Yerusalaamu la woosiyo
1 Ayiwaalii, ñiŋ saatewo le kiideeriŋo be siiriŋ teŋ,
meŋ be faariŋ nuŋ moolu la tep!
A naata ke furuyaamusoo ti teŋ,
meŋ na kuwo warata nuŋ bankoolu kono!
Ate meŋ keta saatewolu kono musumansoo* ti,
a naata ke jommusoo ti.
2 Badaa-badaa suuto kumboo,
ñaajiyo ka bori a ñaasiŋo la.
A kanuntewolu bee kono,
a maŋ sabarindilaa kiliŋ soto,
a teeroolu bee ye jamfaa tiliŋ a la,
ì keta a jawoo ti.
3 Ceyi! Yahuuda taata mutoo kono,
a niŋ mantooroo niŋ doo koleŋo.
A be siiriŋ banku koteŋ moolu le kono saayiŋ,
a maŋ dahaa dulaa soto.
A bayindilaalu bee le ye a tara detoo kono,
ì ye a muta.
4 Daalaata Siyoni* ma, a la mbeedoolu bee be kumboo kaŋ,
kaatu moo buka naa Alla batu juuraloolu to.
A saatee dundaŋ daalu* kenseŋyaata,
saatee alifaalu la bendulaa,
a batudulaa ñaatonkoolu be woosii kaŋ.
A sunkutoolu niŋ tooroo,
ì be niikuyaa jawoo faŋo le kono.
5 Ee ite! Siyoni konnantewolu keta a la kuntiyo ti,
a jawoolu sawoo loota a la,
kaatu Yaawe* le ye mantooroo laa a kaŋ,
a la junuboolu la siyaa kamma.
A la dindiŋolu taata mutoo kono,
ì konnantewolu ye ì samba.
6 Fo Dimmusuriŋ* Siyoni la horomoo,
wo le keta kuu tambiriŋo ti teŋ?
A maralilaalu keta le ko minaŋolu,
mennu maŋ daañini dulaa soto,
ì sembentaŋolu borita
ì jawoolu ñaato.
7 Hee Yerusalaamu,
i hakiloo muruta i la sotofeŋ kummaalu kaŋ ne,
i la ñiŋ mantooroo niŋ yaayi waatoo la,
feŋolu mennu bee keta i taa ti kunuŋ tiloolu la.
Kabiriŋ i la moolu dunta i konnantewolu buloo kono,
i maŋ hani maakoyirilaa soto,
i konnantewolu ye ì ñaawali le,
ì jeleta i la boyoo la.
8 Ite Yerusalaamu, i ye junuboo ke jawuke le,
wo le ye i kosondi teŋ.
Mennu bee ye i horoma naata i koŋ,
kaatu ì ñaa loota i ŋayiboo le kaŋ.
A fele, i ka ŋuntaŋ i faŋ ma
ka i ñaadaa maabo.
9 Kosoo le be i la faani tuloo bala,
i maŋ i labaŋo muta feŋ ti,
wo le ye i la boyoo saŋarandi,
i maŋ sabarindilaa soto.
I kumboota, “Hee Yaawe, n na mantooroo juubee,
n jawoolu ye i kutu n na le.”
10 Kooni, i jawoolu buloo siita
i la sotofeŋ kummaalu ma le,
ì ye ì bee taa kewu!
I ñaa be mala kaŋ banku koteŋ moolu kaŋ,
ì ye i seyiŋ i la Batudulaa Senuŋo kono,
Yaawe ye mennu la duŋo koŋ,
i la moolu ka beŋ daameŋ.
11 Labaŋo, Yerusalaamu la moolu bee
ka yaayi domori ñiniŋo la,
ì be woosii kaŋ.
Ì ka ì la sotofeŋ kummaalu faliŋ domoroo la,
n danko ka baluu.
Yerusalaamu kumboota,
“Hee Yaawe, n juubee,
i ye n na bataa daa je.”
12 “Muna tambilaalu,
ñiŋ maŋ ke alitolu ye feŋ ti baŋ?
Ali a juubee,
fo niikuyaa le tambita nte la niikuyaa la baŋ,
meŋ laata n kaŋ,
Yaawe ye m mantoora meŋ na,
a la kamfaa saŋaroo waatoo la.
13 “Nte Yerusalaamu saatee senuŋo!
Yaawe ye dimbaa le kupi n kaŋ,
a la janoo dunta fo n kuloo kono.
A ye kutindiŋo le laa n ñaato,
a ye n yelemandi n koo la,
a ye n kenseŋo tu,
a ye n tu keturiŋ las.
14 “Ñok, a ye m muta,
ka n na junuboolu siti n ye yookoo* ti,
a faŋo buloo le ye ì siti,
fo ì nakita n kaŋo bala,
a ye a tinna n korita las.
Maariyo ye n duŋ moo bambandiŋolu le bulu,
n te n loo noo la ì fee.
15 “N na kee kendoolu mennu tarata m fee,
Maariyo ye i baŋ ì bee le to,
a ye kelediŋolu kumbendi n kamma
ka n na fondinkewolu kasaara,
ka Dimmusuriŋ Yahuuda doriŋ-doriŋ,
ko ì ka yiridiŋolu dori
ì bitidulaa to ñaameŋ.
16 “Nte wo! Kuwo meŋ laata n kaŋ,
n ñaajiyo be woyi la doroŋ,
sabarindilaa te n na,
meŋ si n jikoo bambandi.
N diŋolu kenseŋo le tuta,
kaatu n jawoolu ye i kutu n na le.”
17 Pirikit, jawoolu wututa naŋ Yaakuba kamma,
Yaawe le ye ì yaamari a la.
Yerusalaamu keta kosoo le ti
a dandanna banku moolu kono.
Siyoni ye a buloolu laa maakoyiri ñiniŋo la,
bari a maŋ hani sabarindilaa soto. A ko,
18 “Rim! A fele m boyita bataa kono,
moo bee, ali i lamoyi.
N na sunkutoolu niŋ fondinkewolu,
ì ye ì bee le samba mutoo kono.
Yaawe tilinta le,
bari hani wo m balanta a la kumoo la.
19 “Saayiŋ a fele, ŋa n kanuntewolu kumandi,
bari ì ye i bo n to le.
N na piriisoolu niŋ alifaalu,
ì faata saatewo kono taariŋ,
tumoo meŋ ì be domori ñiniŋo la,
fo a si ì bambandi ka baluu.
20 “Hawusaroo* be faaroo la mbeedoolu kaŋ,
buŋolu fanaa kono niŋ saayaa.
Hee Yaawe, a juubee m be mantooroo meŋ kono,
fo n niyo bee dewunta,
n kijoo kuntuta,
kaatu ŋa balambaatooyaa le tiliŋ i la.
21 “Woyi Yaawe, n na ŋuntaŋo moyi,
m maŋ sabarindilaa soto.
N jawoolu bee ye n na maasiiboo moyi le,
ì seewoota ko, ite le ye a ke n na.
I ye n laahidi luŋo meŋ na, a sindi,
i ye n jawoolu ke ko m be ñaameŋ.
22 “Yaawe, n jawoolu la kuu kuruŋ kewo juubee,
i niŋ ì ye janjuŋ,
ko i niŋ nte janjunta ñaameŋ,
n na junuboolu kamma la,
ŋa ŋuntaŋ jamaa le ke,
fo n jikilateyita.”
© Mandinka Bible © Bible Society in The Gambia, 2011
