A Glimpse – The Gambia

Babiloni la boyoo

1 Yaawe* ko: “Ite Sunkutoo Babiloni, sii buutoo kono,

Dimmusuriŋ* Babiloni, wuli i la mansasiiraŋo kaŋ,

i ye sii bankoo to.

Ì te i kumandi la yele mereŋo la kotenke,

waraŋ sunkutu ñiimaa.

2 I la kuŋ bitiraŋo bondi,

i ye tuurilaŋ beroo taa, i ye siimaŋo juru.

I la faanoo wulindi, i wutoolu ye tara banta,

i ye boloŋo teyi.

3 I kenseŋo le be tara la looriŋ,

moolu ye i maluriŋo je.

M be makatoo bayi la le,

moo te kana la n na mantooroo la.”

4 Ǹ kumakaalaa mu Banisirayila la Senuŋ Baa le ti.

A too mu Yaawe Alihawaa Maariyo* le ti.

5 Yaawe ko, “Dimmusuriŋ Babiloni,

tara siiriŋ diboo kono, i ye tenkuŋ jee.

Ì te i kumandi la bankoolu la musumansoo* la kotenke.

6 Kabiriŋ n kamfaata n na moolu kamma,

m maŋ ì ke m faŋo taa ti kotenke,

ŋa ì duŋ i bulu le, bari i maŋ balafaa soto ì ye.

I ye duni kuliŋ baa laa keebaa kotoolu faŋo kaŋ ne.

7 I ko, ite le be ke la musumansoo ti fo fawu.

Bari i maŋ i hakilitu ñiŋ to,

i labaŋo be ke la ñaameŋ.

8 “Bituŋ saayiŋ, i lamoyi, kuu diimaa diyaata ite meŋ ye!

I ye a miira ko i be tankoo le kono,

i ka a fo i faŋo ye ko,

‘Nte doroŋ ne mu, doo koteŋ maŋ soto.

N te ke la furuyaamusoo ti muumeeke,

waraŋ ka n diŋolu saŋakumboo.’

9 Bari luŋ kiliŋ, ñaa biti niŋ ñaa yele kono,

ñiŋ kuu fuloo be ke la le,

i diŋolu bee be faa la le,

i be ke la furuyaamusoo ti.

I la batuutaalu niŋ saaboolu siyaata ñaa-wo-ñaa,

ñiŋ kuwolu be laa la i kaŋ ne, ì te baayi la.

10 I laata i la kuruŋyaa la le,

i ko, moo te i je la.

I la ñaameŋo niŋ i la londoo le ye i filindi.

I ka a fo i faŋ ye ko,

‘Nte doroŋ ne mu, doo koteŋ maŋ soto.’

11 Kooroo be boyi la i kaŋ ne,

aduŋ i te saaboo soto la meŋ be a bondi noo la.

Maasiiboo be naa i kaŋ ne,

i te meŋ baayi la noo.

Kasaaroo ñaamootoo si naa,

i te meŋ kalaŋo loŋ na.

12 “Tenteŋ i la ñiŋ batuutaa kuwolu niŋ saaboolu la,

i ye meŋ ke i la dookuwo ti biriŋ i dindiŋ!

Tumandoo i be ñaatotaa soto la le,

waraŋ i ye silaŋo dundi moo la.

13 I ye yaamarilaa jamaa le soto,

i yaayita ì nooma fo i bataata.

Lonnaalu mennu ka looloolu la kuwo koroosi,

ka a fo le meŋ be ke la kari-wo-kari,

wolu si naa i tanka maasiiboo la,

meŋ be laa la i kaŋ.

14 Tooñaa-tooñaa, wolu ñaama jaaramaa le mu!

Ì te ì faŋo tankandi noo la dimbaa la sembe waroo la.

A maŋ ke dimbaa keñemboo ti ka i jaa,

waraŋ dimbaa, i si sii meŋ daala.

15 Wo looloo lonnaalu mennu mu i kuukeñoolu ti biriŋ i dindiŋ,

ì te feŋ ke noo la i ye.

Ì be i tu la jee le, ì ye taa ì faŋ ye,

moo te soto la ì kono meŋ si i tanka.”

Yesaya 47