Banisirayilankoolu ye Aradi mansa noo keloo to
1 Biriŋ Kanaaninkoolu la mansa meŋ be marariŋ Aradi saatewo ma Nekefu* tundoo kaŋ, ye ñiŋ moyi ko Banisirayilankoolu be naa kaŋ niŋ Atarimu siloo le la, a wulita ì kamma keloo la, a ye ì la moo doolu muta. 2 Bituŋ Banisirayilankoolu naata laahidoo taa Yaawe* ye ko, “Niŋ i ye ñiŋ moolu duŋ m̀ bulu, m̀ be ì la saatewolu bee le kasaara la.” 3 Yaawe ye i danku Banisirayilankoolu la kiliroo la le, a ye Kanaaninkoolu duŋ ì bulu. Ì ye ì niŋ ì la saatewolu bee le kasaara. Bituŋ dulaa ñiŋ naata kumandi Horima la.
Jaawali saa
4 Biriŋ ì bota Hori Konkoo to, ì wulita ka Kulunjumbe Baa siloo muta, ka muruŋ-muruŋ niŋ Edomu bankoo la, bari ì pasita siloo kaŋ. 5 Ì ye kumoolu fo Alla niŋ Musa ma, ì kumata ko, “Muŋ ne ye a tinna ali ye m̀ bondi naŋ Misira ka naa faa ñiŋ keñewuloo* kono? Domori te jaŋ, jii te jaŋ. Ǹ ka ñiŋ domoroo meŋ domo, a ye m̀ pasi le.”
6 Bituŋ Yaawe ye saa kunamaalu naati ì kaŋ ka ì kiŋ, aduŋ Banisirayilanka jamaa le faata ñiŋ saa kindiroo la. 7 Bituŋ jamaa moolu naata Musa kaŋ ì ko a ye ko, “Ŋà junube kuwo le ke, ka kuma kuumaa fo Yaawe ma, aniŋ ite. Duwaa fo Yaawe si ñiŋ saalu bayi m̀ bala.” Bituŋ Musa naata duwaa ì ye.
8 Yaawe ko Musa ye ko, “Saa kunamaa muluŋo dadaa, i ye a deŋ dokoo bala santo. Niŋ saa ye moo-wo-moo kiŋ a ye ñiŋ juubee, a te faa la.” 9 Bituŋ Musa naata jaawaloo dadaa saa ti, a ye a deŋ dokoo bala. Niŋ saa ye moo-wo-moo kiŋ, a be ñiŋ jaawali saa le juubee la, a kana faa.
Banisirayilankoolu la taamoo ka taa Mowabi
10 Biriŋ Banisirayilankoolu wulita wo to, ì taata daakaa loo Oboti le. 11 Biriŋ ì bota Oboti, ì taata daakaa loo Iye-Abarimu le, keñewuloo* kono, daameŋ niŋ Mowabi tilibo karoo la be naaneeriŋ. 12 Biriŋ ì bota wo to, ì tententa ì taata daakaa loo Seredi Wulumbaŋo to. 13 Ì bota wo to fanaa, ì taata daakaa loo Arinoni Boloŋ kara maafaŋ doo la keñewuloo kono, Amori bankoo datita daameŋ. Arinoni Boloŋ mu naanewo le ti Mowabinkoolu niŋ Amorinkoolu teema.
14-15 Ñiŋ ne ye a tinna a be safeeriŋ Yaawe la Keloolu Kitaaboo kono: “Wahebu saatewo meŋ be Sufa maafaŋo la, aniŋ a wulumbaŋolu, aniŋ Arinoni Boloŋ niŋ a wulumbaŋ jindaalu mennu taata finti Ari saatewo to, Mowabi naanewo daala.”
16 Biriŋ ì bota ñiŋ dulaa to, ì tententa ka taa dulaa meŋ to, ì ka a fo wo ye le ko Beeri, daameŋ Yaawe diyaamuta Musa ye ko, “Moolu bendi ñoo kaŋ, m be jiyo dii la ì la le.”
17 Wo tumoo le mu Banisirayilankoolu ye ñiŋ denkiloo laa ko:
“Koloŋ, i jiyo fintindi
ŋà a kontoŋ niŋ denkiloo la.
18 Ite koloŋ-wo,
maralilaalu niŋ moo kummaalu le ye i siŋ.
Ì ye i siŋ ì la mansadokoo le la,
aniŋ ì la taamaraŋ dokoo.”
Bituŋ ì bota Beeri, keñewuloo kono, ì taata Matana. 19 Biriŋ ì bota Matana, ì tententa ka taa Nahaliyeli, biriŋ ì bota Nahaliyeli, ì taata Bamoti. 20 Biriŋ ì bota Bamoti, ì taata wulumbaŋo kono meŋ be Mowabi, daameŋ niŋ i be Pisika Konkoo santo, i ka Yesimoni hayinaŋ.
Banisirayilankoolu ye Mansa Sihoni noo keloo la
(5 Musa 2:26—3:11)21 Banisirayilankoolu ye kiilaalu kii Sihoni kaŋ, Amorinkoolu la mansa, ka a fo a ye ko, 22 “Ǹ so ŋà tambi niŋ i la bankoo kaŋ na. Ǹ te bula la kunku kono, waraŋ wayini* kankaŋ, aduŋ ǹ te hani jii miŋ na koloŋ to. M̀ be taama la Mansa Mbeedi baa le kaŋ, fo ŋà i la bankoo kumbaŋ.”
23 Bari Sihoni maŋ soŋ ka Banisirayilankoolu bula ì ye tambi niŋ a la bankoo la. A ye a la kelediŋolu bee parendi, ì wulita Banisirayilankoolu kamma keñewuloo kono. Biriŋ a futata Yahasi, a ye Banisirayilankoolu maa keloo la wo le to. 24 Bari Banisirayilankoolu ye ì noo le, ì ye ì la bankoo taa ka bo biriŋ Arinoni Boloŋ to, ka taa fo Yaboki Boloŋ to. Bari ì danta Ammoninkoolu la naanewo le to, kaatu wolu la naanewo be tankariŋ baake le. 25 Banisirayilankoolu ye Amorinkoolu la saatewolu bee le muta ì ye ì taa, Hesiboni daa bulariŋo jee, a niŋ a dandanna saateeriŋolu. 26 Hesiboni mu Sihoni la saatewo le ti, Amorinkoolu la mansa. Ate le ye Mowabi mansakee kotoo kele nuŋ, a ye a la bankoo bee muta a bulu, ka taa fo Arinoni Wulumbaŋo to.
27 Wo le ye a tinna jaloolu ye ñiŋ denkili a la kuwo to ko:
“Ali naa Hesiboni, Sihoni la saatewo to,
Allamaa a ye i seyi i ñaama, a ye i lookuu.
28 Dimbaa fintita naŋ Hesiboni kono,
dimbaa neŋo bota naŋ Sihoni la saatewo to,
a ye Ari saatewo kasaara Mowabi,
aniŋ maralilaalu mennu be siiriŋ konkoolu kaŋ Arinoni Boloŋ daala.
29 Kooroo be alitolu Mowabi moolu ye!
Alitolu Kemosi jalaŋo batulaalu, ali kasaarata le.
Kemosi ye a dinkewolu ke borijoŋolu ti,
a ye a dimmusoolu kenkeŋ mutoo kono,
Amorinkoolu la mansa, Sihoni bulu.
30 Ŋà Amorinkoolu noo le,
Hesiboni ka taa fo Diboni,
ka taa hani fo Nofa meŋ be Medeba daala,
ŋà ì bee le turutumbuŋ.”
31 Bituŋ Banisirayilankoolu siita Amorinkoolu la bankoo kaŋ. 32 Musa ye kewolu kii ka taa Yaseri kullootoo juubee. Wo koolaa le mu, Banisirayilankoolu naata a dandanna saateeriŋolu muta, ì ye Amorinkoolu bayi mennu be jee.
Banisirayilankoolu ye Mansa Oki noo keloo la
33 Bituŋ ì ye lamfewo soo ka Basani siloo muta. Bituŋ Oki, Basani mansa niŋ a la kelediŋ kafoo bee naata ì benduŋ keloo la Edireyi.
34 Bari Yaawe ko Musa ye le ko, “Kana sila a la, nte le ye a duŋ i buloo kono, a niŋ a la kelediŋ kafoo bee, aniŋ a la bankoo bee. Ko i ye meŋ ke Amorinkoolu la Mansa Sihoni la, meŋ tarata maraloo la Hesiboni, wo ke a fanaa la.”
35 Bituŋ ì ye a faa, a niŋ a dinkewolu niŋ a la kelediŋolu bee, hani moo kiliŋ ì maŋ a tu baluwo to. Bituŋ ì ye a la bankoo taa.
© Mandinka Bible © Bible Society in The Gambia, 2011
