Duwaa ka Alla daani balafaa la
1 Hee Yaawe*, i hakiloo ye bula meŋ laata ǹ kaŋ,
ǹ na malu daa juubee.
2 Ǹ na keetaabankoo dunta luntaŋolu le bulu,
ǹ na suwolu, bantala moolu bulu.
3 Ǹ keta aliyatiimoolu ti, faantaŋolu,
m̀ baañolu keta furuyaamusoolu ti.
4 Ka jiyo miŋ, fo ǹ si kodoo joo,
hani loo, ǹ ka a saŋ ne.
5 Yookoo* le ka tara ǹ toŋo kaŋ taariŋ.
M̀ be bataariŋ ne de!
M̀ maŋ dahaa soto.
6 Ŋà m̀ buloo laa Misira le ye,
aniŋ Asiriya, ka domoroo soto.
7 Ǹ na alifaa foloolu ye junuboo ke,
ì te keriŋ kotenke,
silaŋ ntolu le ye ì la kuu kuruŋolu dunoo taa.
8 Joŋolu le marata ǹ na,
moo maŋ soto ka ǹ tankandi ì bulu.
9 Ǹ ka ǹ niyolu le laa ka domoroo soto,
kaatu hawusaritiyolu* ye wuloo balaŋ ne.
10 Konkoo ka ǹ kirikirindi le,
m̀ baloo ka kandi ko fuuroo.
11 Ì ye Siyoni* musoolu ñapinkaŋ ne,
aniŋ sunkutoolu, Yahuuda saatewolu kono.
12 Ì maŋ buuñaa dii alifaalu la,
ì ye maralilaalu deŋ ì buloolu la.
13 Ì ye fondinkewolu diyaakuyaa bula tuuroo la,
kambaanendiŋolu ka timili-tamali loositoolu koto.
14 Keebaalu ye saatee dundaŋ daato beŋo bula,
fondinkewolu la kumafeŋ kosoo danta.
15 Ǹ sondomoolu la seewoo danta le,
ǹ na doŋo yelemata ǹ ye saŋakumboo ti.
16 Ñaroo jolonta le ka bo ǹ kuŋo to,
kooroo boyita ǹ kaŋ, kaatu ŋà junuboo le ke.
17 Ǹ sondomoolu faŋo kono, ǹ jikilateyita le,
ñiŋ kuwolu kamma, kumboo ye ǹ ñaalu dibindi.
18 A juubee, Siyoni Konkoo kenseŋo le tuta looriŋ,
kunkuwuloolu be yaayi la a kaŋ.
19 Bari ite Yaawe be tu la maraloo la le,
i la mansasiiraŋo le be tu la jamaani naalaalu bee la.
20 Muŋ ne ye i ñinandi ntolu la ñiŋ saŋolu bee la,
muŋ ne ye a tinna ì ye i koo dii ǹ na fo waati jaŋ?
21 Yaawe, dukaree, m̀ murundi i faŋ kaŋ,
fo ǹ si muru naŋ,
i ye ǹ na baluwo kutayandi ko koomanto.
22 Fo duŋ, i ye i koo dii ǹ na le fereŋ,
fo i la kamfaa maŋ dandulaa soto baŋ?
© Mandinka Bible © Bible Society in The Gambia, 2011
