1 N ñewunta n na baluwo faŋo le la.
Wo kamma la, n te n deyi la n na bataa kuwo saatoo la.
Meŋ ye a tinna n na baluwo be kuniyaa la m bulu,
a ñanta finti la le.
2 M be a fo la Alla ye le: Kana n halaki.
A fo n ye, daliiloo meŋ ye a tinna, i be n tuumi la.
3 Nte batandoo ye muŋ nafaa le soto ite ye?
Muŋ ne ye a tinna i be balaŋ na feŋo to,
ite faŋo ye meŋ daa?
Muŋ ne ye a tinna, i be kuruŋolu bula la,
ì la feere kuwolu be ñaatotaa soto la?
4 Fo ite fanaa ka kuwolu juubee niŋ hadamadiŋ siloo le la baŋ?
Fo i la ì fahaamuñaa ka ke le ko ntolu baŋ?
5 Fo ite baluu tiloolu be dooyaariŋ ne baŋ,
ko hadamadiŋolu taa be dooyaariŋ ñaameŋ?
Fo i baluu saŋolu be dooyaariŋ ne baŋ,
ko hadamadiŋolu taa be dooyaariŋ ñaameŋ?
6 Fo wo le ye a tinna baŋ,
i be korontoriŋ ka n na boyidaa ñini,
aniŋ ka n na junube kuwo kisikisi?
7 Ite ye a loŋ ne ko, nte maŋ boyi,
aduŋ ko, moo te n tanka noo la ite bulu.
8 Ite faŋo le ye nte daa, ite le ye m muluŋo ke n na,
saayiŋ, ite le fanaa naata n kasaara.
9 A loŋ ko, ite le ye n daa komeŋ potoo kitiŋo.
Saayiŋ, fo i be m murundi la bankumunkoo ti le baŋ?
10 Ite le ye n woyi ko keekewo,
i ye n simbindi ko feenewo.
11 I naata n kuloolu sunkuru ñoo bala, niŋ fasoolu la,
i ye ì muuri suboo la, aniŋ balajaatoo.
12 I ye baluwo dii n na,
i naata kanu bambaloo yitandi n na,
aduŋ i la n na kuwo hakilituwo,
wo le ye a tinna n tarata baluwo to.
13 Bari ñiŋ kuwolu tarata maaboriŋ i kono le,
aduŋ ŋa a loŋ ne ko,
wo waatoo bee la ñiŋ ne be i hamoo to:
14 I tarata n koroosi kaŋ ne, fo m be junube kuu ke la,
niŋ i ye wo je, i te yamfa la n na junube kuwo la.
15 Niŋ a ye a tara m boyita le,
wo to kooroo boyita n kaŋ ne!
Bari hani niŋ m boloota le fanaa,
n te n sañoo wulindi noo la.
Kaatu n dunta malu kuwo le kono,
n tarata niitooroo kono.
16 Niŋ ŋa n sañoo wulindi,
i ye tara n deema kaŋ komeŋ jatoo,
i ye n toorandi kotenke i sembe kaawakuwo la.
17 I ye tu la seede kutoolu kii la n kaŋ,
i la kamfaa n kamma ye lafaa kotenke,
i ye naa bataa kuwo laa n ye ñoo kaŋ,
komeŋ kelediŋolu ka ñoo faliŋ-faliŋ ñaameŋ.
18 Muŋ ne ye a tinna i ye nte fintindi ka bo wuluuñaŋo kono?
Nte ñanta faa la le, janniŋ ñaakesoo ka boyi n kaŋ.
19 Ka bo wuluuñaŋo kono doroŋ,
ì ye n tentendi kaburoo kono.
A ye ke ko n nene maŋ soto.
20 Fo nte baluu tiloolu maŋ ke dantaŋ doroŋ ne ti baŋ?
M bula m faŋ ma, ŋa niiseewoo soto waatoo kono,
meŋ too tuta n siyo to.
21 A te mee la, m be taa fureeduu,
daameŋ dibi baa be jee,
daameŋ moo buka bo jee, ka muru naŋ jaŋ kotenke.
22 Ñiŋ dulaa to, maloo nene buka soto jee.
Ñiŋ dulaa to, diboo doroŋ ne ka tara jee,
aniŋ jaakaloo.
© Mandinka Bible © Bible Society in The Gambia, 2011
