 Ñiŋ ne keta moo nankamoo ti meŋ tarata Merari la kaabiiloolu kono. Musa niŋ Haaruna ye ì yaatee le, ko Yaawe ye Musa yaamari a la ñaameŋ.
46 Bituŋ Musa, Haaruna aniŋ Banisirayila ñaatonka koteŋolu ye Lewi lasiloo moolu bee yaatee ko ì la kaabiiloolu be ñaameŋ aniŋ ì la dimbaayaalu. 47 Kewolu bee, mennu siyo be ka bo sanji taŋ saba ka taa sanji taŋ luulu, mennu ka naa dookuwo la aniŋ ka Bendulaa Tiriliisoo samba, 48 ì nankamoo taata kaañaŋ moo wuli seyi keme luulu aniŋ taŋ seyi le fee. 49 Ko Yaawe ye Musa yaamari ñaameŋ, moo-wo-moo ì ye a la dookuwo dii a la le, aduŋ a fota ì ye le ì be meŋ duni la.
Ì toolu safeeta le, ko Yaawe ye Musa yaamari a la ñaameŋ.
© Mandinka Bible © Bible Society in The Gambia, 2011
