1 M be lafiriŋ ne
n kuŋo ye ke woyoo ti,
n ñaalu ye ke ñaajii daloo ti,
fo n si kumboo suuto tili,
ñiŋ kamma ì ye n na kanu moolu mennu faa.
2 M be lafiriŋ ne
ŋa jiyaa dulaa soto keñewuloo* kono,
komeŋ jamfajaŋ taamalaa.
Fo n si n na moolu bula,
ŋa taa ka bo ì kono,
kaatu ì bee jeenelaa,
aduŋ ì mu fisiriwallee kafoo le ti.
3 Yaawe* ko:
“Ì neŋ kolomoolu be jenkeriŋ ne ko kalandiŋo,
aduŋ ì maŋ tara tooñaa ye,
ì be faniyaa le ye bankoo kaŋ.
Ì ka tu kuruŋyaa le laa la kuruŋyaa kaŋ,
ì maŋ nte Yaawe horoma fereŋ.
4 Wo to moo-wo-moo si i kekuu a siiñoo to,
moo kana laa hani a baadiŋ kiliŋ na,
kaatu baadiŋo bee, baadiŋ neeneerilaa,
moo-wo-moo ka tara a siiñoo tiñaa la taariŋ.
5 Moo-wo-moo ka a siiñoo neenee le,
hani kiliŋ buka tooñaa fo.
Ì ye ì neŋolu kuluu faniyaa le la,
ì ka kuu jawoo ke, ì korita tuubiseyi la.
6 Ka mantoora jurumi mantoora kaŋ moolu ye,
aniŋ ka neeneeri laa neeneeri kaŋ,
ì maŋ lafi ka nte Yaawe loŋ.”
Yaawe le ye a fo.
7 Yaawe Alihawaa Maariyo* ye ñiŋ ne fo ko:
“A juubee, m be ì jarabi la le ka ì kotobo,
wo koolaa m be muŋ ne ke la, n na moolu kekuwo kamma la?
8 Ì neŋ kolomoo be saŋarariŋ ne ko kalabeñoo,
a ka neeneeri kumoo doroŋ ne fo.
Moo-wo-moo ka kayiroo le fo a siiñoo ye a daa to,
bari a sondomoo kono,
a ka ñapinkaŋo le feere a kamma.
9 Fo m maŋ ñaŋ na ì jarabi la ñiŋ kuwolu la baŋ?
Fo m maŋ ñaŋ na juloo joo la ñiŋ banku siifaa to baŋ?”
Yaawe le ye a fo.
10 M be kumboo la le ka lemba konkoolu ye,
ŋa beeyaŋ daañini dulaalu la kuwo saŋawoosii,
kaatu ì jaata le ka kenseŋyaa,
hani moo buka tambi niŋ jee la,
ninsi kumakaŋ buka moyi jee.
Kunoolu borita jee la le, aniŋ wulakono daafeŋolu.
11 Yaawe ko:
“M be Yerusalaamu ke la tumbuŋo le ti,
a ye ke kunkuwuloolu la daakaa ti.
M be Yahuuda saatewolu kenseŋyandi la le,
moo te sabati la jee.”
12 Jumaa le la ñaameŋo ye a sii ka ñiŋ kuwo bee fahaamu,
Yaawe ye a fo jumaa le ye, fo a maarii si a fataŋ-fansi moolu ye?
Muŋ ne ye a tinna bankoo bee tumbunta fereŋ,
a kenseŋyaata ko keñewuloo,
aduŋ moo le faŋo buka tambi niŋ jee la?
13 Yaawe ko, “Meŋ ye wo saabu wo le mu, ì ye ì koo dii n na luwaa la le, ŋa meŋ landi ì ye. Ì maŋ n na kumakaŋo muta, waraŋ ka a taamandi ko ŋa a fo ì ye ñaameŋ. 14 Ì ye wo tu jee le, ì kanjaaramaalu bulata kuwolu nooma ì faŋolu sondomoolu ye ì samba mennu kaŋ. Ì ka Baali* jalaŋolu le batu ko ì mumuñolu ye ì karandi a la ñaameŋ.”
15 Wo kamma la Yaawe Alihawaa Maariyo, Banisirayila la Alla, ye ñiŋ ne fo ko: “A juubee, m be ñiŋ moolu domorindi la domori kunaŋo le la, ŋa ì mindi kunoo la. 16 M be ì janjandi la banku koteŋolu kaŋ ne taariŋ, itolu niŋ ì mumuñolu nene maŋ mennu loŋ. M be keloo le naati la ì kaŋ niŋ hawusaroo* la, fo ŋa ì baŋ kasaara la.”
Yerusalaamu moolu ye maakoyiroo kumboo
17 Yaawe Alihawaa Maariyo ye ñiŋ ne fo ko:
“Ali miirali ke, ali ye musu saŋakumboolaalu kumandi,
ali ye kiilaa kii a noolaa baalu ye ì kono.
18 Ì ye i tariyaa naŋ,
ì ye naa lemba ali ma,
fo ali ñaalu ye faa niŋ ñaajiyo la,
ñaajiyo ye buruntu ali ñaasiŋolu la.
19 Lembakaŋo moyi naŋ Siyoni* ko:
‘Hee, ǹ kasaarata le!
Maloo feeneeta ǹ kaŋ ne!
Fo ǹ si bo ñiŋ bankoo kaŋ doroŋ,
kaatu ì ye ǹ na buŋolu boyi le.’ ”
20 Yeremiya ko:
“Silaŋ, alitolu musoolu, ali ali tuloo loo Yaawe la kumoo la,
ali tuloo ye a la kumakaŋo moyi.
Ali ali dimmusoolu karandi saŋa lembañaa la,
moo-wo-moo si a siiñoo karandi saŋawoosiyo la.
21 Saayaa dunta naŋ ǹ na palanteeroolu le la,
a ye i seyiŋ ǹ na mansabuŋolu kono,
a ye dindiŋolu siyo kuntu mbeedoolu kaŋ,
ka taa fondinkewolu, bendulaa kenoolu to.”
22 Yaawe ko n si ñiŋ ne fo ko:
“Moo furewolu be tara la fayiriŋ ne,
ì jambandimaa kene fanuŋolu kono.
Ì be ke la le ko niŋ katirilaalu ye siimaŋo kati,
ì ye a bulumaalu tu fatafatariŋ kooma,
moo maŋ soto ka ì sika.”
23 Yaawe ye ñiŋ ne fo ko:
“Moo ñaamendiŋ kana kibiri a la ñaameŋo la,
sako moo bambandiŋ si kibiri a la bambaŋo la,
waraŋ naafulutii si kibiri a la naafuloo la.
24 Niŋ meŋ be kibiri la,
a si kibiri ñiŋ na ko,
a ye nte Yaawe* la kuwo fahaamu le ka n loŋ,
ka ñiŋ loŋ ko,
nte le mu Yaawe ti,
n ka taama kanu bambaloo le la,
nte le ka kiitiyo teyi,
aniŋ ka tiliŋo taamandi duniyaa kono,
aduŋ wolu le mu kuwolu ti mennu ka n seewoo.”
Yaawe le ye a fo.
25-26 Yaawe ko, “A juubee, luŋ be sii la m be ñiŋ banku moolu jarabi la le: Misirankoolu, Yahuuda moolu, Edomunkoolu, Ammoninkoolu, Mowabinkoolu, ka taa lasiloolu mennu be sabatiriŋ keñewuloo dandaŋolu la. Ñiŋ banku moolu sunnata ñaa-wo-ñaa, wo maŋ a tinna ì ka nte batu. Alitolu Banisirayilankoolu fanaa be wo le ñaama. Ali balajaatoolu sunnata le, bari ali sondomoolu maŋ faliŋ.”
© Mandinka Bible © Bible Society in The Gambia, 2011
