Kiilaariyaa kumoo Aramunkoolu niŋ Banisirayilankoolu la kuwo to
1 Kiilaariyaa kumoo fele Damasiku la kuwo to.
Yaawe* ko, “Ali a juubee, Damasiku te kumandi la saatewo la kotenke,
kaatu a be naa ke la tumbuŋ tuŋo le ti.
2 Aroweri dandanna saatewolu be kenseŋyaa la le,
ka ke beeyaŋolu la koorewo ti.
Ì si i laa jee, moo te ì silandi la.
3 Efurayimu* tatoolu be kasaara la le,
mansayaa semboo ye buruka Damasiku.
Too meŋ tuta Aramu bankoo kaŋ, be ke la le
ko Banisirayila jikiraŋ semboo yeemanta ñaameŋ.”
Yaawe Alihawaa Maariyo* le ye a fo.
4 Yaawe ko, “Wo luŋo la, Yaakuba jikiraŋ semboo be jii la le,
a la fankamaayaa ye naa labaŋ fuwaareyaa la.
5 A be muluŋ na le ko siimaŋ kunkoo,
ì ye meŋ karaŋ feefee fo a kenseŋo loota.
A kenseŋyaata ko Refayimu Wulumbaŋo
ì ye a karaŋ ne fo a banta.
6 Banisirayila si muluŋ ko olifu* yiroo,
ì ye meŋ diŋolu konkoŋ a bala,
fo diŋ fula doroŋ waraŋ saba tuta a bala santo,
kiliŋ-kiliŋolu ye tara a duuma la.”
Yaawe Banisirayila la Alla le ye a fo.
7 Wo luŋo la, moolu be ì ñaa loo la Daamansoo kaŋ ne,
ì ye ì ñaa tiliŋ Banisirayila la Senuŋ Baa la.
8 Ì te ì ñaa loo la sadaabodulaalu* kaŋ,
ì faŋo buloolu ye mennu dadaa.
Ì te ì ñaa tiliŋ na ì la jalaŋolu la,
wo Asera* dokoolu,
aniŋ ì la cuuraayi siisindidulaalu,
ì faŋolu buloolu ye mennu dadaa.
9 Wo waatoo la, Banisirayila saatee tatariŋolu be ke la dulaa kiideeriŋolu le ti. Ì be ke la le ko wo saatewolu, Hiwinkoolu niŋ Amorinkoolu ye mennu tu jee, kabiriŋ Banisirayilankoolu ye jee boyinkaŋ. Jee bee be ke la tumbuŋo le ti.
10 Kaatu ali ñinata Alla la le, ali Kiisandirilaa,
ali hakiloo maŋ bula ali la semberaŋ beroo la, ali la tatoo.
Ali ye fiifeŋ ñiimaalu tutu,
ka bantala jalaŋo batu.
11 Hani niŋ ì falinta kuuke le,
fo ì ye firoolu bondi,
wo soomandaa meŋ na ali ye ì tutu,
ali te hani diŋ kiliŋ ne kati la jee.
Wo luŋo la, niitoora koleŋo le be tara la keriŋ,
aniŋ dimiŋ jaarabaloo.
Jawoolu la bankoolu la kasaaroo
12 Hee, maakaŋ waroo banku jamaa kaŋ,
ì kumakaŋo be le ko baa maakaŋo!
Hee, bumbuŋ kaŋo banku jamaa kaŋ,
ì bumbuŋ kaŋo be le ko fankaasoo bumbuŋ kaŋo!
13 Bankoolu la maakaŋ waroo ka bumbuŋ ne ko fankaasoo,
bari niŋ Yaawe ye ì jalayi, ì si bori dulaa jaŋ,
foñoo ye ì samba ko fuufulewo meŋ be konkoo kaŋ,
waraŋ ko niŋ saafoñotoo be kankaŋo tindi kaŋ.
14 Wo luŋo wulaaroo,
teremmatoo silaŋ baa le be tara la keriŋ!
Janniŋ fanoo ka ke, ì si yeemaŋ.
Ñiŋ ne mu ǹ ñapinkannaalu niyo ti,
aniŋ ǹ kasaaralaalu taa.
© Mandinka Bible © Bible Society in The Gambia, 2011
