Yerusalaamu la boyoo bankeeta
1 Yaawe* la kumoo naata nte Yeremiya kaŋ, tuma meŋ na Mansa Sedekiya ye Malikiya dinkewo Pasihuri, aniŋ Maaseya dinkewo Piriisi* Sefaniya kii n kaŋ, ì ko n ye ko: 2 “Dukaree, Yaawe ñininkaa ǹ ye, kaatu Babiloni mansakewo Nebukanesa be pareeriŋ ne ka m̀ boyinkaŋ keloo la. Tumandoo Yaawe be kaawakuwo ke la ǹ ye le ko, a ye a ñoŋ jamaa ke ñaameŋ koomanto. Niŋ wo keta, a be muru la a koo la le ka fata m̀ ma.”
3 Bari ŋa ì jaabi le ko, ì si a fo Sedekiya ye, 4 Yaawe Banisirayila la Alla ye ñiŋ ne fo ko: “A juubee, m be kelejooraŋolu murundi la ali faŋolu le kaŋ, mennu be ali bulu, ali ye mennu taa ka Babiloni mansakewo kele, meŋ niŋ a la kelediŋolu ye ali suki tata sansaŋo kono. M be ì samba la naŋ ñoo kaŋ ñiŋ saatewo teema le. 5 Nte faŋo le be ali kele la niŋ m bulu sembemaa baa la, aniŋ n na kamfaa, jusukandoo, aniŋ diminnaa fijoo la. 6 M be ñiŋ saatewo moolu busa la le, hadamadiŋolu niŋ beeyaŋolu kafuriŋo. Alibalaa kuuraŋ jawoo le be ì faa la. 7 Niŋ wo keta fokabaŋ, m be Yahuuda mansakewo Sedekiya niŋ a la mansakundaa dookuulaalu, ka taa ì niŋ ñiŋ saatewo moolu duŋ na Babiloni mansakewo Nebukanesa niŋ a la moolu bulu le, ì jawoolu, mennu be ì niyo nooma. Wo le be ke la moolu ti mennu kanata hawusaroo* ma, konkoo, aniŋ alibalaa kuuraŋo. Nebukanesa be ì faa la hawusaroo la le. A te balafaa la ì ye, waraŋ ka yamfa ì ye, waraŋ ka hiina ì la.” Yaawe le ye a fo.
8 “Wo koolaa fanaa, a fo ñiŋ moolu ye, nte Yaawe ye ñiŋ ne fo ko: A juubee, ŋa sila fula le landi ali ñaa koto, meŋ keta baluwo niŋ saayaa ti. 9 Moo-wo-moo tuta siiriŋ ñiŋ saatewo kono, hawusaroo le be a faa la, waraŋ konkoo, waraŋ alibalaa kuuraŋo. Bari niŋ moo-wo-moo fintita banta, ka taa a faŋ seyi Babiloninkoolu ma, mennu be ali la saatewo suki kaŋ, wo maarii be baluu la le. A la baluwo be ke la le ko, ì ye meŋ kumakaa ka bo keloo kono. A niyo si kana, a ye baluu. 10 Ŋa n ñaa tiliŋ ñiŋ saatewo la le ka kasaaroo naati a kaŋ, a maŋ ke kuu kendoo ti. A be duŋ na Babiloni mansakewo bulu le, a ye dimbaa duŋ a la ka a jani.” Yaawe le ye a fo.
Yahuuda mansa buŋo kiitindoo
11 Yaawe tententa ka a fo ko, “Wo koolaa fanaa, a fo Yahuuda mansa buŋo ye, ì ye i lamoyi nte Yaawe la kumoo la. 12 Nte Yaawe ye ñiŋ ne fo ko:
Alitolu Mansa Dawuda koomalankoolu,
ali kiitii tilindiŋo taamandi fanikee-wo-fanikee,
ka moo-wo-moo bondi a toorandilaa bulu,
ì ye meŋ nakari,
niŋ wo nte, n na kamfaa si mala ko dimbaa.
A si mala, moo te soto noo la ka a faa,
ali la kuu jawu kewolu kamma la.
13 A juubee, m be i kele la le,
ite Yerusalaamu, wulumbaŋo santo siilaa,
ite meŋ be tintindiŋ konko beroo kaŋ.”
Yaawe le ye a fo.
“I ka a fo ko, ‘Jumaa le si ntolu boyinkaŋ noo,
waraŋ jumaa le si duŋ noo ntolu la buŋolu kono?’
14 M be i kuluu la i kekuwolu la le.
M be dimbaa le duŋ na i la sutoo la,
ka feŋo bee jani meŋ ye i murubeŋ.”
Yaawe le ye a fo.
© Mandinka Bible © Bible Society in The Gambia, 2011
