Elifasi la diyaamu labaŋo
1 Bituŋ Elifasi Temaninkoo ye jaabiroo ke ko:
2 Hadamadiŋo si muŋ nafaa le soto noo Alla ye?
Hani a ñaamendiŋ baa ye muŋ nafaa le soto a ye?
3 Niŋ i keta moo tilindiŋo ti,
wo be muŋ jusulaa kuu le dii la Alla Tallaa la,
waraŋ niŋ i taaraŋ siloolu maŋ sootaari soto,
wo be muŋ tinee le dii la a la?
4 Fo i ye a miira le ko,
i la Alla ñaasilaŋo wo le ye a tinna a ye jaraboo laa i kaŋ
ka i samba kiitiyo ñaatiliŋo la?
5 Hanii, i la kuu kuruŋolu le siyaajawuta,
aduŋ i la junube kuwolu maŋ dandulaa soto.
6 I ka sankoo kaniŋ i baadiŋolu bulu,
a buka ke daliila kaŋ ti.
I ka kewolu la duŋ feŋolu wura ì la,
i ye ì kenseŋo bula.
7 I buka jii dii moo bataariŋolu la ka i miŋ,
i ka konkotoolu bali domoroo la.
8 I ye i la semboo taa, aniŋ i la makaamoo
ka bankoo kenoo bee taa.
9 I ka furuyaamusoolu bayi ì bulu kenseŋo,
i ka aliyatiimoolu la jikiraŋo tiñaa.
10 Wo le ye a tinna kutindiŋolu be laariŋ i ye karoo bee la,
silaŋ baa dunta i la waati kiliŋ.
11 Dibi baa naata duŋ fo i buka i je noo,
waamoo ye i kunuŋ.
12 Fo Alla maŋ tara Arijana kono baŋ?
Looloolu juubee doroŋ,
ì jamfabaata santo ñaameŋ!
13 Fo wo le ye a tinna baŋ i kumata ko,
“Alla ye muŋ ne loŋ?
A si kiitindiroo noo ñaadii le minaayi dibiŋolu kono,
14 mennu ye a muuri,
fo a te jeroo ke noo la,
niŋ a be taamoo la saŋo kara jenjeŋo la?”
15 Fo i be tu la taama la niŋ wo sila kotoolu le la baŋ,
moo kuruŋolu ka tara mennu nooma?
16 Ì ye ì ñafu, janniŋ ì la waatoo ka sii,
ì ye ì koosa, komeŋ niŋ waamoo ye buŋo fondamaŋo koosa.
17 Ì ka a fo Alla ye ko,
“Ntolu bula m̀ faŋ bulu!
Alla Tallaa si muŋ ne ke noo ntolu la?”
18 Bari hani wo bee,
ate Alla le ye ì la buŋolu kono fandi neemafeŋolu la.
Moo kuruŋolu la feeroolu,
nte niŋ wolu teemoo jamfata ñoo la le.
19 Moo tilindiŋolu ñaa ka boyi itolu kuruŋolu la kasaaroo kaŋ ne,
ì ye kontaani,
sootaaribaloolu ye jele ì la, ka a fo ko,
20 “Tooñaa-tooñaa, ǹ jawoolu kasaarata le,
aduŋ ì ye meŋ tu,
dimbaa ye wo fanaa domo le.”
21 Tuubiseyi Alla ma,
i niŋ a ye tara diyaariŋ,
ñaatotaa be naa i kaŋ niŋ ñiŋ siloo doroŋ ne la.
22 M batu ate Alla faŋo ye i kawandi,
i ye a la kumakaŋolu muta i sondomoo kono.
23 Niŋ i ye i faŋ seyi Alla Tallaa ma,
i be muru la i ñaama le.
Tilimbaliyaa kuwolu bee bondi i yaa.
24 I la sanoo fayi buutoo kono,
i la sanoo meŋ bota Ofiri tundoo kaŋ,
a fayi bolondiŋo kono, beroolu be daameŋ.
25 Alla Tallaa ye ke i la sanoo ti,
aniŋ i la kodiforo ñiimaa.
26 Ate Alla Tallaa le be naa ke la i la seewoo sababoo ti,
aduŋ i te malu la a ñaatiliŋo la.
27 I be a daani la le,
aduŋ a be i moyi la le,
aduŋ i be i la laahidoolu timmandi la le.
28 I ye meŋ hame,
a be ke la i ye le,
aduŋ i taaraŋ siloolu si mala.
29 Ate Alla le ka faŋ wara moolu la kuwo jindi,
a ye fammajiilaalu maakoyi.
30 A be moo tanka la le,
hani meŋ faŋo ye sootaaroo soto.
Moo buloo la seneyaa, wo le be i maarii kanandi la.
© Mandinka Bible © Bible Society in The Gambia, 2011
