1 Muna Mowabi maralilaa,
saajiyolu kii buuñaa feŋo ti mansa ye,
ka bo Sela, kiilaalu ye tambi niŋ keñewuloo* la,
ka taa Dimmusuriŋ* Siyoni* Konkoo to.
2 Ko niŋ kunundiŋolu be patapata la
mennu wafatita ñaŋo kono,
Mowabi musoolu be wo le ñaama,
Arinoni Boloŋo teyidulaa to.
3 Mowabinkoolu ko,
“Ali ǹ yaamari, tiliŋo ye tara ǹ teema.
Niŋ tiloo be kandiriŋ,
ali dubeŋo dii ǹ na ko wulaara sumaa.
Ali keleborilaalu maabo,
ali kana borimoolu jamfaa.
4 Ali Mowabi keleborilaalu tu,
ì ye sii ali la bankoo kaŋ.
Ali ke ì ye tankaraŋo ti ì kasaaralaa bulu.”
Mantooralaa la kuwo be daŋ na le,
kasaaroo te soto la kotenke,
tiñaarilaa ye yeemaŋ bankoo kaŋ.
5 Wo to, mansasiiraŋo be loo la kanu bambaloo le kaŋ,
moo ye sii a kaŋ ka tooñaa taamandi.
A be ke la Dawuda koomalankoo le ti,
maralilaa meŋ ka kiitiyo kuntu a ñaama,
aniŋ ka tariyaa ka tiliŋo kuwo sabatindi.
6 Ŋà Mowabi la faŋ waroo moyi le,
a la faŋ wara mooyaa tambiriŋo,
a la faŋ sikandoo, a la konofaa aniŋ a la nendiroo,
bari a la kibiroo, kuma kenseŋo doroŋ ne mu.
7 Wo to, Mowabinkoolu si lemba,
moolu bee si lemba, ì la kuwo balafaa kaŋ.
Ali sunu baake, ali ye sunu kendeke,
Kiri-Hareseti saatewo la tiñaa kamma la,
kaatu a la domori diimaa te soto la kotenke.
8 Hesiboni kunkoo fiifeŋolu si noro,
aniŋ Sibuma wayini* yirisuŋo.
Bankoolu la maralilaalu ye a buloolu kuntu le,
mennu biireeta nuŋ fo ì futata Yaseri,
ì janjanta keñewuloo kono.
Ì soroŋolu taata le fo ì futata baa kankuŋ doo la.
9 Bituŋ n niŋ Yaserinkoolu kumboota ñoo la,
n kumboota Sibuma wayini yirisuŋo le ye.
Hee Hesiboni, hee Eleyale,
ali la kuwo le ye n ñaajiyo siyandi.
Kabiriŋ ali la yiridiŋo menta,
aniŋ ali la katirifeŋolu siita,
kele maakaŋo warata.
10 Seewoo niŋ jusulaa maŋ soto kunku jambandiriŋolu to,
moo buka denkili laa, waraŋ ka sari, wayini yiri kankaŋolu to,
moo buka wayini biti, yiridiŋ bitidulaa to,
kontaani sari kaŋo danta le.
11 N kumboota Mowabi ye le ko suusaa kumakaŋo,
Kiri-Hareseti saatewo la kuwo ye m baloo bee futufaa.
12 Mowabinkoolu ka taa batudulaa tintiŋo* to taariŋ fo ì bataata.
Ì taata ì la jalambuŋolu to duwaa la ñaa-wo-ñaa,
a te feŋ jaara la ì ye.
13 Yaawe* ye ñiŋ kumakaŋo le fo nuŋ Mowabi kamma. 14 Bari saayiŋ, Yaawe ko, “M be luŋolu konti la le, ko lebereesoo ka a la luŋolu konti ñaameŋ. Sanji saba bandulaa, Mowabi jikiraŋ semboo be baŋ na le. Hani ì siyaata ñaa-wo-ñaa, domandiŋ ne be tu la ì kono, domandiŋ doroŋ, aduŋ wolu be lamfu la le.”
© Mandinka Bible © Bible Society in The Gambia, 2011
