Kullooñinilaalu kiita Kanaani bankoo kaŋ
(5 Musa 1:19-33)1 Yaawe* ko Musa ye ko, 2 “Ñaatonka kiliŋ tomboŋ lasili-wo-lasili kono. I ye ì kii ka taa Kanaani bankoo kullootoo juubee, m be naa meŋ dii kaŋ Banisirayilankoolu la.”
3 Bituŋ Musa ye ì kii ka bo Parani Keñewuloo* kono, ko Yaawe ye a yaamaroo dii ñaameŋ. Ñinnu bee mu ñaatonkoolu le ti Banisirayilankoolu kono. 4 Ì toolu mu ñinnu le ti:
Rubeni lasiloo to, Sammuwa, Sakuri dinkewo,
5 Simeyoni lasiloo to, Safati, Hori dinkewo,
6 Yahuuda lasiloo to, Kalebu, Yefunne dinkewo,
7 Isakari lasiloo to, Ikali, Yusufa dinkewo,
8 Efurayimu* lasiloo to, Hoseya, Nuni dinkewo,
9 Benjamini lasiloo to, Paliti, Rafu dinkewo,
10 Sebuluni lasiloo to, Kadiyeli, Sodi dinkewo,
11 Manase, Yusufa dinkewo la lasiloo to, Kadi, Susi dinkewo.
12 Dani lasiloo to, Ammiyeli, Kemalli dinkewo,
13 Aseri lasiloo to, Seturi, Mikayeli dinkewo,
14 Nafutali lasiloo to, Naabi, Wofusi dinkewo,
15 Kadu lasiloo to, Keweli, Maki dinkewo,
16 Ñinnu le mu kewolu toolu ti, Musa ye mennu kii ka taa bankoo kullootoo juubee. Musa ye Hoseya, Nuni dinkewo too faliŋ ne ka a ke Yosuwa ti.
17 Biriŋ Musa be ì kii la ka taa Kanaani bankoo kullootoo juubee, a ko ì ye le ko, “Ali taa niŋ Nekefu* tundoo la ka taa wo la konkotundoo* to la. 18 Ali taa ali ye a juubee bankoo ñiŋ be ñaameŋ, fo moolu mennu be jee ì be bambandiŋ ne, waraŋ fo ì maŋ bambaŋ, waraŋ fo ì siyaata le, fo ì maŋ siyaa. 19 Ì be sabatiriŋ banku siifaa meŋ kaŋ, fo a beteyaata le, waraŋ fo a maŋ beteyaa. Ì be sabatiriŋ saatee ñaadiilu le kono, fo ì be tatariŋ ne, waraŋ fo ì maŋ tata? 20 Jee bankoo be ñaameŋ, fo a kenta le baŋ, waraŋ fo a maŋ keŋ, fo a ye yiroolu soto le baŋ, waraŋ fo a maŋ yiroolu soto? Ali a kata ali ye a yiridiŋo doolu samba naŋ.” Wayini* yiri kuŋ foloolu la sanjaanoo waatoo le mu.
21 Bituŋ ì taata bankoo kullootoo juubee ka bo Cini Keñewuloo kono ka taa fo Rehobu saatewo to Lebo Hamati maafaŋo la. 22 Ì taata niŋ Nekefu tundoo le la ka naa Heburoni saatewo to, daameŋ Anaki koomalankoolu, Ahimani, Sesayi, aniŋ Talimayi be sabatiriŋ jee. Heburoni loota le sanji woorowula janniŋ Sowani ka loo Misira. 23 Biriŋ ì naata fo Esikoli Wulumbaŋo to, ì ye wayini yiribuloo kuntu, wayini yiridiŋ ñatoo tarata meŋ bala. Kee fula le ye a deŋ dokoo bala ka a samba, a niŋ roomaani* yiridiŋolu niŋ sooto diŋolu. 24 Ì ye wo dulaa kumandi Esikoli Wulumbaŋ ne la, Banisirayilankoolu la wayini yiridiŋ ñatoo katoo jee kamma la. 25 Ì ye ñiŋ bankoo kullootoo juubee, tili taŋ naanoo koolaa ì muruta.
Kullooñinilaalu la danteeroo
26 Ì muruta naŋ Musa niŋ Haaruna kaŋ aniŋ Banisirayila jamaa bee Kadesi, Parani Keñewuloo kono. Ì ye i dantee ì ye jee le to, ì niŋ jamaa bee, ì ye bankoo ñiŋ yiridiŋolu yitandi ì la. 27 Ì ye i dantee Musa ye ko, “I ye ǹ kii bankoo meŋ kaŋ, ǹ taata jee le, keekewo niŋ liyo le ka woyi a bankoo kaŋ, a yiridiŋolu fele.
28 “Bari bankoo ñiŋ moolu mu moo bambandiŋolu le ti. A saatewolu bee be tatariŋ ne, aduŋ ì warata. Wo bee koolaa ŋà Anaki koomalankoolu je jee le. 29 Amalekinkoolu be siiriŋ Nekefu tundoo le kaŋ. Hiti koomalankoolu, Yebusinkoolu, aniŋ Amorinkoolu, wolu be siiriŋ konkotundoo le kaŋ. Kanaaninkoolu be siiriŋ Baa Baa* le daala aniŋ Yoridani Boloŋo maafaŋo la.”
30 Moolu tarata woosii kaŋ Musa la kuwo la le, bari Kalebu ye ì deyindi le, a ko ì ye ko, “Ali ŋà taa jee saayiŋ ŋà bankoo taa, m̀ be jee taa noo la le.”
31 Bari a niŋ kewolu mennu taata bankoo kullootoo juubee, ye a jaabi ñiŋ ne la ko, “Ntolu te ñiŋ moolu maa noo la. Itolu le bambanta ntolu ti.” 32 Ì ye kibaari jawu baa janjandi Banisirayilankoolu kono bankoo ñiŋ na kuwo to, ì taata meŋ kullootoo juubee. Ì kumata ko, “Ñiŋ bankoo meŋ ǹ taata a kullootoo juubee teŋ, a be a moolu faŋo bee le domo la. Ŋà moolu fanaa mennu bee je jee, mu moo kulu baalu le ti. 33 Ŋà Anaki koomalankoolu je jee le, aduŋ wolu mu moo sembemaa baalu le ti. Ǹ keta ì ñaa koto le ko jatatoŋolu, m̀ mulunta ì ñaa koto wo le ñaama.”
© Mandinka Bible © Bible Society in The Gambia, 2011
