Jiyolu mennu ka bo baloo bala ka kosoo saabu
1 Yaawe* diyaamuta Musa niŋ Haaruna ye, 2 ka ñiŋ yaamaroolu dii Banisirayilankoolu la ko:
Niŋ kee-wo-kee ka suleŋ, a maarii maŋ seneyaa. 3 Niŋ a ka suleŋ ne, waraŋ a jiyo sukita a baloo le kono, wo mu a bala kosoo le ti. A la seneyaabaliyaa keñaa be teŋ ne:
4 Kewo meŋ ka suleŋ, a ye i laa laaraŋ-wo-laaraŋ kaŋ, wo laaraŋo kosota le, aduŋ a siita feŋ-wo-feŋ kaŋ, a kosota le. 5 Aduŋ niŋ moo-wo-moo ye a la laaraŋo maa, a maarii ñanta a la duŋ feŋolu kuu la le, a ye jiyo taa, a ye i kuu. Kosoo be tara la a maarii bala le fo wulaaroo. 6 Moo-wo-moo siita feŋ kaŋ sulentoo siita meŋ kaŋ, wo maarii fanaa ñanta a la duŋ feŋolu kuu la le, a ye jiyo taa, a ye i kuu. Kosoo be tara la a maarii la le fo wulaaroo.
7 Moo-wo-moo ye wo sulentoo maa, a ñanta a la duŋ feŋolu kuu la le, a ye jiyo taa, a ye i kuu. Kosoo be tara la a bala le fo wulaaroo.
8 Kewo meŋ ka suleŋ, niŋ a ye daajiyo tupi moo-wo-moo kaŋ, meŋ be seneyaariŋ, wo maarii ñanta a la duŋ feŋolu kuu la le, a ye jiyo taa, a ye i kuu. Kosoo be tara la a bala le fo wulaaroo.
9 Kewo meŋ ka suleŋ, niŋ a siita feŋ-wo-feŋ kaŋ taamaraŋ beeyaŋo kaŋ, wo feŋo kosota le. 10 Moo-wo-moo ye wo feŋo maa a siita meŋ kaŋ, kosoo be tara la a maarii bala le fo wulaaroo. Moo-wo-moo ye wo feŋo sika fanaa, a maarii ñanta a la duŋ feŋolu kuu la le, a ye jiyo taa, a ye i kuu. Kosoo be tara la a bala le fo wulaaroo.
11 Kewo meŋ ka suleŋ, a ye moo-wo-moo maa, a ye a tara a maŋ a buloo kuu, a maarii ñanta a la duŋ feŋolu kuu la le, a ye jiyo taa, a ye i kuu. Kosoo be tara la a bala le fo wulaaroo.
12 Niŋ a ye keraŋo maa, meŋ keta daandiŋo ti, wo ñanta le ka teyi. Niŋ a ye keraŋo maa, meŋ dadaata yiroo la, a ñanta le ka kuu.
13 Kewo meŋ ka suleŋ, niŋ a la suleŋo naata loo, a ñanta i batu la le tili woorowula kontoo ye tambi, a ye a la duŋ feŋolu kuu. A si jii kendoo taa, a ye i kuu a la, wo le to a be seneyaa la. 14 Tili seyinjaŋ luŋo la, a si puraa baa fula waraŋ puraariŋ fula taa, a ye ì samba Bendulaa Tiriliisoo* dundaŋ daa to, a ye ì dii piriisoo* la jee, nte Yaawe ñaatiliŋo la. 15 Piriisoo si ì bondi sadaa* ti, a ye kiliŋo bondi junube kafarilaŋ sadaa ti, a ye kiliŋ doo bondi jani sadaa ti. Piriisoo be seneyandiroo saabu la a maarii ye teŋ ne, nte Yaawe ñaatiliŋo la.
16 Niŋ kewo ye i jii a faŋ na, a ñanta a ye jiyo taa, a ye a baloo muumewo kuu. Kosoo be tara la a bala le fo wulaaroo. 17 Duŋ feŋ-wo-duŋ feŋ, niŋ wo kosoo maata a la, a ñanta le ka kuu niŋ jiyo la. Kosoo be tara la wo feŋo bala le fo wulaaroo. 18 Niŋ kewo niŋ musoo kafuta, fo a ye i jii, ì moo fuloo ñanta jiyo taa la le, ì ye i kuu. Kosoo be tara la ì bala le fo wulaaroo.
19 Niŋ musoo ye a la karoo je, kosoo be tara la a bala le fo tili woorowula. Moo-wo-moo maata a la, kosoo be tara la a maarii bala le fo wulaaroo. 20 A ye i laa feŋ-wo-feŋ kaŋ waraŋ a siita feŋ-wo-feŋ kaŋ wo waatoo kono, kosoo be tara la wo feŋo bala le.
21 Moo-wo-moo ye a la laaraŋo maa, a ñanta a la duŋ feŋolu kuu la le, a ye jiyo taa, a ye i kuu. Kosoo be tara la a maarii bala le fo wulaaroo. 22 A be ke la wo le ñaama moo-wo-moo fanaa la, meŋ ye feŋo maa a siita meŋ kaŋ, 23 a keta a la laaraŋo ti baŋ, waraŋ siiraŋo siifaa-wo-siifaa. Kosoo be tara la a maarii bala le fo wulaaroo.
24 Niŋ kewo niŋ a kafuta, aduŋ a niŋ a la karoo jewo le kaañanta, a la kosoo be tara la kewo bala le fo tili woorowula. Kewo ye i laa laaraŋ-wo-laaraŋ fanaa kaŋ, a laaraŋo be koso la le.
25 Niŋ musoo ye a la kuuroo je fo tili jamaa, meŋ niŋ a la karoo maŋ kiliŋ, waraŋ a tambita a la karoo hapoo la, kosoo be tara la a bala le wo waatoo bee la. A be tara la a bala le ko a ka tara a bala ñaameŋ, niŋ a be a la karoo kono. 26 A ye i laa feŋ-wo-feŋ kaŋ waraŋ a siita feŋ-wo-feŋ kaŋ, wo waatoo kono, wo feŋo be koso la le, ko a ka ke ñaameŋ niŋ a be a la landoo kono. 27 Moo-wo-moo fanaa ye wo feŋolu maa, a ñanta a la duŋ feŋolu kuu la le, a ye jiyo taa, a ye i kuu. Kosoo be tara la a bala le fo wulaaroo.
28 Bari niŋ a la yeleboŋo naata loo, a ñanta i batu la le tili woorowula kontoo ye tambi. Wo le to a be seneyaa la. 29 Tili seyinjaŋ luŋo la, a si puraa baa fula waraŋ puraariŋ fula taa, a ye ì samba piriisoo ye Bendulaa Tiriliisoo dundaŋ daa to. 30 Piriisoo si kiliŋo bondi junube kafarilaŋ sadaa ti, a ye kiliŋ doo bondi jani sadaa ti. Piriisoo be seneyandiroo saabu la a maarii ye teŋ ne, nte Yaawe ñaatiliŋo la, ka bo a la landa kuuraŋo kono.
31 Wo to ali ñanta Banisirayilankoolu dandalaa la le, ì ye ì faŋolu jamfandi n na Bendulaa Tiriliisi Senuŋo* la, meŋ be ali la daakaa kono, niŋ kosoo be ì la waatoo meŋ na, niŋ wo nte ì si faa.
32 Ñiŋ ne mu luwaa ti kee-wo-kee ye, meŋ ka suleŋ, waraŋ a ye i jii, ka a tinna a ye kosoo soto. 33 A be wo le ñaama fanaa musu-wo-musu ye, a la kuuroo waatoo kono. Wo mu moo-wo-moo le ti, kee niŋ musu, niŋ a maarii ka suleŋ ne, aniŋ kee-wo-kee niŋ musoo ye i laa, wo kosoo tarata meŋ na.
© Mandinka Bible © Bible Society in The Gambia, 2011
