Yuuba la Elifasi jaaboo
1 Bituŋ Yuuba ye jaabiroo ke ko:
2 Ŋa a jiki, n na kamfaadaa ñanta peesa la le,
ka a niŋ n na bataa kuwo bee laa peesarilaŋo kaŋ.
3 A be koyiriŋ ne ko,
ate le be kuliyaa la bankumunkoo ti.
Wo le ye a tinna n daakumoolu maŋ diyaa.
4 Alla Tallaa ye m buŋ a la kalabeñoolu le la.
Ì kunoo dunta n jaatoo kono.
Alla ye silaŋ kuwolu le randi n kamma.
5 Fo fali dalibaloo ka kuma le baŋ,
niŋ a ye ñaamoo soto a ñaama,
waraŋ fo ninsi senelaa ka kuma le baŋ,
niŋ a ye domoroo soto a ñaama?
6 Jumaa le si domori koontaŋo domo noo, diyaa te meŋ bala?
Muŋ diyaa le be siiseekili daajiyo bala?
7 M maŋ lafi ka a maa.
Ñiŋ domori siifaa ka nte jusoo le maa.
8 M be ñaaniriŋ, ŋa Alla daani meŋ na, a ye a ke n ye,
ŋa meŋ jiki, a ye a dii n na.
9 Muŋ ne ye a tinna Alla maŋ n teyiŋ-teyiŋ,
a ye m bula, ŋa faa?
10 Wo le be ke la nte la dahaa ti.
N si podiŋ-podiŋ seewoo kamma la,
m be dimi jawoo kono ñaa-wo-ñaa,
kaatu m maŋ Mansa Senuŋo la yaamaroolu soosoo.
11 Nte ŋa muŋ sembe le soto ka tara baluwo to?
Muŋ ne ye a tinna m be tara la baluuriŋ,
jiki te n na kuwo to?
12 Fo nte semboo be le ko
beroo la kuliyaa be ñaameŋ baŋ?
Fo nte balajaatoo dadaata niŋ jaawaloo le la baŋ?
13 Tooñaa-tooñaa, nte te m faŋ maakoyi noo la,
aduŋ deemaaroo semboo, wo bee bota m bulu le.
14 Moo meŋ be niitooroo kono
ka suula a teerimaalu la ŋaniya kendoolu le la.
Niŋ wo nte,
Alla Tallaa silaŋñaa semboo bee si baŋ a bala.
15 Bari alitolu, mennu mu n kafuñoolu ti,
ali maŋ ke jiki moo ti.
Ali la kuwo ye m moonee le komeŋ jiiboroo,
jaa naata, a bee suusuuta.
16 Waati sotota, a be faariŋ niŋ jiyo la.
17 Jaa waatoo kono, a bee naata suusuu.
Niŋ kandoo waatoo naata,
a bee ka yeemaŋ ne ka bo a taradulaalu to.
18 Juloolu mennu ka sele ñonkomoolu kaŋ,
ka fili a maafaŋolu to la le.
Ì ye muruŋ-muruŋ keñewuloo* kono, fo mindoo ye ì faa.
19 Tema juloolu ye jii sotodulaalu ñini,
Seba taamalaalu ye jiki.
20 Ì niŋ jiki baa le ka a waliŋ, bari niŋ ì futata jee,
ì si jaakali, ì ye jikilateyi.
21 Alitolu keta nte ye le komeŋ wo jii sotodulaalu be ñaameŋ.
Ali ye n na bataadaa je, ali pisaalita.
22 Fo n nene ka a fo ali ye le baŋ,
ali ye n so feŋ na,
waraŋ ka n duku feŋ na, ka bo ali la fankoolu to,
23 waraŋ ka m bondi n jawoo bulu,
waraŋ ka n kumakaa fitinamoo bulu?
24 Saayiŋ ali n karandi, m be n deyi la le.
Ali ye m fahaamundi, m boyita ñaameŋ.
25 Tooñaa kumoo ka dimi le,
bari alitolu la kumakaŋolu ye muŋ ne yitandi?
26 Alitolu ye a miira,
ali si nte tilindi noo niŋ ali neŋolu la baŋ?
Ali ye nte, moo bataariŋo, la kumoo ke ko foño kenseŋo.
27 Alitolu be alikuuroo* le faŋo ke la aliyatiimoolu la.
Ali ye ñoo fuufuu ali teeriñolu la.
28 Saayiŋ, ali ke moo kendoo ti baŋ, ali ye n juubee naŋ.
Nte te faniyaa fo la ali ñaatiliŋo la.
29 Ali a daŋ wo la, ali kana kasoo fo.
Ali i miira, nte be tooñaa le kaŋ hani saayiŋ.
30 Fo n neŋo ka kuma jenkeriŋ ne fo baŋ?
Fo nte te tooñaa niŋ faniyaa bo noo la ñoo to baŋ?
© Mandinka Bible © Bible Society in The Gambia, 2011
