Tankañini dulaa saatewolu
(4 Musa 35:9-345 Musa 19:1-13)1 Bituŋ Yaawe* ko Yosuwa ye ko, 2 “A fo Banisirayilankoolu ye ko: Ali ye saatewolu tomboŋ ka ke tankañini dulaa saatewolu ti, ko ŋa ali yaamari ñaameŋ ka bo niŋ Musa la. 3 Niŋ moo ye a ñoŋ moo faa lañinoo kono, aduŋ a maŋ ke tawoo kaŋ ti, a maarii si bori noo jee le ka tanka ñiŋ moo faariŋo la moolu ma, niŋ ì wulita julujoo la. 4 Niŋ a maarii borita ka taa ñiŋ tankañini dulaa saatewolu to, a ñanta loo la saatewo dundaŋ daa* le to, a ye a la kuwo saata saatewo alifaalu ye. Wolu le ñanta a bula la, a ye duŋ ì la saatewo kono ka dulaa dii a la, a be sabati la daameŋ. 5 Niŋ ñiŋ moo faariŋo la julujoolaa bulata a nooma jee, ì maŋ ñaŋ na ñiŋ moofaalaa dii la a la. Kaatu a ye a la moo faa lañinoo le kono, a maŋ ke a jawu ti kabiriŋ folooto. 6 A ñanta sabati la saatewo kono jee le, fo waatoo ye sii, waatoo meŋ a ñanta ka loo kiitiyo ñaatiliŋo la moolu ñaato, aniŋ fo niŋ piriisi* kuntiyo meŋ be piriisi kuntiiyaa la wo waatoo la, faata. Niŋ wo keta, ñiŋ moofaalaa si seyi noo a yaa le, a bota daameŋ.”
7 Bituŋ ì naata Kedesi tomboŋ Kalilee kono Nafutali konkotundoo* kaŋ, Sekemu Efurayimu konkotundoo kaŋ, aniŋ Kiriyati-Ariba meŋ mu Heburoni ti, Yahuuda konkotundoo kaŋ. 8 Yoridani Boloŋo kara doo la, Yeriko tilibo karoo la, ì ye Beseri le tomboŋ wo to meŋ be konkotundoo kaŋ, Rubeni lasiloo ye. Bituŋ Kadu lasiloo moolu, ì ye Ramoti le tomboŋ wolu ye meŋ be Kileyadi tundoo kaŋ. Bituŋ Manase lasiloo moolu, ì ye Kolani le tomboŋ wolu ye meŋ be Basani tundoo kaŋ.
9 Ñinnu le mu saatewolu ti mennu tombonta Banisirayilankoolu ye, aniŋ tumarankewolu mennu be ì kono. Moo-wo-moo si bori noo jee le, niŋ a ye a tara, a ye a ñoŋ moo le faa lañinoo kono, i si a je, a si tanka noo julujoolaa la a faa ma, janniŋ a be loo la kiitiyo to moolu ñaatiliŋo la.
© Mandinka Bible © Bible Society in The Gambia, 2011
