Lampoolu la kuwo yaamaroolu Tiriliisi Senuŋo kono
(2 Musa 27:20-21)1 Yaawe* diyaamuta Musa ye ko:
2 I si Banisirayilankoolu yaamari ka olifu* tulu kendoo samba naŋ. A si ke lampu malaraŋo ti, ñiŋ kamma la lampoo si tu malariŋ waati-wo-waati. 3 Haaruna ñanta le ka lampoo tu malariŋ nte Yaawe ñaatiliŋo la Bendulaa Tiriliisi Senuŋo* kono, kabiriŋ wulaaroo fo soomandaa. A be tara la malariŋ ridoo ye banta maafaŋo le la. Wo ridoo le be kuntunteeriŋ Kambeŋ Kunewo* ñaato la. Ñiŋ mu kaŋ looriŋo le ti, jamaani naalaalu bee ye. 4 Ate le ñanta a je la ko, lampoolu ye mala ì ñaama, ka tara looraŋo kaŋ, meŋ mu saniforoo ti. Ì si tu malariŋ nte Yaawe ñaatiliŋo la.
Yaamaroolu mbuuru senuŋo* la kuwo to
5 Yaawe tententa ka a fo Musa ye ko:
I si fariña kendoo taa, i ye mbuuru kuŋ taŋ niŋ fula dadaa a la. Fariñoo kilo fula le ñanta ke la kuŋ-wo-kuŋ to. 6 I si ì tembendi ka ì landi saniforo taabuloo kaŋ talaadaa fula ti. Talaadaa-wo-talaadaa si ke kuŋ wooro ti. 7 I si cuuraayi seera diimaa kafu talaadaa-wo-talaadaa ma, ka ke yitandirilaŋo ti ko, mbuuroo muumewo diita nte Yaawe le la. Cuuraayoo si bo sadaa* ti n ye ka bo niŋ dimbaa la. 8 Loobula Luŋ-wo-Loobula Luŋ wo mbuuroolu ñanta le ka landi Banisirayilankoolu ye nte Yaawe ñaatiliŋo la. Wo mu ì la dunoo le ti fo fawu. 9 Wo mbuuroo mu Haaruna taa le ti, ka taa a koomalankoolu. Ì ñanta ka a domo dulaa jankuriŋo le to, kaatu a mu ì nii senuŋ baa le ti, sadaalu kono, mennu ka bondi nte Yaawe ye ka bo niŋ dimbaa la.
Alla sookilaalu niŋ moofaalaalu ñanta ka jarabi ñaameŋ
10 Luŋ naata soto, kewo doo naata finti taamaŋ-taamaŋo la, a ñoŋ Banisirayilankoolu kono. Wo kewo faamaa mu Misirankoo le ti, a baamaa mu Banisirayilankoo ti. Ñoosaboo naata duŋ a niŋ Banisirayilankoo doo teema, daakaa kono. 11 Ate kewo ñiŋ meŋ baalaa mu Banisirayilankoo ti, ye Yaawe too sooki, ka kuma jawoolu fo a ma. Ì naata a samba Musa ye. A baamaa faŋo too mu Selomiti le ti, Diburi, Dani lasili moo dimmusoo. 12 Ì ye a muta, a tarata marariŋ ì bulu, fo janniŋ waatoo meŋ Yaawe be a la lafoo yitandi la ì la a la kuwo to.
13 Bituŋ Yaawe naata diyaamu Musa ye ko, 14 “Wo meŋ ye sookiroo ke, a fintindi daakaa banta la. Moolu mennu bee tuloo seedeyaata a la, ì si ì buloolu laa a kuŋo kaŋ. Wo koolaa jamaa bee si naa a kurulabuŋ, ka a faa. 15 A juubee, a fo Banisirayilankoolu ye, moo-wo-moo ye kuma jawoo fo Alla ma, a dunoo be laa la a kaŋ ne. 16 Moo-wo-moo ye nte Yaawe too sooki, a maarii ñanta le ka faa. Jamaa bee le ñanta ka a kurulabuŋ, ka a faa. A keta Banisirayilanka le ti baŋ, waraŋ tumarankee, niŋ moo-wo-moo ye nte too sooki, a maarii ñanta le ka faa.
17 “Moo meŋ ye moofaa ke, a maarii ñanta le ka faa. 18 Moo-wo-moo ye wandi beeyaŋo faa, a ñanta a jooseyi la le, kaatu niyo niŋ niyo le be kuntakiriŋ. 19 Niŋ moo ye a ñoŋ moo barama, a ye meŋ ke a la, wo ñoŋo le ñanta ka ke a la. 20 Kati niŋ kati le mu, ñaa niŋ ñaa, ñiŋo niŋ ñiŋo. A maarii ye baramoo meŋ ke a mooñoo la, wo ñoŋo le ñanta ka ke a la. 21 Moo-wo-moo ye wandi beeyaŋo faa, a maarii ñanta le ka a jooseyi. Moo-wo-moo ye moofaa ke, a maarii ñanta le ka faa. 22 Wo luwaa kiliŋo le be taamandi la moo-wo-moo kaŋ, a keta Banisirayilanka ti baŋ, waraŋ tumarankee. Nte le mu Yaawe ali la Alla ti.”
23 Kabiriŋ Musa ye ñiŋ yaamaroolu dii Banisirayilankoolu la, ì naata wo kewo fintindi daakaa banta la, meŋ ye sookiroo ke. Ì ye a kurulabuŋ jee le, ka a faa. Ka bo niŋ wo la, ì ye Yaawe la yaamaroo taamandi le.
© Mandinka Bible © Bible Society in The Gambia, 2011
