1 N niyo korita,
m baluu tiloolu be naa baŋo le la,
kaburoo le ka m batu.
2 Ñaawalilaalu ye n kuru,
m faŋo ñaa le loota ì la jawuyaa kuwo kaŋ.
3 Alla, ite faŋo le be nte sankayaa la.
Jumaa le si nte sankayaa noo ite koolaa?
4 Baawo ite faŋo le ye ì sondomeñaalu suki
fo ì kana fahaamuroo ke noo,
wo kamma la, i kana ì sawoo londi.
5 Fo i be a ke kaŋ ne baŋ,
ko kuma kotoomaa ye a fo ñaameŋ?
Niŋ moo ye a teeroolu jamfaa tinewo kamma,
a diŋolu ka toora le.
6 Alla ye n ke jelefeŋo le ti moo bee ye,
moo meŋ, moolu ka daajiyo fayi a ñaadaa kaŋ.
7 Niitooroo ye n ñaalu dibindi,
m baloo keta ko koloma jaaroo.
8 Moolu mennu ye a miira ko, itolu tilinta le,
aduŋ ì maŋ sootaari soto,
wolu bee jaakalita ñiŋ kuwo la le,
bituŋ ì ye a muta ko, nte mu moo kuruŋo le ti.
9 Bari moo meŋ tilinta, wo be tu la a la siloo le kaŋ,
aduŋ moo meŋ buloolu seneyaata,
semboo be tu la wara la le doroŋ.
10 Bari ali naa, ali bee, ali ye a kata kotenke!
N te moo ñaamendiŋo tara la ali kono.
11 M baluu tiloolu banta,
n na feeroolu janjanta, aniŋ n hame kuwolu.
12 N teeroolu ko, suutoo mu tilibuloo le ti,
maloo be jaŋ ne, a keta diboo ti ñaa-wo-ñaa.
13 M maŋ jiki soto, fo kaburoo meŋ be naa ke la n yaa ti,
daameŋ m be n na laaraŋo loo la jee diboo kono.
14 M be kaburu dinkoo le kumandi la m faa ti,
ŋa tumboolu kumandi m baa ti, aniŋ m baarimmusoolu.
15 Nte la jikoo be tara la muŋ ne kaŋ?
Jumaa le ye jiki koteŋ je nte la karoo la?
16 Fo n niŋ jikoo ñiŋ be taa ñoo la kaburoo kono le baŋ?
Fo n niŋ a be saareŋ na ñoo la le baŋ, ka ke bankumunkoo ti?
© Mandinka Bible © Bible Society in The Gambia, 2011
