Kibeyoninkoolu la feere kuwo
1 Mansakewolu mennu bee be Yoridani Boloŋo tilijii karoo la konkotundoo* kaŋ, Sefela* konkotundoo aniŋ wo Baa Baa* borindoo bee la ka taa fo Libanooni, ì ye Banisirayila la kuwo moyi le. Wo mansoolu le be Hitinkoolu, Amorinkoolu, Kanaaninkoolu, Perisi koomalankoolu, Hiwinkoolu aniŋ Yebusinkoolu mara kaŋ nuŋ. Kabiriŋ ì ye ñiŋ kuwo moyi, 2 ì bee kafuta ñoo ma ka keloo boyi Yosuwa niŋ Banisirayilankoolu kaŋ.
3 Kabiriŋ Kibeyoninkoolu ye a moyi, Yosuwa ye meŋ ke Yeriko la aniŋ Ayi, 4 ì ye feeroo siti: Ì wulita ka taa, ì ye i faŋ ke kiilaalu ti. Ì ye booto kotoolu niŋ wayini* sufurabooto kotoolu laa ì la faloolu koo to, wolu bee be lenkelaariŋ. 5 Ñiŋ kewolu ye samatoolu le duŋ, ì ye mennu dulaa bee batani, aniŋ duŋ feŋ kotoolu. Ì la mbuuroo, ì niŋ meŋ be taa kaŋ, bee be jaariŋ, a bee be fiinariŋ.
6 Bituŋ ì taata Yosuwa yaa daakaa to, meŋ be Kilikali. Ì ko a niŋ Banisirayila kewolu ye ko, “Ntolu ka bo naŋ banku jamfariŋ baa le to, ǹ lafita ñiŋ ne la, ǹ niŋ ali ye kambeŋo siti.” 7 Wo le to Banisirayila kewolu ko ñiŋ Hiwinkoolu ye ko, “Fo alitolu maŋ bo ǹ daala jaŋ ne, ǹ niŋ ali be kambeŋo siti noo la ñaadii le?”
8 Ì ko Yosuwa ye ko, “Ntolu mu i la joŋolu doroŋ ne ti.” Bari Yosuwa naata ì ñininkaa, a ko ì ye ko, “Alitolu faŋolu mu jumaa le ti, aniŋ ali bota mintoo le?” 9 Ì ye a jaabi ko, “I la joŋolu le mu ntolu ti. Ǹ ka bo naŋ banku jamfariŋ baa le to, Yaawe* la kuwo darajoo kamma la, i la Alla. Ŋà a la kuwolu kibaaroolu le moyi, a ye meŋ bee ke Misira, 10 aniŋ a ye meŋ bee ke Amori mansakee fuloo la, mennu be Yoridani tilibo karoo la: Sihoni, Hesiboni mansa aniŋ Oki, Basani mansa meŋ ye Asitaroti mara. 11 Aduŋ ǹ na alifaalu aniŋ moolu mennu bee be ǹ na bankoo kaŋ, wolu le ko ǹ ye ko, ‘Ali si ali faŋ kanta domori feŋolu la ali la taamoo waatoo, ali ye taa ì kaŋ, ali ye a fo ì ye ko, Ntolu mu ali la joŋolu le ti, ali niŋ ŋà kambeŋo siti.’ 12 Ǹ na ñiŋ mbuuroolu be kandiriŋ ne nuŋ, kabiriŋ m̀ be ì kafu kaŋ ñoo ma suwo kono, luŋo meŋ na m̀ be wuli la ka naa ali kaŋ. Bari saayiŋ ali ì juubee, ì bee be jaariŋ ñaameŋ, aniŋ ì be fiinariŋ ñaameŋ. 13 Ali ye ñiŋ wayini sufurabootoolu mennu je teŋ, kabiriŋ m̀ be ì soodi kaŋ nuŋ, ì kutamaalu le mu. Bari ali ì juubee, ì bee be faraŋ-farandiŋ. Aduŋ ǹ na duŋ feŋolu aniŋ ǹ na samatoolu bee la tiñaa sunta ñiŋ dulaa jaŋo taamoo le la.”
14 Bituŋ Banisirayila kewolu ye ì la domoroo doolu muta. Bari ì maŋ Yaawe ñininkaa kuwo ñiŋ to. 15 Yosuwa niŋ ì teeriyaata, a niŋ ì ye kambeŋo siti ka ì niyolu tanka, aduŋ Banisirayila ñaatonkoolu ye kambeŋo ñiŋ bambandi niŋ kaloo la.
16 Ì niŋ Kibeyoninkoolu la kambeŋo sitoo tili sabanjaŋ luŋo koolaa, Banisirayilankoolu naata a moyi ko, ñinnu mu ì siiñoolu le ti. Ì bodulaa maŋ jamfa ì la. 17 Bituŋ Banisirayilankoolu naata paree taamoo la. Tili sabanjaŋ luŋo, ì naata futa Kibeyoninkoolu la saatewolu to: Kibeyoni, Kefira, Beeroti aniŋ Kiriyati-Yeyarimu. 18 Bari Banisirayilankoolu maŋ naa ì kelendi, kaatu ì la ñaatonkoolu ye i kali ñiŋ moolu ye Yaawe too le la, Banisirayila la Alla. Bituŋ Banisirayilankoolu bee ye ì la ñaatonkoolu jalayi. 19 Bari ñiŋ ñaatonkoolu naata ì jaabi, ì ko ì ye ko, “Ŋà n kali ì ye Yaawe too la, Banisirayila la Alla, aduŋ saayiŋ ǹ te ì maa noo la. 20 M̀ be meŋ ke la ì la, wo le mu ñiŋ ti: ǹ kana kaloo tiñaa ka ì faa. I si a je, Alla la kamfaa te futa la m̀ ma.” 21 Ñaatonkoolu tententa ka diyaamu, ì ko, “Ali ŋà ì bula, ǹ kana ì faa, bari ǹ si ì ke ǹ na moolu ye looñinilaalu ti, aniŋ jiibiilaalu.” Banisirayilankoolu la ñaatonkoolu ye ñiŋ kumakaŋo le fo ì ye.
22 Bituŋ Yosuwa ye Kibeyoninkoolu kumandi, a ko ì ye ko, “Muŋ ne ye a tinna ali ye ǹ neenee, ka a fo ǹ ye ko, ali bota naŋ dulaa jaŋ ne to, wo ye a tara ali bota ǹ daala jaŋ ne? 23 Ali keta dankamoolu le ti. Ali be tu la ke la looñinilaalu le ti, aniŋ jiibiilaalu n na Alla batudulaa buŋo to.” 24 Ì ye Yosuwa jaabi, ì ko a ye ko, “Ntolu mu i la joŋolu le ti, ì ye a fo ǹ ye senunke le, Yaawe i la Alla ye a la dookuulaa Musa yaamari le, ka ñiŋ bankoo bee dii ali la, aniŋ ka bankoo ñiŋ diŋolu bee turutumbuŋ. Ali la kuwo, wo le ye ntolu sila ka ǹ niyolu tankandi, wo le ye a tinna ŋà ñiŋ ke. 25 Saayiŋ m̀ be i bulu, feŋ-wo-feŋ beteyaata ite fee, wo ke ǹ na.”
26 Yosuwa naata ì tankandi Banisirayilankoolu ma, ì maŋ naa ì faa. 27 Wo luŋo le mu, Yosuwa ye Kibeyoninkoolu ke looñinilaalu niŋ jiibiilaalu ti moolu ye aniŋ Yaawe la sadaabodulaa* to, ate faŋo be naa daameŋ tomboŋ na. Bituŋ itolu tuta wo le ñaama fo ka naa bula bii tiloo la.
© Mandinka Bible © Bible Society in The Gambia, 2011
