Piriisoolu niŋ Lewi lasiloo yaatewo
1 Ñinnu le mu piriisoolu* niŋ Lewi lasiloo ti Serubabeli, Seyalitiyeli dinkewo, aniŋ Yesuwa niŋ mennu naata:
Seraya, Yeremiya, Esira,
2 Amariya, Malluki, Hatusi,
3 Sekaniya, Rehumu, Meremoti,
4 Ido, Kinnetoni, Abiya,
5 Miyamini, Maadiya, Bilika,
6 Semaya, Yoyaribu, Yedaya,
7 Sallu, Amoki, Hilikiya, aniŋ Yedaya.
Wolu le mu piriisoolu niŋ ì baadiŋolu la lasili alifaalu ti Yesuwa la waatoo la.
8 Ñinnu le mu Lewi lasiloo ti mennu seyita naŋ: Yesuwa, Binnuyi, Kadimiyeli, Serebiya, Yahuuda, aniŋ Mataniya. Ate niŋ a baadiŋolu le marata tenturu suukuwolu la, 9 bituŋ Bakibukiya, aniŋ Unni, ka taa ì baadiŋolu, wolu marata suukuu laamutoo la.
Piriisi kuntiyo Yesuwa koomalankoolu
10 Yesuwa le mu Yoyakimu faa ti. Yoyakimu mu Eliyasibu faa ti. Eliyasibu mu Yoyada faa ti. 11 Yoyada mu Yonatani faa ti. Yonatani mu Yaduwa faa ti.
Piriisi dimbaayaalu la ñaatonkoolu
12 Yoyakimu mu piriisi kuntiyo ti waatoo meŋ na, ñinnu le mu piriisi dimbaayaalu la ñaatonkoolu ti:
Seraya la dimbaayaa, wo mu Meraya le ti.
Yeremiya taa, Hananiya.
13 Esira taa, Mesullamu.
Amariya taa, Yehohanani.
14 Malluki taa, Yonatani.
Sekaniya taa, Yusufa.
15 Harimu taa, Adina.
Meremoti taa, Helikayi.
16 Ido taa, Jakariya.
Kinnetoni taa, Mesullamu.
17 Abiya taa, Sikiri. Miniyamini taa,
Maadiya taa, Pilitayi.
18 Bilika taa, Sammuwa.
Semaya taa, Yehonatani.
19 Yoyaribu taa, Matenayi.
Yedaya taa, Usi.
20 Sallu taa, Kallayi.
Amoki taa, Eberi.
21 Hilikiya taa, Hasabiya.
Yedaya taa, Netaneli.
Piriisoolu niŋ Lewi lasiloo la dimbaayaalu
22 Waatoo meŋ na Eliyasibu be piriisi kuntiiyaa la, ka taa Yoyada, Yohanani, aniŋ Yaduwa, Dariyusi la waatoo la, Perisiya mansakewo, Lewi lasiloo niŋ piriisoolu la dimbaayaalu toolu safeeta le. 23 Bari toosafee ñaalamaa maŋ naa ke Lewi lasiloo niŋ piriisoolu la dimbaayaalu la ñaatonkoolu la, Eliyasibu mamariŋo Yohanani faariŋ koolaa.
Alla Batudulaa Buŋo to dookuu siŋo laañaa
24 Lewi lasiloo la ñaatonkoolu mu Hasabiya le ti, Serebiya, Kadimiyeli dinkewo Yesuwa, aniŋ ì baadiŋolu, mennu ka loo ì ñaatiliŋo la, ka tenturoo niŋ jayiroo ke. Kafu kiliŋo ka kafu doo laamuta le, ko Dawuda ye yaamaroo dii ñaameŋ, Alla la moo.
25 Mataniya, Bakibukiya, Obadiya, Mesullamu, Talimoni, aniŋ Akubu, wolu le marata maaboridulaalu kantoo la, mennu be dundaŋ daalu daala. 26 Ñiŋ moolu tarata Yoyakimu la waatoo le kono, meŋ mu Yesuwa dinkewo ti, aniŋ Yosadaki mamariŋo, ka taa kumandaŋo Nehemiya la waatoo, aniŋ Piriisi Esira la waatoo, meŋ mu karammoo ti.
Yerusalaamu tata sansaŋo kerekeroo
27 Kabiriŋ Yerusalaamu tatoo be kerekere la, ì taata Lewi lasiloo moolu kamma naŋ daa-wo-daa, ì tarata siiriŋ daameŋ. Ì ye ì naati Yerusalaamu le ka kerekeroo ñiŋ juura niŋ seewoo baa la, aniŋ tenturu suukuwolu, ka taa jaawali palaatoolu, ì ka mennu kosi, kooraalu, aniŋ kontiŋolu. 28 Ì ye suukuulaalaalu naati le ka bo Yerusalaamu niŋ a dandanna saatewolu to, mennu keta Netofankoolu la saateeriŋolu ti, 29 ka bo naŋ Beti-Kilikali, aniŋ Keba niŋ Asimaweti barabaroolu la. Suukuulaalaalu ye saatewolu le loo ì faŋolu ye Yerusalaamu dandaŋo la.
30 Kabiriŋ piriisoolu niŋ Lewi lasiloo ye ì faŋolu seneyandi a ñaama, ì ye moolu fanaa seneyandi le, aniŋ dundaŋ daalu niŋ tata sansaŋo. 31 Ŋa Yahuuda ñaatonkoolu naati tata sansaŋo kaŋ santo le. Ŋa suukuulaalaa kafu baa fula fanaa londi jee le ka tenturoo ke. Kafu doo taamata bulubaa karoo le la, ka taa Suntukunto Dundaŋ Daa maafaŋo la. 32 Hosaya niŋ ñaatonkoolu talantewo bulata ì nooma. 33 Asariya, Esira, Mesullamu, 34 Yahuuda, Benjamini, Semaya, aniŋ Yeremiya fanaa taata le. 35 Piriisoolu doolu fanaa niŋ footaŋolu taata le, aniŋ Jakariya fanaa, Yonatani dinkewo. Yonatani faa mu Semaya le ti. Semaya faa mu Mataniya le ti. Mataniya faa mu Mikaya le ti. Mikaya faa mu Sakuri le ti. Sakuri faa mu Asafu le ti. 36 Jakariya baadiŋolu fanaa taata le. Wolu le mu Semaya, Asareli, Milalayi, Kilalayi, Maayi, Netaneli, Yahuuda, aniŋ Hanani. Itolu le ye kumafeŋolu kumandi komeŋ Dawuda ye a ke nuŋ ñaameŋ, Alla la moo. Karammoo Esira le tarata taama kaŋ ì ñaato. 37 Ka bo Woyito Dundaŋ Daa to, ì taata laalaa santo le ka bo niŋ Dawuda la Saatewo* to seleraŋ teputepoolu la. Ì tententa tata sansaŋo santoo kaŋ na, Dawuda la buŋo kunto la, fo ì futata Jii Dundaŋ Daa to tiliboo la.
38 Kafu doo, mennu ye suukuwo laa ka Alla tentu, taata maraa karoo le la, tata sansaŋo kaŋ santo, aduŋ m bulata ì nooma le, n niŋ moolu talantewo. Ǹ taamata le ka tambi niŋ Fuuroolu Tata Jaŋo to la, ka taa Sansaŋ Tata Fanuŋo to. 39 Bituŋ ka bo jee ǹ tambita niŋ Efurayimu Dundaŋ Daa to la, ka taa Yesana Dundaŋ Daa, Ñee Dundaŋ Daa, Hananeli Tata Jaŋo, Keme Tata Jaŋo, fo Saajii Dundaŋ Daa to. Ŋà ǹ na taamoo baŋ Kantarilaa Dundaŋ Daa le to, Alla Batudulaa Buŋo* ñaatiliŋo la.
40 Bituŋ suukuulaalaa kafu fuloo loota ì la dulaa to Alla Batudulaa Buŋo kono. Nte fanaa niŋ ñaatonkoolu mennu be m fee ye wo le ke. 41 Piriisoolu fanaa, mennu mu Eliyakimu ti, Maaseya, Miyamini, Mikaya, Eloyenayi, Jakariya, aniŋ Hananiya, ì niŋ ì la footaŋolu ye wo le ke. 42 Ñiŋ doolu fanaa, Maaseya, Semaya, Eleyasa, Usi, Yehohanani, Malikiya, Elamu, aniŋ Eseri ye wo le ke. Yesirahiya le ye suukuulaalaalu ñaatonkayaa, aduŋ ì suukuukaŋo sikata le.
43 Wo luŋo la ì ye sadaaboo* baa le ke ì seewooriŋo, kaatu Alla ye ì seewondi baake le. Musoolu niŋ dindiŋolu fanaa seewoota le. Moolu la seewoo maakaŋo Yerusalaamu saatewo kono, ka moyi hani dulaa jamfariŋolu to le.
Alla Batudulaa Buŋo to dookuwo
44 Wo waatoo le mu kewolu tombonta ka mara maabori buŋolu ma, diiri feŋolu kedulaa, katiri kuŋ foloolu, aniŋ jakoolu. Ka bo kunkoolu to mennu be saatewolu dandaŋolu la, itolu le ñanta ka piriisoolu niŋ Lewi lasiloo niyo samba naŋ maabori buŋolu kono, ko Luwaa ye a yaamari ñaameŋ. Kaatu Yahuuda bee le seewoota piriisoolu niŋ Lewi lasiloo la dookuwo la. 45 Ì ye ì la Alla la dookuwo taamandi a ñaama le, ka jankundiroo ke. Suukuulaalaalu fanaa ye a ke le, aniŋ Alla Batudulaa Buŋo dundaŋ daa kantalaalu, ko Dawuda niŋ a dinkewo Sulemani ye a yaamari ñaameŋ. 46 Ka bo waati jaŋ na koomanto, Dawuda niŋ Asafu jamaanoo la, ñaatonkoolu le tarata suukuulaalaalu la, aniŋ suukuwolu mennu ka laa ka Alla tentu, aniŋ ka a jayi.
47 Serubabeli la waatoo niŋ Nehemiya fanaa la waatoo, Banisirayilankoolu bee le ka suukuulaalaalu niŋ Alla Batudulaa Buŋo dundaŋ daa kantalaalu niyo dii ì la, ko ì suulata a la ñaameŋ luŋ-wo-luŋ. Ì ka Lewi lasiloo niyo fanaa bondi a faŋ ye le, aduŋ Lewi lasiloo fanaa ka Haaruna koomalankoolu niyo bondi a faŋ ye le.
© Mandinka Bible © Bible Society in The Gambia, 2011
