Balaamu la kiilaariyaa kuma foloo
1 Bituŋ Balaamu ko Balaki ye ko, “Sadaabodulaa* woorowula loo n ye jaŋ. I ye ninsituuraa woorowula niŋ saakotoŋ woorowula parendi n ye.” 2 Balaki ye a ke le ko Balaamu ye a fo a ye ñaameŋ. Bituŋ ì moo fuloo naata ninsituuraa niŋ saakotoŋo bo sadaabodulaa kiliŋ-wo-kiliŋ kaŋ.
3 Balaamu ko Balaki ye ko, “Tu jaŋ, i la jani sadaalu* daala, nte ŋa taa kara la. A si ke noo Yaawe* ye naa n kaŋ. Niŋ a ye feŋ-wo-feŋ yitandi n na, m be a fo la i ye le.” Bituŋ a seleta konkoriŋo santo, yiri te daameŋ.
4 Alla fintita Balaamu kaŋ. Bituŋ Balaamu ko a ye ko, “Ŋa sadaabodulaa woorowula le parendi. Sadaabodulaa-wo-sadaabodulaa kaŋ, ŋa ninsituuraa le bo jee, aniŋ saakotoŋo.”
5 Yaawe ye kumakaŋo duŋ Balaamu daa, a ñanta meŋ fo la. A naata a kii Balaki kaŋ ka a la kiilaariyaa kumoo futandi a ma.
6 Wo le to a muruta Balaki kaŋ. Balaki tarata looriŋ a la jani sadaalu daala, a niŋ Mowabi maralilaalu bee. 7 Balaamu naata a la kiilaariyaa kumoolu bankee ko:
“Mowabi mansa Balaki,
wo le ye m bondi naŋ ka bo Aramu,
ka bo tilibo konkoolu to.
A ko n ye ko,
‘Naa i ye Yaakuba koomalankoolu danka n ye.
Naa i ye Banisirayila tiñaa.’
8 Bari nte si moolu danka noo ñaadii,
Alla maŋ mennu ke dankatoolu ti?
Nte si moolu tiñaa noo ñaadii,
Yaawe maŋ lañini mennu la tiñaa la?
9 Ŋa ì je ka bo bere konkoo turoo le to,
ŋa ì hayinaŋ ka bo konkoriŋolu to.
Ŋa moolu le je mennu be ì faŋ ye,
ì maŋ ì faŋ bula banku koteŋolu moolu kono.
10 Jumaa le si Yaakuba koomalankoolu yaatee noo,
mennu be siyaariŋ ko bankumunkoo,
waraŋ ka hani Banisirayila talaadaa naaninjaŋo yaatee noo?
Allamaa n na saatoo ke la ko moo tilindiŋolu,
n labaŋo ye ke ko ì taa.”
11 Balaki ko Balaamu ye ko, “I ye muŋ kuu le ke n na teŋ? Ŋa i samba naŋ ka naa n jawoolu danka, bari i maŋ naa feŋ ke, fo ka neemoo daani ì ye.”
12 Balaamu ye a jaabi ko, “Fo Yaawe ye kumakaŋo meŋ duŋ n daa, m maŋ ñaŋ na wo le fo la baŋ?”
Balaki la kiilaariyaa kuma fulanjaŋo
13 Bituŋ Balaki ko Balaamu ye ko, “Naa ŋà taa dulaa doo to, daameŋ i si Banisirayilankoolu je noo. Niŋ i be jaŋ, i ka ì la daakaa jenjeŋo doroŋ ne je. I si ì danka n ye wo dulaa to.” 14 Wo le to a ye a samba Sofimu la kunkoo to Pisika Konkoo santo, a ye sadaabodulaa woorowula loo jee to, aduŋ a ye ninsituuraa niŋ saakotoŋo le faa ñinnu bee kaŋ.
15 Balaamu ko Balaki ye ko, “Tu jaŋ, i la jani sadaalu daala, nte ŋa taa jana fo Yaawe be finti la n kaŋ.”
16 Yaawe fintita Balaamu kaŋ, aduŋ a ye a fo a ye le, a ñanta ka meŋ fo. Bituŋ a naata a murundi Balaki kaŋ ka a la kumakaŋo sindi a ma.
17 Bituŋ a muruta teŋ ne, a ye Balaki tara looriŋ a la jani sadaalu daala, a niŋ Mowabi maralilaalu. Balaki naata a ñininkaa Yaawe ye meŋ fo.
18 Bituŋ Balaamu ye a la kiilaariyaa kumoolu bankee ko:
“Wuli Balaki, i ye moyiroo ke,
i lamoyi n na, ite Sipori dinkewo.
19 Alla maŋ ke hadamadiŋo ti,
sako a si faniyaa fo.
A maŋ ke hadamadiŋ ti,
a buka a la miiroolu faliŋ.
Fo Alla si kuma fo baŋ, a maŋ a ke?
Fo a si laahidoo dii baŋ, a maŋ a timmandi?
20 Nte ŋa yaamaroo meŋ soto, wo le mu,
ka neemoo daani.
Alla ye neemoo dii le fokabaŋ,
aduŋ nte te wo faliŋ noo la.
21 “Mantaabembaliyaa te soto la Yaakuba la karoo la,
balafaa kuu nene te laa la Banisirayila kaŋ.
Yaawe ì la Alla, be ì fee le.
Ate le mu ì la Mansa Baa ti,
aduŋ ì ye a tentu wo la le.
22 Alla meŋ ye ì bondi naŋ Misira,
a ye keloo ke ì ye le ko ninsi saŋaroo.
23 Batuutaayaa te ke noo la Yaakuba kamma,
bitaari te ke noo la Banisirayila la kuwo to.
A be fo la ì la kuwo to le ko,
‘Ali a juubee Alla ye meŋ ke.’
24 Banisirayilankoolu wulita le ko jatamusoo,
ì wulita le ko jatoo,
meŋ buka i dahaa fo a ye a la deema suboo domo,
a ye a la faari suboo yeloo miŋ.”
25 Bituŋ Balaki ko Balaamu ye ko, “Niŋ i maŋ ì danka fanaa, wo to kana neemoo daani ì ye.”
26 Bari Balaamu ko Balaki ye le ko, “Fo m maŋ ñiŋ ne fo i ye baŋ ko, Yaawe ye feŋ-wo-feŋ fo, nte ñanta ka wo le ke?”
Balaamu la kiilaariyaa kuma sabanjaŋo
27 Bituŋ Balaki ko Balaamu ye ko, “Naa m be i samba la dulaa doo le to, wo si Alla kontaani noo le, i si a je, i si ì danka noo jee.” 28 Wo to le Balaki ye Balaamu samba Pewori Konkoo santo, daameŋ niŋ i be jee, i ka Yesimoni hayinaŋ.
29 Balaamu ko Balaki ye ko, “Sadaabodulaa woorowula loo n ye jaŋ. I si ninsituuraa woorowula niŋ saakotoŋ woorowula parendi n ye.” 30 Bituŋ Balaki naata wo le ke, ko Balaamu ye a fo a ye ñaameŋ. A ye ninsituuraa niŋ saakotoŋo le faa ì bee kiliŋ-kiliŋ naa kaŋ.
© Mandinka Bible © Bible Society in The Gambia, 2011
